ສວນຊາ 36 ຊຸກຍູ້ໃຫ້ປະຊາຊົນຫຼຸດພົ້ນ ອອກຈາກຄວາມທຸກຍາກ


...

02.10.2019 9:48     

   ສວນຊາ 36 ແມ່ນພາກ ສ່ວນໜຶ່ງຂອງຜົນສໍາເລັດໃນການຮ່ວມມືລາວ ແລະ ຈີນ ໃນການຊຸກຍູ້ໃຫ້ປະຊາຊົນປູກຊາ, ເກັບຊາ ແລະ ນັກທຸລະກິດຈີນຊ່ວຍເປັນການຕະຫຼາດໃຫ້, ສວນດັ່ງກ່າວຕັ້ງຢູ່ພາກໃຕ້ຂອງປະເທດລາວ ທີ່ເມືອງປາກຊ່ອງ ແຂວງຈໍາປາສັກ ເຂດພູພຽງບໍລະເວນ ເປັນເຂດດິນພູເຂົາໄຟໃນເມື່ອກ່ອນ ຊຶ່ງເປັນເຂດດິນທີ່ເໝາະສົມທີ່ສຸດ ໃນການປູກຊາ ແລະ ຢູ່ໃນເຂດພູມອາກາດຊຸ່ມເຢັນ ສົ່ງຜົນໃຫ້ຊາມີລົດ ຊາດດີເປັນພິເສດ, ມີຄຸນນະພາບດີ ແລະ ມີຊື່ສຽງເພາະເປັນຊາ ທີ່ປອດສານພິດ (ຊາອໍແກນິກ), ໃນດ້ານການຫຸ້ມຫໍ່ຜະລິດຕະພັນຊານີ້ ກໍໄດ້ມີການອອກແບບ ທີ່ມີເອກະລັກທາງ ດ້ານວັດທະນະທໍາຂອງປະເທດລາວ. ເມື່ອວັນທີ 30 ກັນຍາທີ່ຜ່ານມາ, ທ່ານ ຢ້ຽນ ຢົ່ງ ຮອງປະທານບໍລິສັດ ລາວທຣີຊິກ ມາເນີ ການຄ້າ ຂາເຂົ້າ-ຂາອອກ ຈໍາກັດຜູ້ດຽວ ( Lao Three Six Manor Trade Export-Import Co.Ltd), ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນວ່າ: ທາງບໍລິສັດ ໄດ້ລົງທຶນກໍ່ສ້າງລະບົບໂຮງງານຜະລິດຊາທີ່ສວນຊາ 36 ປາກຊ່ອງເພື່ອຮັກສາໄວ້ ຕົ້ນຊາທ້ອງ ຖິ່ນ ຂອງປະຊາຊົນລາວທີ່ມີມານັບພັນປີ ແລະ ພັດທະນາສວນຊາ ເພື່ອໃຫ້ໄດ້ໃບຊາຄຸນນະພາບດີ ເສີມສ້າງຜະລິດຕະພັນທ້ອງຖິ່ນຂອງລາວ. ສວນຊາ 36 ເປັນບໍລິສັດດຽວໃນລາວທີ່ຜະລິດຊາແບບປະສົມປະສານນັບແຕ່ຂັ້ນຕອນການປູກ, ການເກັບ, ການຜະລິດ ຈົນຮອດການຈໍາໜ່າຍ ສໍາລັບການຈໍາໜ່າຍແມ່ນສົ່ງໄປປະເທດໄທ, ຈີນ ແລະ ຝຣັ່ງ ລາຄາແມ່ນເລີ່ມຕົ້ນ 10-600ໂດລາຕໍ່ 1 ກ່ອງ.
ທ່ານ ຢ້ຽນ ຢົ່ງ ໄດ້ກ່າວຕື່ມອີກວ່າ: ສວນຊາ 36 ມີເນື້ອທີ່ 150 ເຮັກຕາ ປະກອບດ້ວຍຕົ້ນຊາພັນປີ, ຕົ້ນຊາຮ້ອຍປີ, ຕົ້ນໄມ້ກິນໝາກ ພ້ອມດ້ວຍຕົ້ນກາເຟ ແລະ ທາງບໍລິສັດຍັງສືບຕໍ່ຈະຂະຫຍາຍເນື້ອທີ່ກະສິກໍາເພີ່ມອີກໃນຕໍ່ໜ້າ. ບໍລິສັດໄດ້ພະ ຍາຍາມຮັກສາຄວາມສະອາດ ແລະ ສິ່ງແວດລ້ອມ ເພື່ອໃຫ້ເຂດນີ້ເປັນເຂດນິເວດວິທະຍາ ສີ ຂຽວຂອງປະເທດລາວ, ເປັນໜ້າຕາຂອງ ສປປ ລາວ, ສວນຕົ້ນຊາບູຮານ 36 ໄດ້ເປັນໂຕເຊື່ອມໂຍງໃນການປະສົມປະສານເຕັກນິກການຜະລິດຊາທໍາມະຊາດບໍລິສຸດ ລາວ-ຈີນ ໃຫ້ກ້າວໜ້າຄຽງຄູ່ກັນໄປ ແລະ ຜະລິດຕະພັນຊາຂອງສວນຊາ 36 ຍັງໄດ້ຜ່ານການກວດສອບຄຸນນະພາບຊາລະດັບສາກົນອີກດ້ວຍ. ຜະລິດຕະພັນຊາສວນ 36 ຍັງເປັນສ່ວນໜຶ່ງຂອງຜະລິດຕະພັນລາວທີ່ລັດຖະບານ ໄດ້ເລືອກໃຫ້ເປັນຂອງຂວັນມອບໃຫ້ແກ່ຄະນະຜູ້ແທນປະເທດເພື່ອນມິດທີ່ມາຢ້ຽມຢາມ ສປປ ລາວ ຫຼື ເອົາໄປຕ້ອນຜູ້ນໍາ ຕ່າງປະເທດ. ພິເສດສວນຊາດັ່ງກ່າວໄດ້ພະຍາຍາມນໍາພາໃຫ້ປະຊາຊົນທ້ອງຖິ່ນຫຼຸດພົ້ນອອກຈາກຄວາມທຸກຍາກ, ສົ່ງເສີມການພັດທະນາເສດຖະກິດ ແລະ ສັງຄົມ ຂອງທ້ອງຖິ່ນຢ່າງຮອບດ້ານ, ສ້າງຮາກຖານອຸດສາຫະກໍາໃນທ້ອງຖິ່ນ ພ້ອມທັງປັບປຸງສະພາບການພັດທະນາສັງຄົມໃນທ້ອງຖິ່ນ ເພື່ອໃຫ້ຊາປາກຊ່ອງເປັນທີ່ຊ່າລືໄປທົ່ວລາວ, ຈີນ ແລະ ທົ່ວໂລກ. ພິເສດປີນີ້ ແມ່ນໄດ້ຮັບຄວາມສົນໃຈຫຼາຍກວ່າປີຜ່ານ ມາ ຍ້ອນຍອດຂາຍເພີ່ມຂຶ້ນຕໍ່ເນື່ອງ ແລະ ເປັນປີທີ 2 ທີ່ໄດ້ເຂົ້າຮ່ວມງານວາງສະແດງສິນຄ້າຈີນອາຊຽນ (Expo) ທີ່ນະຄອນໜານໜິງ ແຂວງກວາງຊີ ສປ ຈີນ.
(ຂ່າວ: ຍຸພິນທອງ)