ອັດຕະປື ເອົາໃຈໃສ່ຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ


...

09.09.2019 11:36     

   ນັບແຕ່ວັນທີ 2 ກັນຍາ 2019 ເປັນຕົ້ນມາ ໄດ້ມີສະ ພາບຝົນຕົກໜັກ ຊຶ່ງຊາວແຂວງ ອັດຕະປືໄດ້ຮັບຜົນກະທົບໜັກຈາກພາຍຸດີເປຣເຊິນ ທີ່ເພີ່ມກໍາລັງແຮງຂຶ້ນເປັນພາຍຸໝຸນເຂດຮ້ອນ ແລະ ພັດຜ່ານພາກກາງ ແລະ ພາກໃຕ້ ໃນຕອນເຊົ້າ ວັນທີ 3 ກັນຍາ 2019 ຕາມແຈ້ງການຂອງກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ນັບແຕ່ນັ້ນມາ ຊາວແຂວງອັດຕະປື ກໍໄດ້ຮັບຜົນກະທົບໜັກ, ລະດັບນໍ້າເຊກອງ ເພີ່ມຂຶ້ນເລື້ອຍໆ ເຮັດໃຫ້ແມ່ນໍ້າທຸກສາຍມີລະດັບນໍ້າເພີ່ມຂຶ້ນໄຫຼເຂົ້າເຮືອນຊານບ້ານຊ່ອງ, ໄຮ່ນາຮົ້ວສວນ, ສໍານັກງານຫ້ອງການຕ່າໆໆໃນທົ່ວແຂວງ.
ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງ ອັດຕະປື ທັງເປັນປະທານຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນແຂວງ ໄດ້ໃຫ້ສໍາພາດໃນຕອນບ່າຍຂອງວັນ 5 ກັນຍາ ນີ້ວ່າ: ທົ່ວແຂວງອັດຕະ ປື ມີ 4 ເມືອງທີ່ໄດ້ຮັບຜົນກະທົບເຊັ່ນ: ເມືອງສາມັກຄີໄຊ ມີ 19 ບ້ານ, ມີ 1.300 ຄອບຄົວ, ເມືອງໄຊເສດຖາ ມີ 6 ບ້ານ, ມີ 1.929 ຄອບຄົວ,ເມືອງພູວົງ ມີ 11 ບ້ານ, ມີ 1.334 ຄອບຄົວ ແລະ ເມືອງສະໜາມໄຊ ມີ 11 ບ້ານ, ມີ 341 ຄອບຄົວ. ສ່ວນສະພາບການຊ່ວຍເຫຼືອສຸກເສີນ, ຄະນະພັກ, ອໍານາດການປົກຄອງແຂວງໄດ້ກະກຽມຕະຫຼອດ 24 ຊົ່ວໂມງ, ໃນແຕ່ລະເມືອງ ໄດ້ມີເຮືອ ແລະ ກໍາລັງຄົນ ເພື່ອໃຫ້ການຊ່ວຍເຫຼືອປະຈໍາຢູ່ແຕ່ລະຈຸດ ແລະ ແຕ່ລະເມືອງ ແລະ ສາມາດເກັບກູ້ຊ່ວຍເຫຼືອຂົນແຮງງານຈໍານວນ 125 ຄົນ, ອອກຈາກສວນກ້ວຍ ບໍລິສັດຮ່ວາງແອັງ ຢາລາຍ ຍ້າຍໄປຢູ່ບ່ອນທີ່ປອດໄພ, ຢູ່ບ້ານໜອງແຂ້ໄດ້ຍ້າຍປະຊາຊົນ 3 ຄອບຄົວ ໄປຢູ່ຈຸດຫຼົບໄພນາຕາຫຼວງ, ບ້ານໂພນສະອາດ ໄດ້ຍົກຍ້າຍປະຊາຊົນຈໍານວນ 20 ຄອບຄົວ ໄປຢູ່ຈຸດນາລ໋ອງກ໋ອງ, ໄດ້ຍົກຍ້າຍປະຊາຊົນຈໍານວນ 85 ຄອບຄົວ ຢູ່ສູນພັກຫາດຍາວ ໄປຢູ່ສູນພັກຊົ່ວຄາວດົງບາກ ຈໍານວນ 46 ຄອບຄົວ ແລະ ບ້ານແທ ຄຸ້ມທ່າອວນ ໄດ້ຍົກຍ້າຍປະຊາຊົນ ຈໍານວນ 85 ຄອບຄົວໄປຢູ່ບ້ານດອນບົກ ແລະ ສູນພັກຊົ່ວຄາວດົງບາກ ນອກຈາກນັ້ນ, ຍັງໄດ້ອອກແຈ້ງການເພີ່ມເຕີມ ເຖິງເຈົ້າເມືອງ 5 ເມືອງ, ອໍານວຍການບໍລິສັດຕະຫຼອດຮອດຫົວ ໜ່ວຍທຸລະກິດທົ່ວແຂວງຕໍ່ກັບການຊ່ວຍເຫຼືອພະນັກງານ, ກໍາມະກອນຂອງຕົນທີ່ປະສົບໄພພິບັດນໍ້າຖ້ວມ ພ້ອມທັງໄດ້ລົງຊ່ວຍເຫຼືອໃຫ້ແກ່ປະຊາຊົນທີ່ໄດ້ຮັບຜົນກະທົບ ໂດຍສະ ເພາະການຕອບສະໜອງດ້ານສະບຽງອາຫານບໍລິໂພກ-ອຸ ປະໂພກ ເປັນຕົ້ນ ນໍ້າດື່ມ 618 ແກັດ, ປາກະປ໋ອງ 618 ແກັດ, ເຂົ້າສານ 100 ກິໂລ, ຄິດເປັນມູນຄ່າປະມານ 119.190.000 ກີບ.
ດ້ານລະບົບການຈັດຕັ້ງ: ໄດ້ກໍານົດຈຸດປະສານງານຢູ່ພະແນກແຮງງານສະຫວັດດີການ-ສັງຄົມແຂວງ, ໃນນີ້ແຕ່ງ ຕັ້ງຄະນະຮັບຜິດຊອບລວມ, ຄະນະຮັບຜິດຊອບເຮືອ, ຄະນະຮັບຜິດຊອບເຄື່ອງ, ຄະນະຮັບຜິດຊອບຂໍ້ມູນຂ່າວສານຕ່າງໆ, ຄະນະປະ ສານງານ ແລະ ແຕ່ງກິນ, ຄະນະຮັບຜິດຊອບເສດຖະກິດ ແລະ ພາຫະນະ ໂດຍໄດ້ສົມທົບກັບເມືອງ, ແຕ່ງ ຕັ້ງບັນດາພະແນກການກ່ຽວ ຂ້ອງສະເພາະເປັນຄະນະໜຶ່ງໄປປະຈໍາຢູ່ແຕ່ລະເມືອງ ແລະ ໄດ້ຮັບເງິນຈາກແຂວງ ເພື່ອບໍ ລິຫານຮັບໃຊ້ ຈໍານວນ 300 ລ້ານກີບ, ມີເຮືອແຮໄວ້ປະຈໍາ ຈໍານວນ 10 ລໍາ, ມີເຂົ້າສານ 20 ໂຕນ ເພື່ອຊ່ວຍເຫຼືອ.
ທ່ານ ອຸ່ນຫຼ້າ ໄຊຍະສິດ ຍັງຢໍ້າຕື່ມວ່າ: ມາຮອດປັດຈຸບັນ ລະດັບນໍ້າເລີ່ມຢູ່ຕົວ ແລະ ຄ່ອຍໆຫຼຸດລົງຕາມລຳດັບ ສະນັ້ນ, ອໍານາດການປົກຄອງແຂວງ, ເມືອງ ຍັງໄດ້ວາງທິດທາງແຜນການແກ້ໄຂບັນຫາຕ່າງໆໄລຍະເລັ່ງດ່ວນ ໂດຍສະເພາະສືບຕໍ່ຊ່ວຍເຫຼືອປະຊາຊົນ ຈໍານວນ 6 ບ້ານ ເມືອງໄຊເສດຖາ, ສືບຕໍ່ຊ່ວຍເຫຼືອປະຊາຊົນ ເມືອງສະໜາມໄຊ, ສືບຕໍ່ຊ່ວຍເຫຼືອມອບເຄື່ອງສົງເຄາະໃຫ້ແກ່ປະ ຊາຊົນຈໍານວນ 11 ບ້ານ, ເມືອງສາມັກຄີໄຊ ແລະ ສືບຕໍ່ເກັບກໍາຂໍ້ມູນປະເມີນຜົນເສຍຫາຍດ້ານເສດຖະກິດ, ສັງຄົມ ແລະ ສິ່ງແວດລ້ອມ ທີ່ໄດ້ຮັບຜົນເສຍຫາຍຕ່າງໆໃນທົ່ວແຂວງພາຍຫຼັງນໍ້າຫຼຸດລົງ.
(ຂ່າວ: ຊິບປະໄຊ)