ນາຍົກລັດຖະມົນຕີເຄື່ອນໄຫວຢ້ຽມຢາມປະຊາຊົນ ທີ່ໄດ້ຮັບ ຜົນກະທົບຈາກໄພນ້ຳຖ້ວມຢູ່ເມືອງຄົງເຊໂດນ


...

09.09.2019 11:35     

   (ຂປລ). ໃນວັນທີ 7 ກັນຍາ 2019 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ເມືອງຄົງເຊໂດນ ແຂວງສາລະວັນ ພ້ອມທັງ ນຳເອົາເງິນຈຳນວນ 400 ລ້້ານກີບ ມາມອບໃຫ້ອຳນາດການປົກຄອງແຂວງສາລະວັນ ກໍຄື ທ່ານ ສີສຸວັນ ວົງຈອມສີ ເຈົ້າແຂວງສາລະວັນ ເພື່ອນຳໄປຊ່ວຍເຫລືອບັນເທົາທຸກໃຫ້ແກ່ປະຊາຊົນ ຢູ່ບັນດາເມືອງ ທີ່ໄດ້ຮັບຜົນກະທົບຈາກໄພນ້ຳຖ້ວມ ເປັນຕົ້ນເມືອງຄົງເຊໂດນ, ເມືອງວາປີ ແລະ ເມືອງສາລະວັນ.
ໂອກາດດັ່ງກ່າວ, ທ່ານ ບຸນປອນ ອາສາພິພັກ ເຈົ້າ ເມືອງໆຄົງເຊໂດນ ໄດ້ລາຍງານ ໂດຍຫຍໍ້ກ່ຽວກັບຜົນກະທົບຈາກໄພນ້ຳຖ້ວມໃນຄັ້ງນີ້ ຊຶ່ງບ້ານທີ່ໄດ້ຮັບຜົນກະທົບຈາກ ໄພນ້ຳຖ້ວມ ມີທັງໝົດ 71 ບ້ານ, 10.147 ຄອບຄົວ, ກວມເນື້ອທີ່ທັງໝົດ 16.900 ເຮັກຕາ ໃນນັ້ນ ເນື້ອທີ່ກະສິກຳ 15.300 ເຮັກຕາ, ໜອງປາຖືກຖ້ວມ 650 ໜອງ, ເນື້ອທີ 52 ເຮັກຕາ, ໂຄງການຊົນລະປະທານ 33 ແຫ່ງ, ເຮືອໂປມຈັກນ້ຳຊົນລະປະທານຫຼົ້ມ 1 ລຳ, ສຳນັກງານຫ້ອງການລັດ ຖ້ວມ 8 ຫ້ອງການ, ເສັ້ນທາງມີ16 ເສັ້ນ ຍາວ 180 ກມ, ຖືກຖ້ວມ 120 ກມ, ສຳລັບທາງ 13 ໃຕ້ ລວງຍາວທັງໜົດແຕ່ ເມືອງຄົງຍາວ 32 ກມ, ຖືກນ້ຳຖ້ວມ ປະມານ 19 ກມ, ຍັງ 13 ກມ ທາງເຂົ້າຫາແຕ່ລະບ້ານຖືກຕັດຂາດ ແລະ ອື່ນໆ. ຕໍ່ກັບບັນຫາດັ່ງກ່າວ, ອຳນາດການປົກຄອງບ້ານ, ເມືອງ, ແຂວງ ກໍໄດ້ສຸມທຸກກຳລັງ ໃນການເຂົ້າຊ່ວຍເຫຼືອພໍ່ແມ່ປະຊາຊົນ ທັງປະຊາສຳພັນໃຫ້ແຕ່ລະບ້ານຍົກຍ້າຍຂຶ້ນທີ່ສູງບ່ອນທີ່ມີຄວາມປອດໄພ ໂດຍໄດ້ຮັບການຊ່ວຍເຫຼືອຈາກ ທະຫານກອງພົນທີ 4, ທີ 5, ເມືອງລະຄອນເພັງ ບໍລິສັດຫ້າງຮ້ານ, ຄູບາອາຈານ, ມູນນິທິຊ່ວຍເຫຼືອ ແລະ ພາກສ່ວນອື່ນໆ, ພ້ອມນັ້ນ ຍັງໄດ້ຕັ້ງຈຸດພັກເຊົາສຸກເສີນ ຈຳນວນ 35 ຈຸດ ເພື່ອໃຫ້ປະຊາຊົນເຂົ້າມາພັກອາໄສຊົ່ວຄາວ, ໂດຍມີສູນບັນຊາ ຢູ່ 2 ຈຸດໃຫ່ຍຄື: ຈຸດຫ້ວຍເຊົາ ແລະ ຈຸດຫ້ອງວ່າການປົກຄອງເມືອງ. ໂອກາດດັ່ງກ່າວ, ທ່ານ ທອງລຸນ ສີສຸລິດ ຮຽກຮ້ອງໃຫ້ອຳນາດການປົກຄອງບ້ານ, ເມືອງ, ແຂວງ ກໍຄື ພາກສ່ວນທີ່ກ່ຽວຂ້ອງ ເລັ່ງຟື້ນຟູຊີວິດການເປັນຢູ່ຂອງປະຊາຊົນ ໃຫ້ດີຂຶ້ນເທື່ອລະກ້າວ ແລະ ໃຫ້ເອົາໃຈໃສ່ເຝົ້າລະວັງ ການແຜ່ ລະບາດຂອງພະຍາດຕ່າງໆ, ຮີບຮ້ອນແກ້ໄຂບັນຫານ້ຳສະອາດ ແນໃສ່ເຮັດໃຫ້ປະຊາຊົນໄດ້ດື່ມ, ໄດ້ຊົມໃຊ້ນ້ຳທີ່ສະອາດ ຫຼີກລ່ຽງບໍ່ໃຫ້ເກີດການແຜ່ລະບາດຂອງພະຍາດຖອກທ້ອງ ແລະ ອື່ນໆ. ພາຍຫັຼງ ນ້ຳຫຼຸດລົງເປັນປົກກະຕິ ໃຫ້ຮີບຮ້ອນລົງມື ກໍສ້າງປັບປຸງປົວແປງພື້ນຖານໂຄງລ່າງຊົນ ລະປະທານ, ເສັ້ນທາງ ເພື່ອຮັບປະກັນສະບຽງອາຫານ ແລະ ສະດວກໃນການ ເຂົ້າເຖິງ. ພ້ອມນັ້ນ, ທ່ານນາຍົກລັດຖະມົນຕີ ຍັງໄດ້ ຮຽກຮ້ອງໃຫ້ປະຊາຊົນ ໃຫ້ ເອົາໃຈໃສ່ເບິ່ງແຍງ, ຮັກສາສຸ ຂະພາບຂອງຕົນເອງໃຫ້ດີ, ໃຫ້ມີສ່ວນຮ່ວມກັບອຳນາດການປົກຄອງທຸກຂັ້ນ, ປັບປຸງປົວແປງສະພາບແວດລ້ອມອ້ອມເຮືອນຂອງຕົນ ໃຫ້ກັບມາສູ່ສະພາບປົກກະຕິໂດຍໄວ.