ນະຄອນປາກເຊ ຍັງໜ້າເປັນຫ່ວງ ນ້ຳຍັງບໍ່ມີທ່າທີວ່າຈະແຫ້ງລົງ


...

06.09.2019 9:22     

   ນ້ຳຖ້ວມນະຄອນປາກເຊ ຍັງໜ້າເປັນຫ່ວງ ນ້ຳຂອງ ແລະ ນ້ຳເຊໂດນ ຍັງສືບຕໍ່ໄຫຼເຂົ້າຖ້ວມ, ຂະນະທີ່ການຊ່ວຍເຫຼືອກອບກູ້ ຍົກຍ້າຍປະຊາຊົນເປັນໄປດ້ວຍຄວາມຍາກລຳບາກ ເພາະບາງເຂດນ້ຳໄຫຼແຮງຕ້ອງໄດ້ໃຊ້ເຮືອຈັກເຂົ້າຊ່ວຍ, ສ່ວນສະຖານະການຢູ່ເມືອງ ແລະ ແຂວງສາລະວັນ, ນ້ຳເລີ່ມບົກແຫ້ງລົງຢ່າງຕໍ່ເນື່ອງແຕ່ຕອນຄ່ຳຂອງວັນທີ 4 ກັນຍາເປັນຕົ້ນມາ ແຕ່ກໍຍັງມີຫຼາຍເຂດຍັງມີນ້ຳຖ້ວມຂັງ, ໃນຂະນະທີ່ເມືອງວາປີ ແລະ ເມືອງຄົງເຊໂດນ ນ້ຳຍັງຖ້ວມສູງຢູ່. ທ່ານ ຍົກດາ ໄຊຍະຈັກ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງຈຳປາສັກ ຫົວໜ້າກອງ ເລຂາຄະນະກຳມະການໄພ ພິບັດຂັ້ນແຂວງ ເປີດເຜີຍໃຫ້ຮູ້ໃນວັນທີ 5 ກັນຍາວ່າ: ເນື່ອງຈາກຝົນຕົກໜັກ ເຮັດໃຫ້ນ້ຳເຊໂດນຍື່ງຂຶ້ນຖ້ວມບ້ານເຮືອນປະຊາຊົນ ຊຶ່ງມາຮອດວັນທີ 4 ກັນຍາ ນ້ຳໄດ້ຖ້ວມ 10 ເມືອງຂອງແຂວງຈຳປາສັກ, ຂະນະທີ່ນະຄອນປາກເຊ ນ້ຳຂອງ ແລະ ນ້ຳເຊໂດນໄດ້ໄຫຼເຂົ້າຖ້ວມຕັ້ງແຕ່ວັນທີ 4 ກັນຍາ, ມາຮອດຕອນແລງຂອງວັນທີ 5 ກັນຍາກໍຍັງບໍ່ມີທ່າທີວ່າ ຈະບົກແຫ້ງລົງ, ນ້ຳຖ້ວມຄັ້ງນີ້ ເປັນຄັ້ງຮ້າຍແຮງທີ່ສຸດ ເກືອບເທົ່າກັບເຫດການປີ 1978, ໃນຂະນະທີ່ລະດັບນ້ຳຂອງເວລາ 7 ໂມງຂອງວັນທີ 5 ກັນຍາຢູ່ທີ່ 13,75 ແມັດ.
