ຮອງນາຍົກລັດຖະມົນຕີມອບເຄື່ອງຊ່ວຍເຫຼືອ ຜູ້ປະສົບໄພພິບັດແຂວງຊຽງຂວາງ


...

14.08.2019 10:26     

   ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດ ຖະມົນຕີ ປະທານຄະນະກວດ ກາສູນກາງພັກ ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດ ບັງຫຼວງຂັ້ນສູນກາງ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ຊີ້ນຳວຽກງານຢູ່ແຂວງຊຽງຂວາງ ໃນລະຫ່ວາງວັນທີ 12-13 ສິງຫາ ຊຶ່ງໄດ້ຮັບຟັງການລາຍງານຈາກທ່ານ ບຸນຕົ້ນ ຈັນທະພອນ ເລຂາ ພັກແຂວງ ເຈົ້າແຂວງໆຊຽງຂວາງ ກ່ຽວກັບວຽກງານການຊີ້ນຳ-ນຳພາ ການພັດທະນາເສດຖະກິດ-ສັງຄົມ ໄລຍະຜ່ານມາ ແລະ ແຜນການຈັດຕັ້ງປະຕິບັດໃນຕໍ່ໜ້າເປັນຕົ້ນແມ່ນການກະກຽມປະກາດທົ່ງໄຫຫີນເປັນມໍລະ ດົກໂລກ, ກະກຽມຈັດງານ ມະຫາກຳກິລາແຫ່ງຊາດຄັ້ງທີ 11, ການກະກຽມ ແລະ ດຳເນີນກອງປະຊຸມໃຫຍ່ຂັ້ນທ້ອງຖິ່ນ. ໂອກາດນີ້ທ່ານຮອງນາຍົກລັດຖະມົນຕີ ກໍໄດ້ໂອ້ລົມ ຊີ້ນຳບາງວຽກງານ ພະນັກງານການນຳຂອງແຂວງຊຽງຂວາງ ທ່ານໄດ້ກ່າວເນັ້ນໃຫ້ແຂວງ ຈົ່ງເອົາໃຈໃສ່ປະຕິບັດຕາມທິດຊີ້ນຳຂອງສູນກາງ ເຮັດວຽກງານການເມືອງຢູ່ບັນດາໜ່ວຍພັກ ເພື່ອປັບປຸງປົວແປງ, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ແໜ້ນໜາ, ສືບຕໍ່ຫັນລົງກໍ່ສ້າງຮາກຖານ ກຳແໜ້ນພື້ນ ຖານ ພ້ອມສຶກສາອົບຮົມປະຊາ ຊົນ, ແກ້ບັນຫາຢາເສບຕິດເປັນຂະບວນການຕ້ອນຮັບກອງປະຊຸມໃຫຍ່ແຕ່ລະຂັ້ນ, ເອົາໃຈໃສ່ວຽກງານຂົງເຂດຊາຍແດນຕ້າ ສະກັດກັ້ນການ ລັກລອບຄ້າຂາຍເຖື່ອນລັກ ລອບຕັດໄມ້, ປັບປຸງກຳລັງຂອງ ແຂວງ, ເມືອງ ແລະ ຮາກຖານບ້ານໃຫ້ເຂັ້ມແຂງ, ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2019 ສູ້ຊົນປະຕິບັດບັນດາຄາດໝາຍທີ່ວາງອອກ, ເອົາໃຈໃສ່ປູກພືດ ລະດູຝົນຕິດພັນກັບການຜະ ລິດເປັນສິນຄ້າ, ເຝົ້າລະວັງການລະບາດພະຍາດທັງຄົນ, ສັດ ແລະ ພືດ, ກວດກາແກ້ໄຂຜົນກະທົບຈາກໄພພິບັດ, ສືບຕໍ່ແກ້ໄຂ, ເຂັ້ມງວດບັນຫາເລື່ອງໄມ້, ປະຕິບັດວິໄນຕໍ່ພະນັກງານ-ລັດຖະກອນ ຕ້ອງແຍກຜູ້ພົວພັນ ແລະ ຜູ້ກະທຳຜິດ ຕ້ອງກວດກາໃຫ້ລົງເລິກ, ເນັ້ນຄຸນນະພາບຂອງການສຶກສາ, ຄຸ້ມຄອງແຮງງານ ແລະ ພັດທະນາສີມືແຮງງານ, ກະກຽມປະກາດທົ່ງໄຫຫີນເປັນມໍລະດົກໂລກ ແລະ ງານມະຫະກຳກິລາແຫ່ງຊາດຄັ້ງທີ XI, ກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ, ໂດຍເນັ້ນວຽກງານດ້ານເນື້ອໃນ, ບົດລາຍງານການເມືອງ, ແຜນພັດທະນາເສດຖະກິດ-ສັງຄົມ, ບົດສຳຫຼວດການນຳພາຂອງຄະນະພັກ, ດ້ານຂະບວນການກວດກາຄືນບັນດາຄາດ ໝາຍຂອງກອງປະຊຸມອັນໃດຍັງບໍ່ສຳເລັດ ໃຫ້ສູ້ຊົນເປັນຂະບວນການໃຫ້ສຳເລັດ, ດ້ານບຸກຄະລາກອນ ຄັດເລືອກເອົາຜູ້ແທນສົມບູນ ສຳຮອງເຂົ້າຮ່ວມກອງປະຊຸມ. ໂອກາດນີ້ທ່ານຍັງໄດ້ມອບເຄື່ອງນຸ່ງຫົ່ມ, ເຄື່ອງອຸປະໂພກ, ບໍລິໂພກ, ເຄື່ອງໃຊ້ຄົວເຮືອນ ມູນຄ່າ 220.000.000 ກີບ ແລະ ເງິນສົດ 100.000.000 ກີບ ລວມມູນຄ່າທັງໝົດ 320.000.000ກີບ.
(ຂ່າວ: ບຸນມີ ແສງທຸມມີ)