ເຈົ້າແຂວງບໍລິຄຳໄຊ ເນັ້ນ 3 ຂໍ້ແຂ່ງຂັນໃນມື້ເປີດສົກຮຽນໃໝ່


...

04.09.2019 9:42     

   ທ່ານ ກອງແກ້ວ ໄຊສົງ ຄາມ ເຈົ້າແຂວງບໍລິຄຳໄຊໄດ້ເນັ້ນໃຫ້ຜູ້ບໍລິຫານການສຶກສາ ແລະ ກິລາທຸກຂັ້ນ, ຄູ-ອາຈານ ແລະ ນັກຮຽນ-ນັກສຶກສາ ໃນສົກຮຽນໃໝ່ 2019-2020 ໃຫ້ພ້ອມກັນປະຕິບັດໜ້າທີ່ວຽກງານຂອງ ຕົນດ້ວຍຈິດໃຈບຸກທະລຸ ແລະ ຕິດພັນກັບການຈັດຕັ້ງປະຕິບັດເນື້ອໃນ 3 ຂໍ້ແຂ່ງຂັນຄື: ສອນດີ-ຮຽນເກັ່ງ, ຕ້ານ ແລະ ສະກັດກັ້ນທຸກປະກົດການຫຍໍ້ທໍ້ ແລະ ສ້າງໂຮງຮຽນ-ສະຖານທີ່ການສຶກສາໃຫ້ມີສິ່ງແວດລ້ອມທີ່ດີ.
ໃນພິທີເປີດສົກຮຽນໃໝ່ 2019-2020 ທີ່ໄດ້ຈັດຂຶ້ນໃນວັນທີ 30 ສິງຫາຜ່ານມາ ຢູ່ໂຮງຮຽນປະຖົມສົມບູນໂພນ ໄຊເໜືອ ເມືອງປາກຊັນ, ທ່ານ ເຈົ້າແຂວງບໍລິຄຳໄຊໄດ້ໃຫ້ກຽດເຂົ້າຮ່ວມເປັນປະທານ ໂດຍມີ ຫົວໜ້າພະແນກສຶກສາທິການ ແລະ ກິລາແຂວງ-ເມືອງ, ຮອງເຈົ້າເມືອງປາກຊັນ, ມີບັນດາຫົວໜ້າພະແນກການ, ປະທານສະມາຄົມພໍ່ແມ່ນັກຮຽນ ພ້ອມດ້ວຍຄູ-ອາຈານ ແລະ ນັກຮຽນເຂົ້າຮ່ວມ.
ທ່ານ ກອງແກ້ວ ໄຊສົງ ຄາມ ໄດ້ກ່າວມີຄຳເຫັນຕໍ່ພິທີ ເປີດສົກຮຽນໃໝ່ໃນຄັ້ງນີ້ ຊຶ່ງ ທ່ານໄດ້ເນັ່ນໃຫ້ຜູ້ບໍລິຫານການ ສຶກສາ ແລະ ກິລາທຸກຂັ້ນ, ຄູ-ອາຈານ ແລະ ນັກຮຽນ-ນັກ ສຶກສາ ຈົ່ງຕັ້ງໜ້າປະຕິບັດໜ້າ ທີ່ວຽກງານຂອງຕົນດ້ວຍຈິດ ໃຈບຸກທະລຸ ແລະ ຕິດພັນກັບ ການຈັດຕັ້ງປະຕິບັດ 3 ຂໍ້ແຂ່ງ ຂັນຂອງຂະແໜງການສຶກສາ ແລະ ກິລາວາງອອກຄື: ສອນດີ-ສອນເກັ່ງ, ຕ້ານ ແລະ ສະກັດກັ້ນທຸກປະກົດການຫຍໍ້ທໍ້, ສ້າງໂຮງຮຽນ-ສະຖານທີ່ການສຶກສາໃຫ້ມີສິ່ງແວດລ້ອມທີ່ດີ ຕາມ 3 ລັກສະນະ ແລະ 5 ຫຼັກມູນຂອງວຽກງານການສຶກສາ ໂດຍສຸມໃສ່ສ້າງບຸກຄະລາກອນທີ່ດີໃຫ້ແກ່ສັງຄົມ, ພັດທະນາໂຮງຮຽນໃຫ້ເປັນໂຮງຮຽນຕົວແບບ, ເປັນໂຮງຮຽນສີຂຽວ, ສະອາດ, ສວຍງາມ ເພື່ອເຮັດໃຫ້ໂຮງຮຽນເປັນບ່ອນດຶງດູດຈິດໃຈ, ເປັນບ່ອນ ນັບຖື ແລະ ເຊື່ອຖືຂອງສັງຄົມ. ໃນນີ້ນັກຮຽນນັກສຶກສາທຸກຄົນຕ້ອງດຸໝັ່ນພາກພຽນ,ມີຄວາມມານະອົດທົນ, ເອົາໃຈໃສ່ຕັ້ງ ໜ້າຄົ້ນຄວ້າຮ່ຳຮຽນ, ສະແຫວງຊອກຫາຄວາມຮູ້ດ້ວຍຕົນເອງ ແລະ ເພື່ອຕົນເອງ, ພັດທະນາຕົນເອງໃຫ້ກາຍເປັນສິດທີ່ດີຂອງຄູ ເປັນລູກກະຕັນຍູຂອງພໍ່ແມ່ ແລະ ເປັນນັກຮຽນດີ-ຮຽນເກັ່ງ.
(ຂ່າວ: ຄຳຟອງ)