ທ່ານກ່າວອີກວ່າ: ປະຊາ ຊົນທີ່ຢູ່ເຂດນ້ຳຖ້ວມສູງ, ສ່ວນຫຼາຍໄດ້ພາກັນເຄື່ອນຍ້າຍຂຶ້ນຢູ່ເທິງຫຼັງຄາເຮືອນ, ຫຼາຍຄົນ ຫຼາຍຄອບຄົວໄດ້ອາໄສເກາະຫຼັງຄາຢູ່ເປັນເວລາຫຼາຍຊົ່ວໂມງ, ໃນຂະນະທີ່ການຊ່ວຍກອບກູ້ ແລະ ຍົກຍ້າຍປະຊາຊົນເປັນໄປດ້ວຍຄວາມລຳບາກ ເນື່ອງຈາກວ່າ ນ້ຳໄຫຼເຂົ້າຖ້ວມຢ່າງໄວວາ ແລະ ຖ້ວມເປັນບໍລິເວນກວ້າງ (ເກືອບທົ່ວນະຄອນປາກເຊ) ຊຶ່ງຕ້ອງໄດ້ໃຊ້ເຮືອຈັກເຂົ້າຊ່ວຍ(ບາງເຂດ), ຫາກໃຊ້ເຮືອພາຍສ່ຽງຕໍ່ການຖືກກະແສນ້ຳພັດໄຫຼໄປກັບນ້ຳ, ຂະນະທີ່ຜູ້ປະສົບໄພ ຕ້ອງການອາຫານ ແລະ ນ້ຳດື່ມເປັນຈຳນວນຫຼວງຫຼາຍ ແຕ່ການຊ່ວຍເຫຼືອຍັງມີໜ້ອຍ ເນື່ອງຈາກວ່າ ບັນດາແຂວງໃກ້ຄຽງກໍຖືກນ້ຳຖ້ວມເຊັ່ນດຽວກັນ. ສ່ວນສະພາບນ້ຳຖ້ວມຢູ່ແຂວງສາລະວັນ, ນັກຂ່າວທ້ອງຖິ່ນລາຍງານວ່າ: ລະດັບນ້ຳໃນເຂດເທດສະບານເມືອງ ແລະ ແຂວງສາລະວັນ ໄດ້ເລີ່ມບົກລົງແຕ່ຕອນແລງໃນວັນທີ 4 ກັນຍາ ແລະ ປັດຈຸບັນນີ້ເສັ້ນທາງຫຼາຍເສັ້ນສາມາດສັນຈອນໄດ້ຕາມປົກກະຕິ, ຍົກເວັ້ນໃນບາງເຂດ ໂດຍສະເພາະແມ່ນຈຸດຕະຫຼາດສາລະວັນ ຈຸດບ້ານວັດກາງ ແຕ່ເສັ້ນທາງຫ້ອງວ່າການປົກຄອງແຂວງ ຫາ ເຮືອນຮັບແຂກຂອງແຂວງ, ຈຸດບ້ານໂພນແກ້ວ, ນາເຫຼັກ, ໂພນບົກ ແລະ ຈຸດອື່ນໆທີ່ຢູ່ພື້ນທີ່ຕ່ຳ ຍັງບໍ່ສາມາດນຳໃຊ້ພາຫະນະ ປະເພດລົດໄດ້ ເພາະຍັງເປັນພື້ນທີ່ມີນ້ຳຖ້ວມຂັງໃນລະດັບທີ່ສູງສົມຄວນ.
ສ່ວນເມືອງວາປີ ແລະ ເມືອງຄົງເຊໂດນ ລະດັບນ້ຳຍັງໄດ້ຖ້ວມສູງຂຶ້ນເລື້ອຍໆ ເຮັດໃຫ້ເສັ້ນທາງ ເລກທີ 13 ໃຕ້ ແຕ່ທະນາຄານພັດທະນາລາວ ໜ່ວຍບໍລິການເມືອງຄົງເຊໂດນ ຫາ ບ້ານຫ້ວຍເຊົາ ຍັງບໍ່ສາມາດສັນຈອນໄດ້.
