ສະຫຼອງວັນສື່ມວນຊົນ ແລະ ການພິມຈຳໜ່າຍ ລັດຖະມົນຕີຊີ້ນຳສື່ເອົາໃຈໃສ່ 7 ວຽກສຳຄັນໃນຕໍ່ໜ້າ


...

14.08.2019 10:44     

   ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດງານໂຮມຊຸມນຸມສະເຫຼີມສະຫຼອງວັນສື່ມວນຊົນ ແລະ ການພິມຈຳໜ່າຍລາວ ຄົບຮອບ 69 ປີ (13/8/1950-13/8/2019) ຂຶ້ນເມື່ອວັນທີ 13 ສິງຫານີ້ ທີ່ຫໍວັດທະນະທຳແຫ່ງຊາດ ໂດຍການເປັນກຽດເຂົ້າຮ່ວມຂອງ ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ ຊຶ່ງມີການນຳ ແລະ ພະນັກງານທີ່ເຮັດວຽກງານສື່ ແລະ ການພິມຈຳໜ່າຍ ທັງພາກລັດ, ເອກະຊົນ ແລະ ຜູ້ໃຫ້ການສະໜັບສະໜູນເຂົ້າຮ່ວມ.
ໃນງານໂຮມຊຸມນຸມ ທ່ານ ສະ-ຫວັນຄອນ ຣາຊມຸນຕຣີ ຮອງລັດ-ຖະ-ມົນ-ຕີກະ-ຊວງ ຖວທ ທັງເປັນປະທານສະມາຄົມນັກ ຂ່າວ ແຫ່ງ ສປປ ລາວ ໄດ້ຕາງໜ້າໃຫ້ສື່ມວນຊົນ ແລະ ການພິມຈຳ-ໜ່າຍຂຶ້ນຜ່ານບົດສະຫຼຸບຜົນງານການເຄື່ອນໄຫວຂອງສື່ມວນຊົນ ແລະ ການພິມຈຳໜ່າຍ, ບາງຕອນສຳ-ຄັນທ່ານໄດ້ກ່າວວ່າ: ໃນໜຶ່ງປີ-ຜ່ານມາ ເຖິງວ່າພວກເຮົາໄດ້ປະສົບພົບ-ພໍ້ກັບຄວາມຫຍຸ້ງ-ຍາກ ແລະ ສິ່ງທ້າທາຍຫຼາຍຈາກສະພາບການເຊື່ອມໂຍງໃນຂະບວນການປະຕິວັດວິທະຍາສາດເຕັກໂນໂລຊີຂໍ້ມູນຂ່າວສານທີ່ນັບມື້ຂະຫຍາຍຕົວກ້າວເຂົ້າສູ່ຍຸກດີຈີຕອນ 4.0 ຊຶ່ງໄດ້ສົ່ງຜົນກະທົບທາງບວກ ແລະ ທາງລົບຕໍ່ການພັດ-ທະ-ນາຢູ່ປະເທດເຮົາກໍຕາມ, ແຕ່ພາຍໃຕ້ການຊີ້ນຳນຳພາ ຂອງພັກເວົ້າລວມ, ກໍຄືອົງຄະນະພັກ ແລະ ຄະນະນຳ ກະຊວງ ຖວທ ເວົ້າລວມເວົ້າສະເພາະ ພວກເຮົາ ໄດ້ປະຕິບັດໜ້າທີ່ຢ່າງຕັ້ງໜ້າທັງສະຕິປັນຍາ ແລະ ເຫື່ອແຮງຂອງຕົນເຂົ້າໃນການໂຄສະນາເຜີຍແຜ່ຜົນສຳເລັດແຕ່ລະໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ, ປຸກລະດົມຈິດໃຈຮັກຊາດ ແລະ ຄວາມເປັນເຈົ້າຕົນເອງ, ສ້າງຄວາມເຂັ້ມ-ແຂງດ້ວຍຕົນເອງ, ສື່ມວນຊົນ ແລະ ການພິມຈຳໜ່າຍລາວ ໄດ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງທັງທາງດ້ານປະລິມານ ແລະ ຄຸນນະພາບ ໂດຍມີໂຄງລ່າງພື້ນຖານທີ່ໄດ້ຮັບການພັດທະນາໄປສູ່ຄວາມທັນສະໄໝ ແລະ ຄ່ອຍໆຫັນຈາກລະບົບອານາລັອກໄປສູ່ລະບົບດີຈີຕອນໄດ້ໂດຍພື້ນຖານ. ອັນພົ້ນເດັ່ນແມ່ນການ ນຳໃຊ້ເຄືອຂ່າຍອິນເຕີເນັດໃນການສະໜອງຂໍ້ມູນຂ່າວສານ, ສາລະຄວາມຮູ້, ສາລະບັນເທີງໃຫ້ແກ່ເປົ້າໝາຍ ເພື່ອຮັບໃຊ້ການພັດທະນາເສດຖະກິດ-ສັງຄົມ ໄດ້ຢ່າງວ່ອງໄວ, ອຸດົມສົມບູນຕາມທິດສີຂຽວ ແລະ ຍືນຍົງ.
