ທ່ານ ລຽນ ທີແກ້ວ ລົງຊຸກຍູ້ການຜະລິດ ເປັນສິນຄ້າ ທີ່ເມືອງແກ່ນທ້າວ


...

11.09.2019 9:19     

   ທ່ານ ລຽນ ທີແກ້ວ ລັດ ຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ການຜະລິດເປັນສິນຄ້າ ຢູ່ເມືອງແກ່ນທ້າວ ແຂວງໄຊຍະບູລີ ໃນວັນທີ 7 ກັນຍາຜ່ານມາ ໂດຍມີທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ ເປັນຜູ້ພາທາງ ແລະ ໄດ້ຮັບການຕ້ອນຮັບຈາກທ່ານ ອໍາຄາ ລັດສະໝີ ວ່າການເຈົ້າເມືືອງແກ່ນທ້າວ ພ້ອມດ້ວຍຄະນະ ຊຶ່ງໃນການມາຢ້ຽມຢ້າມຄັ້ງນີ້ ໂດຍມີຈຸດປະສົງເພື່ອຊຸກຍູ້ສົ່ງເສີມການຜະລິດເປັນສິນຄ້າຢູ່ເມືອງແກ່ນທ້າວ ໂດຍສະເພາະການລ້ຽງສັດໃຫຍ່ແບບຄອບຄົວ ແລະ ລ້ຽງແບບເປັນຟາມ ຂອງຊາວກະສິກອນ ກໍຄືນັກທຸລະກິດເມືອງແກ່ນທ້າວ, ນໍາພານັກລົງທຶນໃນກຸ່ມຜູ້ສົ່ງອອກໄດ້ເຫັນ ຕົວຈິງການປູກ-ການລ້ຽງຢູ່ເມືອງແກ່ນທ້າວ ທີ່ເລີ່ມມີໜໍ່ແໜງອັນໃໝ່ຊຶ່ງທ່ານ ລຽນທີແກ້ວ ພ້ອມດ້ວຍຄະນະໄດ້ໄປເບິ່ງສວນຫຍ້າລ້ຽງສັດຢູ່ເຂດບ້ານຫ້ວຍຫຼອດ, ຈາກນັ້ນໄດ້ໄປເບິ່ງການລ້ຽງງົວຂຸນ, ຢ້ຽມຢາມໂຮງອົບສາລີຢູ່ບ້ານເມືອງໝໍ, ໄປຢ້ຽມຢາມດ່ານສາກົນຂົວມິດຕະພາບນໍ້າເຫືອງລາວ-ໄທ ກ່ອນຈະເດີນ ທາງກັບຄືນນະຄອນຫຼວງວຽງຈັນ. ເມືອງແກ່ນທ້າວເປັນເມືອງໜຶ່ງຂອງແຂວງໄຊຍະບູລີທີ່ມີເນື້ອທີ່ປູກຫຍ້າລ້ຽງສັດ 29.000 ກວ່າເຮັກຕາ, ມີ 6.000 ກວ່າຕອນ. ໃນນີ້, ຫຍ້າພັນ 27.000 ກວ່າເຮັກຕາ, ມີ 5.000 ກວ່າຕອນ, ສວນຫຍ້າທໍາມະຊາດ 1.000 ກວ່າເຮັກຕາ, ມີສັດລ້ຽງປະເພດງົວ 62.000 ກວ່າໂຕ, ຄວາຍ 11.400 ກວ່າໂຕ, ມີການລ້ຽງງົວແບບເປັນຟາມ 15 ຄອບຄົວ, ລ້ຽງຄວາຍ 1 ຄອບຄົວ. ນອກຈາກ ການປູກຫຍ້າລ້ຽງສັດແລ້ວປະຊາຊົນຍັງໄດ້ປູກພືດເປັນສິນຄ້າໃນເນື້ອທີ່ 20.300 ກ່ວາເຮັກຕາ ເດັ່ນກ່ວາໝູ່ແມ່ນມັນຕົ້ນ 14.000 ກວ່າເຮັກຕາ ແລະ ສາລີ 3.700 ກວ່າເຮັກຕາ. (ຂ່າວ: ເຕ ພິລາຄູນ)