ອີງຕາມຂໍ້ມູນຈາກກະ ຊວງແຮງງານ ແລະ ສະຫວັດດີການສັງຄົມໃຫ້ຮູ້ວ່າ: ເນື່ອງຈາກອິດທິພົນຂອງລົມພາຍຸໝຸນເຂດຮ້ອນໂພດູນ ແລະ ລົມພາຍຸດີເປຣເຊິນ ທີ່ພັດຜ່ານເຂົ້າມາ ສປປລາວ ໃນໄລຍະທ້າຍເດືອນ ສິງຫາ ຫາ ຕົ້ນເດືອນກັນຍາ 2019 ເຮັດໃຫ້ມີຝົນຕົກໜັກ ແລະ ເກີດນ້ຳຖ້ວມຢູ່ 6 ແຂວງຄື: ແຂວງຄຳມ່ວນ, ແຂວງສະຫວັນນະເຂດ, ແຂວງອັດຕະປື, ແຂວງສາລະວັນ, ແຂວງຈຳປາສັກ ແລະ ແຂວງເຊກອງ, ສົ່ງຜົນກະທົບໂດຍກົງຕໍ່ປະຊາຊົນ ໃນ 37 ເມືອງ, 788 ບ້ານ, 54.207 ຄອບຄົວ, ເສຍຊີວິດ 2 ຄົນ (ແຂວງສະຫວັນນະເຂດ 1 ຄົນ ແລະ ຈຳປາສັກ 1 ຄົນ), ສູນຫາຍ 2 ຄົນ ຢູ່ແຂວງຈຳປາສັກ 1 ຄົນ, ປະຊາຊົນຍົກຍ້າຍ 3.400 ກວ່າຄອບຄົວ, ສ້າງຄວາມເສຍຫາຍຕໍ່ບ້ານເຮືອນຂອງປະຊາຊົນ, ເນື້ອທີ່ນາຖືກນ້ຳຖ້ວມ 130.569 ກວ່າເຮັກຕາ, ສວນ 251 ເຮັກຕາ, ໜອງປາ 953 ໜອງ, ຊົນລະປະທານ 26 ແຫ່ງ, ເສັ້ນທາງຖືກນ້ຳຖ້ວມ 139 ກິໂລແມັດ, ຂົວ 6 ແຫ່ງ, ໂຮງຮຽນ 45 ແຫ່ງ, ສຸກສາລາ 2 ແຫ່ງ ແລະ ສັດລ້ຽງຫຼາຍກ່ວາ 136 ໂຕ ຖືກຍ້າຍໄປຢູ່ບ່ອນທີ່ປອດໄພ, ຄວາມຕ້ອງການຮີບດ່ວນ ລວມມີເຄື່ອງອຸປະໂພກ-ບໍລິໂພກ ເປັນຕົ້ນອາຫານ, ນ້ຳດື່ມ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອພ້ອມຄົນຂັບ ແລະ ງົບປະມານຮັບໃຊ້, ອື່ນໆ.
ລາຍລະອຽດມີດັ່ງລຸ່ມນີ້: ສະພາບຜົນກະທົບຢູ່ແຕ່ລະແຂວງມີດັ່ງນີ້:
ແຂວງຄຳມ່ວນ
ນ້ຳຖ້ວມຢູ່ 121 ບ້ານຂອງ 6 ເມືອງ, ມີຄອບຄົວໄດ້ຮັບຜົນກະທົບ 8.300 ຄອບຄົວ, ມີ 25.427 ຄົນ, ຍິງ 13.250 ຄົນ; ເນື້ອທີ່ນາຖືກນ້ຳຖ້ວມ 9.623 ເຮັກຕາ; ເຮືອນເປ່ເພເສຍຫາຍ 2 ຫຼັງ ຢູ່ເມືອງໜອງບົກ ເສົາໄຟຟ້າຫັກຈຳນວນໜຶ່ງ, ເສັ້ນທາງຄົມມະນາຄົມຖືກນ້ຳຖ້ວມຍາວ 36 ກິໂລແມັດ. ຜົນກະທົບທີ່ມີຕໍ່ປະຊາຊົນ ສ່ວນໃຫຍ່ແມ່ນນ້ຳຖ້ວມພື້ນທີ່ການຜະລິດ (ເຂົ້ານາ) ຊຶ່ງບໍ່ໄດ້ມີການຍົກຍ້າຍ, ສະນັ້ນ, ເພື່ອການກຽມພ້ອມຮອງຮັບສຸກເສີນໃນຕໍ່ໜ້າ, ທາງຄະນະກຳມະການປ້ອງກັນ ແລະ ຄວບຄຸມໄພພິບັດແຂວງ ໄດ້ຈັດປະຊຸມສຸກເສີນ ເພື່ອປຶກສາຫາລື ແລະ ກຽມຄວາມພ້ອມ ເພື່ອຮັບມືກັບໄພພິບັດທີ່ອາດຈະເກີດຂຶ້ນ ເປັນຕົ້ນ-ທາງດ້ານກຳລັງພົນ, ພາຫະນະ, ເຄື່ອງຊ່ວຍເຫຼືອ ອື່ນໆ.