ໃນຂະນະດຽວກັນບຸກຄະລາກອນສື່ມວນຊົນ ແລະ ການພິມ ຈຳໜ່າຍກໍໄດ້ຮັບການຍົກລະດັບຢ່າງຕໍ່ເນື່ອງທັງພາຍໃນ ແລະ ຕ່າງປະເທດ.
ໃນການໂອ້ລົມຕໍ່ກອງປະຊຸມ ທ່ານ ບໍ່ແສງຄຳ ວົງດາລາ ໄດ້ສະແດງຄວາມຍ້ອງຍໍຊົມເຊີຍບັນດານັກຮົບສື່ມວນຊົນ ແລະ ການພິມຈຳໜ່າຍທຸກພາກສ່ວນທີ່ໄດ້ອຸທິດເຫື່ອແຮງສະຕິປັນຍາເຮັດສຳເລັດພາລະກິດທີ່ມີກຽດສະຫງ່າຂອງຕົນ. ທ່ານກ່າວວ່າ: ສື່ມວນຊົນ ແລະ ການພິມຈຳໜ່າຍຍັງເປັນປະໂຫຍດສູງສຸດໃຫ້ແກ່ປະ-ເທດຊາດຂອງພວກເຮົາ. ເພື່ອປະຕິບັດໜ້າທີ່ການເມືອງທີ່ຖືກມອບໝາຍ, ເສີມຂະຫຍາຍຜົນງານ ແລະ ຈຳກັດຈຸດ ອ່ອນຂໍ້ຄົງຄ້າງນັ້ນ, ທ່ານລັດຖະມົນຕີໄດ້ຊີ້ນຳໃຫ້ສື່ມວນຊົນ ແລະ ການພິມຈຳໜ່າຍຕ້ອງໄດ້ເອົາໃຈໃສ່ 7 ວຽກງານທີ່ສຳຄັນໃນຕໍ່ໜ້າດັ່ງນີ້: ໜຶ່ງ, ສືບຕໍ່ເອົາໃຈໃສ່ວຽກງານແນວຄິດການເມືອງໃຫ້ດີມີຄວາມຮັບຜິດຊອບການເມືອງສູງຕໍ່ໜ້າທີ່ວຽກງານ. ເຮັດໃຫ້ສື່ມວນຊົນ ແລະ ສິ່ງພິມຂອງພວກເຮົາເປັນ ກະບອກສຽງ ແລະ ເວທີໂຄສະນາແນວທາງນະໂຍບາຍຂອງພັກ, ລະບຽບກົດ-ໝາຍຂອງລັດ, ແຜນພັດທະນາເສດຖະກິດ-ສັງຄົມ ຂອງລັດຖະບານ, ເປັນເວທີສະແດງຄວາມຄິດຄວາມເຫັນ ແລະ ຄວາມມຸ່ງມາດປາຖະໜາອັນຊອບທຳຂອງປະຊາຊົນລາວບັນດາເຜົ່າ, ຢຶດໝັ້ນ ແລະ ປະຕິບັດກົດໝາຍວ່າດ້ວຍສື່ມວນຊົນ ແລະ ກົດໝາຍການພິມຈຳໜ່າຍຢ່າງຖືກຕ້ອງ, ຄົບຖ້ວນ ແລະ ເຂັ້ມງວດ. ສອງ, ເອົາໃຈໃສ່ຈັດຕັ້ງປະຕິບັດວິໄສທັດ 2030, ຍຸດທະສາດຮອດປີ 2025 ແລະ ແຜນພັດທະນາວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວຂອງ ສປປ ລາວ 2016-2020 ໃຫ້ປະ-ກົດຜົນເປັນຈິງ. ສາມ, ສືບຕໍ່ໂຄສະນາເຜີຍແຜ່ຜ່ານສື່ມວນຊົນ ແລະ ການພິມຈຳໜ່າຍກ່ຽວກັບຂະ-ບວນການຕ່າງໆຮັບໃຊ້ໃຫ້ແກ່ການກະກຽມກອງປະຊຸມໃຫຍ່ຄັ້ງທີ XI ຂອງພັກ, ປີທ່ອງທ່ຽວລາວ - ຈີນ 