ທ່ານ ສົມດີ ດວງດີ ລົງຢ້ຽມຢາມ ຜູ້ປະສົບໄພນ້ຳຖ້ວມບ້ານລະຫານ້ຳ


...

10.09.2019 8:12     

   ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນ ຕີກະຊວງການເງິນ ທັງເປັນຜູ້ຊີ້ນໍາວຽກງານເສດຖະກິດໄດ້ລົງຢ້ຽມຢາມຊຸກຍູ້ ເພື່ອເປັນຂວັນກຳລັງໃຈໃຫ້ປະຊາຊົນຜູ້ປະສົບໄພນໍ້າຖ້ວມຢູ່ແຂວງພາກກາງ-ແຂວງພາກໃຕ້ ເມື່ອວັນທີ 6 ກັນຍາ ຜ່ານມາ ພ້ອມທັງໄດ້ມອບເຄື່ອງຊ່ວຍເຫຼືອບັນເທົາທຸກເບື້ອງຕົ້ນໃຫ້ແກ່ຜູ້ປະສົບໄພນໍ້າຖ້ວມຈຳນວນໜຶ່ງ. ການລົງໄປຢ້ຽມຢາມ ແລະ ຊຸກຍູ້ ເພື່ອເປັນຂວັນກຳລັງໃຈແກ່ຜູ້ປະສົບໄພນໍ້າຖ້ວມຢູ່ແຂວງພາກກາງ-ແຂວງພາກໃຕ້ ໃນຄັ້ງນີ້ແມ່ນການຮ່ວມແຮງຮ່ວມໃຈກັບຄອບຄົວ, ເພື່ອນ ມິດສະຫາຍຈຳນວນໜຶ່ງພ້ອມທັງໄດ້ມອບວັດຖຸປັດໄຈ, ເຄື່ອງອຸປະໂພກ-ບໍລິໂພກຈໍານວນໜຶ່ງທີ່ຈໍາເປັນເຊັ່ນ: ນໍ້າດື່ມ, ຢາປົວພະຍາດ, ອາຫານແຫ້ງ, ແລະ ອື່ນໆລວມມູນຄ່າທັງໝົດປະມານ 100 ລ້ານກີບ, ນອກນັ້ນຍັງໄດ້ປະກອບສ່ວນເຂົ້າໃນການຊ່ວຍບັນເທົາທຸກຂອງປະຊາຊົນຜູ້ປະສົບໄພນໍ້າຖ້ວມຢູ່ບ້ານລະຫານໍ້າ ເມືອງສອງຄອນ ແຂວງສະຫວັນນະເຂດ ນຳອີກດ້ວຍ. ດັ່ງທີ່ຮູ້ນຳກັນແລ້ວວ່າໃນທ້າຍເດືອນສິງຫາ ຫາ ຕົ້ນເດືອນກັນຍາ 2019 ເຂດພາກກາງ ແລະ ພາກໃຕ້ຂອງ ສປປ ລາວ ໄດ້ຮັບຜົນກະທົບຈາກພາຍຸດີ ເປຣເຊິນ (Depression) ເຂົ້າທາງພາກໃຕ້ຂອງ ສປປ ລາວ ຊຶ່ງໄດ້ເຮັດໃຫ້ລະດັບນໍ້າຂອງ ແລະ ນໍ້າເຊຂຶ້ນສູງສຸດໃນລະດັບເປັນໄພພິບັດທາງທຳມະຊາດທີ່ຮຸນແຮງ ແລະ ສົ່ງຜົນໃຫ້ເກີດນໍ້າຖ້ວມ ໃນຫຼາຍແຂວງພາກໃຕ້ສ້າງຄວາມເສຍຫາຍໃຫ້ແກ່ຊັບສິນຂອງປະຊາຊົນກໍຄືການດຳລົງຊີວິດ ຢູ່ບັນດາແຂວງພາກກາງ-ແຂວງພາກໃຕ້ ສປປ ລາວ. ອີງຕາມການລາຍງານ ຂອງຄະນະກຳມະການສະ ເພາະກິດແກ້ໄຂໄພພິບັດແຫ່ງຊາດ ໃນເບຶ້ອງຕົ້ນສະເພາະແຂວງເຊກອງໄດ້ຮັບຜົນເສຍຫາຍລວມທັງໝົດປະມານ 90 ຕື້ກີບ ຊຶ່ງປະກອບມີເກືອບ 150 ບ້ານລວມມີປະຊາຊົນທີ່ໄດ້ຮັບຜົນກະທົບ 90.000 ຄົນ. ສ່ວນແຂວງຈໍາປາສັກແຈ້ງວ່າບ້ານທີ່ຖືກຜົນກະທົບທັງໝົດເກືອບ 400 ບ້ານມີປະມານ 37.000 ຄອບຄົວ, ກວມເອົາພົນລະເມືອງຫຼາຍກວ່າ 170.000 ຄົນ.