3 ເມືອງຂອງແຂວງສາລະວັນ ນ້ຳຖ້ວມໜັກ


...

05.09.2019 8:16     

   ພາຍຸດີເປຼເຊິນ ພັດຜ່ານປະເທດເຮົາ ສົ່ງຜົນໃຫ້ພາກໃຕ້ຂອງລາວເຮົາເກີດມີຝົນຕົກລິນຕິດຕໍ່ກັນຫຼາຍວັນ ໂດຍສະ ເພາະແຂວງສາລະວັນ ເຮັດ ໃຫ້ ເກີດມີໄພນ້ຳຖ້ວມໜັກໜ່ວງ 3 ເມືອງຂອງແຂວງສາລະວັນ, ຫຼາຍບ້ານໄດ້ຮັບຜົນກະທົບໜັກ, ເສັ້ນທາງຄົມມະນາຄົມ, ໄຟຟ້າ, ນ້ຳປະປາຖືກຕັດຂາດ. ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນ ປະ ທານຄະນະກຳມະການຄວບຄຸມໄພພິບັດຂັ້ນແຂວງ ໄດ້ລາຍງານໃຫ້ຮູ້ເມື່ອວັນທີ 4 ກັນຍານີ້ວ່າ: ພາຍຫຼັງໄດ້ຮັບແຈ້ງເຕືອນຈາກກົມອຸຕຸນິຍົມ ແລະ ອຸທົກກະສາດ ແຕ່ວັນທີ 1 ກັນຍາ ເປັນຕົ້ນມາມີພາຍຸພັດຜ່ານແຂວງສາລະວັນ ເຮັດໃຫ້ມີຝົນ ຕົກໜັກເປັນບໍລິເວນກວ້າງ ແລະ ຕິດຕໍ່ກັນຫຼາຍວັນ ເຮັດໃຫ້ເກີດນ້ຳຖ້ວມສູງ ເປັນບໍລິເວນກວ້າງໃນເທດສະບານແຂວງສາລະວັນ, ໃນນັ້ນມີ ເມືອງສາລະວັນ, ເມືອງຄົງເຊໂດນ ແລະ ເມືອງວາປີ. ຕໍ່ສະພາບການດັ່ງກ່າວ ຄະນະກຳມະການຄວບຄຸມໄພພິບັດຂັ້ນແຂວງ ໄດ້ມີແຜນຊ່ວຍເຫຼືອ, ກອບກູ້ເອົາຊີວິດ, ຊັບສິນຂອງພໍ່ແມ່ປະຊາຊົນຢ່າງຮີບດ່ວນ ໃນ 3 ເມືອງ ຄື: ສາລະວັນ, ຄົງເຊໂດນ ແລະ ເມືອງວາປີ ໂດຍໄດ້ຈັດສົ່ງກຳລັງປ້ອງກັນຊາດ, ປ້ອງກັນຄວາມສະຫງົບ, ທຸກກຳລັງແຮງຂອງສັງຄົມ ເຂົ້າຊ່ວຍເຫຼືອພໍ່ແມ່ປະຊາຊົນ ທີ່ຍັງຕິດໃນເຮືອນ ແລະ ພື້ນທີ່ຖືກນຳ້ຖ້ວມ ໃຫ້ປອດໄພ ຢ່າງຮີບດ່ວນ. ສຳລັບເທດສະບານແຂວງ ໄດ້ຕັ້ງຈຸດອົບພະຍົບຊົ່ວຄາວ 3 ຈຸດ ຄື: ວິທະຍາໄລຄູສາລະວັນ, ສະໂມສອນແຂວງ ແລະ ສູນການສຶກສານອກໂຮງຮຽນ. ທ່ານຍັງໄດ້ກ່າວຕື່ມອີກວ່າ: ປັດຈຸບັນນີ້ ທາງແຂວງສາລະວັນ ໄດ້ນຳໃຊ້ເຮືອທ້ອງແບນ, ເຮືອຊ່ວງ, ເຮືອຫາປາ ເພື່ອຊ່ວຍເຫຼືອປະຊາຊົນທີ່ຢູ່ໃນເຂດປະສົບໄພ, ແຕ່ກໍຍັງບໍ່ພຽງພໍກັບຄວາມຕ້ອງການ ເພາະເສັ້ນທາງຫຼາຍເສັ້ນຖືກຕັດຂາດບໍ່ສາມາດໃຊ້ພາຫະນະເຂົ້າຊ່ວຍເຫຼືອໄດ້ ໃຊ້ພຽງເຮືອເທົ່ານັ້ນ ເພາະປັດຈຸບັນນ້ຳຖ້ວມສູງ. ສຳລັບເມືອງສາລະວັນ ມີບ້ານທີ່ຖືກຖ້ວມ 75 ບ້ານ, 40 ບ້ານຖືກຕັດຂາດ, ເມືອງວາປີ ມີ 55 ບ້ານ, ບ້ານທີ່ຖືກຕັດຂາດ 21 ບ້ານ ແລະ ເມືອງຄົງເຊໂດນ 75 ບ້ານຖືກຖ້ວມ, ມີ 40 ບ້ານ ຖືກຕັດຂາດ ແລະ ມີສ່ວນໜຶ່ງຂອງເມືອງຕຸ້ມລານ ກໍ່ຖືກຖ້ວມເຊັ່ນກັນ. ສະຖານະການໃນຂະນະນີ້, ປະຊາຊົນຫຼາຍເຂດໄດ້ມີການອົບພະຍົບໄປເຂດທີ່ປອດໄພແລ້ວ ແລະ ໄດ້ມີການຕັດກະແສໄຟຟ້າ, ນ້ຳປະປາ ແລະ ອື່ນໆມາແຕ່ວັນທີ 3 ກັນຍາເປັນຕົ້ນມາ, ນອກນັ້ນຍັງຕັ້ງຈຸດບໍລິການດ້ານສາທາລະນະສຸກ ເພື່ອບໍລິການກວດສຸຂະພາບໃຫ້ແກ່ປະຊາຊົນຜູ້ປະສົບໄພນ້ຳຖ້ວມ. (ຂ່າວ-ພາບ: ວິໄລວອນ ສິດທິ ໄຊ)