ເມືອງພຽງ ນຳໃຊ້ເຕັກນິກທັນສະໄໝເຂົ້າໃນການຜະລິດ


...

03.10.2019 9:45     

   ຕະຫຼອດໄລຍະຜ່ານມາ ຄະນະພັກ, ຄະນະຫ້ອງການກະສິກຳ ແລະ ປ່າໄມ້ ເມືອງພຽງ ແຂວງໄຊຍະບູລີ ແມ່ນໄດ້ສຸມໃສ່ນຳພາຈັດຕັ້ງຜັນຂະຫຍາຍແນວທາງນະໂຍບາຍຂອງພັກໂດຍສະເພາະສຸມໃສ່ 2 ເປົ້າໝາຍໃຫຍ່ຄື: ຄ້ຳປະກັນຄວາມໝັ້ນຄົງທາງສະບຽງອາຫານ ແລະ ສົ່ງເສີມການຜະລິດກະ ສິກຳເປັນສິນຄ້າ ຕິດພັນກັບການສ້າງມູນຄ່າເພີ່ມຂອງດິນ ໂດຍອີງຕາມສະພາບເງື່ອນໄຂ, ທ່າແຮງ, ຄວາມເປັນຈິງຂອງເມືອງເຊັ່ນ: ທ່າແຮງທາງດ້ານທີ່ຕັ້ງ, ທາງດ້ານຊັບພະຍາກອນທຳມະຊາດ, ສະພາບດິນຟ້າອາກາດ, ການເຊື່ອມໂຍງທາງດ້ານການຕະຫຼາດ ແລະ ມູນ ເຊື້ອດຸໝັ່ນໃນການຜະລິດຂອງປະຊາຊົນ.
    ທ່ານ ບົວວັນ ແສງຈັນ ເລຂາຄະນະພັກຮາກຖານ ຫົວໜ້າຫ້ອງ ການກະສິກຳ ແລະ ປ່າໄມ້ເມືອງ ພຽງ ໄດ້ປະກອບຄໍາເຫັນຕໍ່ກອງປະຊຸມໃຫຍ່ ຄັ້ງທີ VIII ຜູ້ແທນອົງຄະນະພັກເມືອງຜ່ານມານີ້ວ່າ: ເພື່ອຍູ້ແຮງຂະບວນການຜະ ລິດນັ້ນ, ຫ້ອງການກະສິກໍາ ແລະ ປ່າໄມ້ເມືອງພຽງໄດ້ສ້າງຮູບແບບໃນການສົ່ງເສີມການຜະລິດກະສິກຳໃຫ້ເປັນລະບົບ ໂດຍເລັ່ງໃສ່ສ້າງຕາໜ່າງການສົ່ງ ເສີມທາງດ້ານເຕັກນິກວິຊາການ, ປັບປຸງກຳລັງການຜະ ລິດດ້ວຍການຈັດຕັ້ງກຸ່ມການຜະລິດ, ນອກນີ້ຍັງໄດ້ຍູ້ແຮງການຮ່ວມມືສົ່ງເສີມບັນດານັກ ທຸລະກິດ, ຜູ້ປະກອບການພາຍ ໃນ ແລະ ຕ່າງປະເທດເຂົ້າໃນ ການລົງທຶນ, ສົ່ງເສີມການຜະ ລິດ ແລະ ສ້າງບັນດາໂຮງງານປຸງ ແຕ່ງຜົນຜະລິດກະສິກຳ ເພື່ອຍົກສູງຄຸນນະພາບ ແລະ ສ້າງມູນຄ່າເພີ່ມຂອງຜົນຜະລິດກະ ສິກຳເຊັ່ນ: ໂຮງສີເຂົ້າທັງໝົດຈຳນວນ 101 ແຫ່ງ, (ໂຮງສີເຂົ້າທັນສະໄໝ ສາມາດແຍກເມັດເຂົ້າໄດ້ 5 ແຫ່ງ), ໂຮງງານອົບແຫ້ງສາລີ 4 ແຫ່ງ, ໂຮງງານອົບແຫ້ງໝາກເດືອຍ 4 ແຫ່ງ, ໂຮງງານຜະລິດຝຸ່ນຊີວະພາບ 1 ແຫ່ງ, ສົ່ງເສີມນຳໃຊ້ກົນຈັກເຂົ້າໃນການຜະລິດມີລົດໄຖທັງໝົດ 2.986 ຄັນ, ໃນນີ້ ມີລົດໄຖໃຫຍ່ 