ແຂວງສະຫວັນນະເຂດ
ນ້ຳຖ້ວມ 270 ບ້ານຂອງ 10 ເມືອງ ໃນນັ້ນ ຖ້ວມທີ່ຢູ່ອາໄສຂອງປະຊາຊົນ 12 ບ້ານ ໂດຍສະເພາະແມ່ນເມືອງຈຳພອນ; ຄອບຄົວໄດ້ຮັບຜົນກະທົບ 29.006 ຄອບຄົວ, ເສຍຊີວິດ 1 ຄົນ (ຢູ່ເມືອງອາດສະພອນ), ຍົກຍ້າຍ 5 ຄອບຄົວ (ບ້ານດົງ ເມືອງຈຳພອນ); ເນື້ອທີ່ນາຖືກນ້ຳຖ້ວມ 36.818 ເຮັກຕາ; ໜອງປາ 80 ໜອງ, ທາງ 40 ເສັ້ນ ຖືກນ້ຳຖ້ວມ ຂົວ 3 ແຫ່ງ; ໂຮງຮຽນ 14 ແຫ່ງ ໄດ້ຮັບຜົນກະທົບ ໃນນັ້ນ 6 ແຫ່ງຂອງເມືອງຈຳພອນ ກະທົບໜັກບໍ່ສາມາດເປີດສົກຮຽນໄດ້; ໂຮງຮຽນຂອງ 12 ບ້ານ ເມືອງສອງຄອນແມ່ນບໍ່ທັນໄດ້ເປີດສົກຮຽນ ເນື່ອງຈາກສະພາບອາກາດຝົນຕົກລິນ; ສຸກສາລາ 2 ແຫ່ງຖືກນ້ຳຖ້ວມ. ການຊ່ວຍເຫຼືອແກ້ໄຂສຸກເສີນເບື້ອງຕົ້ນຂອງແຂວງ: ໄດ້ນຳໃຊ້ກຳລັງທະຫານ, ຕຳຫຼວດ ເຂົ້າໃນການປ້ານຄູກັນນ້ຳ ແລະ ກັນເຈື່ອນຕາມເສັ້ນທາງ.
ຄວາມຕ້ອງການຮີບດ່ວນສຸກເສີນ: ເຄື່ອງອຸປະໂພກ-ບໍລິໂພກທີ່ຈຳເປັນເຊັ່ນ: ອາຫານແຫ້ງ, ນ້ຳດື່ມ, ກະສອບຊາຍ 50.000 ໜ່ວຍ ເພື່ອເສີມຄູກັນນ້ຳ ແລະ ສ້ອມແປງຫຼັງນ້ຳຫຼຸດລົງ, ຢາວັກຊິນ 2.000 ກັບ, ເຮືອກູ້ໄພສຸກເສີນໃຫ້ແກ່ເມືອງຊົນນະບູລີ ແລະ ງົບປະມານສ້ອມແປງເສັ້ນທາງ ແລະ ຂົວສຸກເສີນ 40 ຕື້ກວ່າກີບ.
ແຂວງອັດຕະປື
ນ້ຳຖ້ວມ 44 ບ້ານຂອງ 5 ເມືອງຄື: ເມືອງສະໜາມໄຊ,ເມືອງ ພູວົງ, ໄຊເສດຖາ, ເມືອງສາມັກຄີໄຊ, ຊານໄຊ ມີ 4.762 ຄອບຄົວ,ມີ 15.720 ຄົນ ປັດຈຸບັນ ແຂວງໄດ້ປະຊຸມຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ ແລະ ໄດ້ສົມທົບກັບກຳລັງປ້ອງກັນປະເທດ ນຳເຮືອຈຳນວນ 12 ລຳ ປະຈຳຢູ່ ແຕ່ລະເມືອງ ເພື່ອຊ່ວຍເຫຼືອປະຊາຊົນອອກຈາກພື້ນທີ່ອັນຕະລາຍ, ເສັ້ນທາງຈາກເຊກອງ ຫາ ອັດຕະປື ມີນ້ຳຖ້ວມທາງ ແລະ ໄຫຼແຮງ ຫຼາຍຈຸດ ເຮັດໃຫ້ບໍ່ສາມາດສັນຈອນໄປມາໄດ້.