2019, ການກະ-ກຽມງານກິລາແຫ່ງຊາດທີ່ແຂວງຊຽງຂວາງ, ການສະເຫຼີມສະຫຼອງທົ່ງໄຫຫີນ ແຂວງຊຽງຂວາງ ເຂົ້າເປັນມໍລະດົກໂລກ, ໂຄສະນາເຫດການສຳຄັນຂອງພັກ, ຂອງຊາດ ແລະ ສາກົນໃຫ້ດີ. ສີ່, ສືບຕໍ່ປັບປຸງກົດໝາຍ ແລະ ສ້າງນິຕິກຳລຸ່ມກົດໝາຍໃຫ້ພຽງພໍ, ສອດຄ່ອງ ແລະ ຮັດກຸມ. ຫ້າ, ສືບຕໍ່ປັບ ປຸງວຽກງານຄຸ້ມຄອງສື່ມວນຊົນ ແລະ ການພິມຈຳໜ່າຍໃຫ້ເຂັ້ມແຂງ, ສ້າງເງື່ອນໄຂໃຫ້ສື່ມວນຊົນ ແລະ ການພິມຈຳ ໜ່າຍສາມາດພັດທະນາຕາມທິດຄຸນນະພາບ, ທັນສະໄໝ, ປອດໄພ ແລະ ຍືນຍົງ. ຫົກ, ໃນສະພາບທີ່ການສ້າງລາຍຮັບວິ-ຊາການຈາກສື່ມວນຊົນນັບມື້ນັບຫຼຸດລົງນີ້, ຈະຕ້ອງໄດ້ຮີບຮ້ອນເອົາໃຈໃສ່ຄົ້ນຄວ້າ, ວິໄຈ ແລະ ຊອກຫາວິ-ທີການໃໝ່ ໃນການຊອກຫາແຫຼ່ງລາຍຮັບວິຊາການຈາກສື່ມວນຊົນ ແລະ ການພິມຈຳ-ໜ່າຍ, ລວມທັງການໃຊ້ຈ່າຍເຂົ້າໃນວຽກງານໃຫ້ມີ ຄວາມຄ່ອງຕົວທີ່ຖືກ-ຕ້ອງສອດຄ່ອງກັບລະບຽບກົດໝາຍໃຫ້ໄດ້ໂດຍໄວ ຫຼື ຫັນໄປສູ່ການກຸ້ມຕົນເອງ. ເຈັດ, ເອົາໃຈໃສ່ກໍ່ສ້າງພະນັກງານໜຸ່ມນ້ອຍສືບທອດປ່ຽນແທນທີ່ຮັບປະກັນທາງດ້ານທັດສະນະຫຼັກໝັ້ນ, ຄຸນທາດການເມືອງ ແລະ ວິຊາສະເພາະທີ່ເຂັ້ມແຂງ ເພື່ອເຮັດສຳເລັດໜ້າທີ່ສຳຄັນທີ່ພັກລັດໄດ້ມອບໝາຍໃຫ້.
ໃນງານໂຮມຊຸມ-ນຸມຍັງມີການຈັດງານວາງ-ສະ-ແດງຮູບພາບຜົນ-ງານການເຄື່ອນໄຫວຂອງສື່ມວນຊົນ ແລະ ການພິມຈຳໜ່າຍລາວ ຢູ່ສະຖານທີ່ດັ່ງກ່າວ ທັງເປັນການເຕົ້າໂຮມຄວາມສາມັກຄີພາຍໃນສື່ມວນຊົນ ແລະ ການພິມຈຳໜ່າຍໃຫ້ແໜ້ນແຟ້ນ, ພ້ອມທັງສ້າງຄວາມຮັບຮູ້ ແລະ ເຂົ້າໃຈທີ່ ຖືກຕ້ອງຕໍ່ບົດບາດ, ໜ້າທີ່, ມູນ -ເຊື້ອ ແລະ ຜົນງານຂອງວຽກງານດັ່ງກ່າວ. ນອກນັ້ນ, ຍັງເປັນການປຸກລະດົມໃຫ້ທົ່ວສັງຄົມໄດ້ມີສ່ວນຮ່ວມໃນການສ້າງຄວາມເຂັ້ມແຂງໃຫ້ອົງການສື່ມວນຊົນ ແລະ ການພິມຈຳໜ່າຍລາວໃຫ້ສູງຂຶ້ນເລື້ອຍໆ.
(ຂ່າວ+ພາບ: ຍຸພິນທອງ)