92 ຄັນ ແລະ ລົດໄຖນາເດີນຕາມ 2.894 ຄັນ, ຈັກຫວ່ານເມັດເຂົ້າ, ເຄື່ອງຢອດເມັດເຂົ້າ, ເຄື່ອງຢອດເມັດສາລີ ທັງໝົດ 18 ເຄື່ອງ, ເຄື່ອງຈັກດຳນາ 2 ເຄື່ອງ, ລົດກ່ຽວເຂົ້າ 2 ຄັນ ແລະ ສ້າງຕັ້ງ ສະມາຄົມ ສົ່ງເສີມທຸລະກິດກະສິກໍາ ແລະ ສົ່ງອອກ 1 ສະມາຄົມ ເຮັດໜ້າທີ່ສົ່ງເສີມ ຕິດພັນກັບຊາວກະສິກອນ ສະ ໜອງປັດໄຈການຜະລິດ, ເກັບຊື້, ປຸງແຕ່ງ ແລະ ສົ່ງອອກຕາມລະບຽບການ ສຳລັບການປູກພືດລະດູແລ້ງແຕ່ລະປີກໍໄດ້ສົ່ງ ເສີມຜູ້ປະກອບການພາຍໃນ ແລະ ຕ່າງປະເທດສົມທົບກັບ ຊາວກະສິກອນປູກພືດລະດູ ແລ້ງເປັນສິນຄ້າ ເປັນຕົ້ນປູກໝາກໂມ, ໝາກແຕງ, ໝາກຖົ່ວເຫຼືອງ, ສາລີຫວານ ແລະ ພືດອື່ນໆ.
    ທ່ານ ບົວວັນ ແສງຈັນ ຍັງໃຫ້ຮູ້ຕື່ມອີກວ່າ: ທັງໝົດນີ້ ມັນເປັນການສ້າງພື້ນຖານປະຖົມປັດໄຈ ເພື່ອຍູ້ແຮງການຜະລິດ ກະສິກຳເປັນສິນຄ້າ ແລະ ຫັນ ເປັນທັນສະໄໝເທື່ອລະກ້າວ, ນອກນີ້ຍັງມີນະໂຍບາຍ ແລະ ມາດຕະການ ໃນການຍູ້ແຮງ ການຜະລິດ ໃນເຂດທີ່ມີເງື່ອນ ໄຂ ແລະ ຮັບປະກັນ ໃນການສະໜອງນ້ຳເຊັ່ນ: ໃນເນື້ອທີ່ໜຶ່ງ ຕ້ອງປູກຫຼາຍເທື່ອ, ປູກສະຫຼັບ, ນໍາໃຊ້ເຕັກນິກການຜະລິດທີ່ມີຄວາມເໝາະສົມ, ປັບປຸງແນວພັນ, ໃສ່ຝຸ່ນ-ປຸ໋ຍ ຍົກຜະລິດຕະພັນ ເປັນຕົ້ນແມ່ນການຜະລິດເຂົ້ານາ ແລະ ການປູກພືດເປັນສິນຄ້າ, ມາເຖິງປັດຈຸບັນການ ຜະລິດພືດສະບຽບອາຫານ, ພືດ ກະສິກຳເປັນສິນຄ້າແມ່ນບັນ ລຸໄດ້ຕາມລະດັບຄາດໝາຍທີ່ ວາງໄວ້ ໂດຍພື້ນຖານເຊັ່ນ: ການຜະລິດເຂົ້າສາມາດບັນລຸໄດ້ທັງໝົດ 33.511,45 ໂຕນຕໍ່ປີ, ໃນນັ້ນ ສາມາດສົ່ງອອກເປັນສິນຄ້າສະເລ່ຍ ໃນແຕ່ລະປີ ປະມານ 10.000 ກ່ວາໂຕນ, ການປູກພືດສະບຽງບັນລຸໄດ້ 23.584,04 ໂຕນຕໍ່ປີ, ປູກສາລີແຂງ ບັນລຸ 19.405,65 ໂຕນ, ປູກໝາກເດືອຍ ບັນລຸໄດ້ 9.932,55 ໂຕນຕໍ່ປີ, ມັນ ຕົ້ນ ບັນລຸໄດ້ 5.765 ໂຕນຕໍ່ປີ, ຖົ່ວເຫຼືອງບັນລຸ 6.644,84 ໂຕນຕໍ່ປີ.
(ຂ່າວ-ພາບ: ອຸ່ນເຮືອນ ໂພທິລັກ)