ຄະນະກຳມະການປ້ອງກັນ ແລະ ຄວບຄຸມໄພພິບັດແຂວງໄດ້ຈັດກອງປະຊຸມສຸກເສີນ ເພື່ອປຶກສາຫາລື ເພື່ອກຽມພ້ອມຕອບໂຕ້ສຸກເສີນ ຊຶ່ງໃນນັ້ນໄດ້ຮ່ວມກັບເມືອງກຳນົດຈຸດທີ່ສູງ (ຈຸດປອດໄພ) ໃນແຕ່ລະບ້ານ, ມີເຮືອແຮໄວ້ 10 ລຳ ເພື່ອກຽມພ້ອມຊ່ວຍເຫຼືອປະຊາຊົນ ໃນເວລາເກີດໄພພິບັດສຸກເສີນ, ພະແນກ ຮສສ ໄດ້ມີລົດບັນທຸກເຄື່ອງຊ່ວຍເຫຼືອ 2 ຄັນ ແລະ ລົດກະບະ 2 ຄັນ ເພື່ອນຳໃຊ້ເຂົ້າໃນການຂົນເຄື່ອງຮັບໃຊ້ທີ່ຈຳເປັນ, ເຂົ້າສານຈຳນວນ 20 ໂຕນ, ສາດ; ມຸ້ງ; ໝອນ; ເຊື່ອ ແລະ ເຄື່ອງໃຊ້ຄົວເຮືອນ, ເຕັ້ນຄອບຄົວ, ທະຫານ ມີລົດ 10 ຄັນ ແລະ ເຮືອ 2 ລຳ, ກາແດງມີເຮືອ 2 ລຳ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ມີເຮືອ 1 ລຳ; ແຂວງໄດ້ຈັດຊື້ປ໋ອງປາ 100 ແກັດ ເພື່ອແຈກຢາຍເຂດລະ 15 ແກັດ ແລະ ຈະສືບຕໍ່ແຈກຢາຍມື້ຕໍ່ໄປ.
ນອກນີ້ຍັງໄດ້ປະສານສົມທົບກັບບັນດາພະແນກການທີ່ກ່ຽວຂ້ອງຈັດຕັ້ງເຝົ້າລະວັງ ແລະ ລາຍງານສະພາບການຕະຫຼອດ 24 ຊົ່ວໂມງຂອງພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ກອງບັນຊາການ ປກຊ, ປກສ ແຂວງ, ເມືອງເພື່ອ ກຽມພ້ອມກຳລັງຍົກຍ້າຍວັດຖຸອຸປະກອນ ແລະ ຊັບສິນຂອງປະຊາຊົນຈາກບ່ອນຕ່ຳໄປໄວ້ບ່ອນທີ່ປອດໄພ ໃນເວລາເກີດໄພພິບັດສຸກເສີນ.
ແຂວງສາລະວັນ
ນ້ຳຖ້ວມ 148 ບ້ານຂອງ 3 ເມືອງຄື: ເມືອງຄົງເຊໂດນ, ເມືອງວາປີ ແລະ ເມືອງສາລະວັນ, ປະຊາຊົນໄດ້ຮັບຜົນກະທົບ 6.634 ຄອບຄົວ, ຍົກຍ້າຍໄປຢູ່ບ່ອນພັກເຊົາຊົ່ວຄາວຫຼາຍຮ້ອຍຄອບຄົວ, ເນື້ອທີ່ນາ ຖືກນ້ຳຖ້ວມ ຈຳນວນ 10.328 ເຮັກຕາ, ໜອງປາ 868 ໜອງ, ເສັ້ນທາງ 38 ກມ ຖືກນ້ຳຖ້ວມ, ໂຮງຮຽນຖືກນ້ຳຖ້ວມ 10 ແຫ່ງ.
ປັດຈຸບັນອຳນາດການປົກຄອງແຂວງ ແລະ ເມືອງ ກໍຄືຄະນະກຳມະການປ້ອງກັນ ແລະ ຄວບຄຸມໄພພິບັດ ໄດ້ຈັດຕັ້ງກຳລັງເຂົ້າໃຫ້ການຊ່ວຍເຫຼືອປະຊາຊົນທີ່ປອດໄພແຕ່ຍັງພົບຄວາມຫຍຸ້ງຍາກເນື່ອງຈາກນ້ຳໄດ້ເຂົ້າຖ້ວມເປັນບໍລິເວນກວ້າງ ຊຶ່ງຖ້ວມຕົວເມືອງສາລະວັນ, ສຳລັບເມືອງຄົງເຊໂດນ ປະຊາຊົນ ທີ່ຍົກຍ້າຍແມ່ນມາອາໄສຢູ່ສະໂມສອນເມືອງຄົງເຊໂດນຊົ່ວຄາວ.
ແຂວງເຊກອງ
ນ້ຳຖ້ວມ ເມືອງລະມາມ, ເມືອງກະລຶມ, ເມືອງດາກຈຶງ ແລະ ເມືອງທ່າແຕງ ໂດຍສະເພາະແມ່ນເນື້ອທີ່ການຜະລິດ, ພື້ນຖານໂຄງລ່າງຊົນລະປະທານ, ທີ່ຢູ່ອາໄສ, ລະບົບຕາຂ່າຍໄຟຟ້າ, ນ້ຳປະປາ ໄດ້ຮັບຜົນເສຍຫາຍປັດຈຸບັນຍັງບໍ່ສາມາດປະເມີນຜົນເສຍຫາຍໄດ້. ສະພາບຄົມມະນາຄົມດິນເຈື່ອນຖົມທາງເມືອງດາກຈຶງ 7 ຈຸດ, ເສັ້ນທາງເຂົ້າຫາເມືອງກະລຶມຖືກຕັດຂາດ.
ໃນເບືື້ອງຕົ້ນ ໄດ້ເຂົ້າຊ່ວຍກອບກູ້ເອົາປະຊາຊົນທີ່ຕົກຄ້າງຢູ່ຕາມບ້ານ, ເຮືອນ ແລະ ຖຽງ ພ້ອມທັງນຳໃຊ້ກົນຈັກເຂົ້າຊ່ວຍໃນການຊວ້ານດິນອອກຈາກເສັ້ນທາງ, ທໍ່ນ້ຳອຸດຕັນ. ນອກຈາກນີ້, ແຂວງຍັງໄດ້ແນະນຳໃຫ້ເມືອງກະລຶມ ນຳໃຊ້ພາຫະນະ, ອຸປະກອນ ທີ່ມີຢູ່ໄປກ່ອນ ເນື່ອງຈາກບໍ່ສາມາດນຳພາຫະນະເຂົ້າໄປຊ່ວຍໄດ້ເທື່ອ, ພ້ອມນີ້ ກໍໄດ້ປະສານບັນດາບໍລິສັດ ທີ່ຢູ່ໃກ້ເຂົ້າຊ່ວຍເພື່ອສ້ອມແປງເສັ້ນທາງດັ່ງກ່າວ.
ແຂວງຈຳປາສັກ
ນ້ຳຖ້ວມ 205 ບ້ານ ໃນ 10 ເມືອງຂອງແຂວງຈຳປາສັກ, ປະຊາຊົນຖືກຜົນກະທົບ 5.505 ຄອບຄົວ, ເສຍຊີວິດ 1 ຄົນ, ສູນຫາຍ 2 ຄົນ (ເມືອງປະທຸມພອນ), ປັດຈຸບັນນ້ຳເຊໂດນ ໄດ້ໄຫຼເຂົ້າຖ້ວມບາງເຂດຂອງ ນະຄອນປາກເຊ ຊຶ່ງເຫັນວ່າມີຄວາມຮຸນແຮງ ເນື່ອງຈາກນ້ຳຂອງໄດ້ໄຫຼຍູ້ເຊໂດນ, ປັດຈຸບັນໄດ້ນຳໃຊ້ກຳລັງຊາວໜຸ່ມ, ທະຫານ, ຕຳຫຼວດ ໄດ້ນຳໃຊ້ເຮືອໄປຍົກຍ້າຍ ແລະ ກອບກູ້ເອົາປະຊາຊົນທີ່ຄ້າງຢູ່ຕາມເຮືອນອອກມາຢູ່ບ່ອນປອດໄພ, ໃນນີ້, ລວມມີປະຊາຊົນໃນ 21 ບ້ານ ຂອງນະຄອນປາກເຊ, 13 ບ້ານ ຂອງເມືອງຊະນະສົມບູນ, 18 ບ້ານຂອງເມືອງໂພນທອງ, 1 ຄອບຄົວຂອງເມືອງຈຳປາສັກ. 3 ບ້ານ ຂອງເມືອງສຸຂຸມາ ແລະ ປະຊາຊົນຈຳນວນໜຶ່ງຂອງເມືອງປະທຸມພອນ.
ເນື່ອງຈາກວ່າ ນ້ຳຖ້ວມ ກວມເອົາຫຼາຍບ້ານ ເຮືອທີ່ມີ ແລະ ຜູ້ຂັບເຮືອບໍ່ພຽງພໍ ຊຶ່ງເຮັດໃຫ້ການເຂົ້າຊ່ວຍປະຊາຊົນຍັງຫຼ້າຊ້າ ປະຊາຊົນຍັງລໍຖ້າກຳລັງເຂົ້າຊ່ວຍ ເພື່ອຍົກຍ້າຍໄປສູ່ບ່ອນທີ່ປອດໄພ.
(ຂ່າວ: ຄຳເຮືອງ)