ການເສີມສ້າງສີມືແຮງງານໃຫ້ສະມາຊິກ ສະຫະພັນແມ່ຍິງ ສນຊ


...

07.10.2019 10:01     

   ສູນກາງແນວລາວສ້າງ ຊາດ (ສນຊ) ຮ່ວມກັບສະມາ ຄົມຄຸນຄ່າລາວໄດ້ຈັດພິທີຝຶກອົບຮົມເສີມສ້າງສີມືແຮງງານໃຫ້ສະມາຊິກສະຫະພັນແມ່ຍິງ ສນຊ ເມື່ອທ້າຍອາທິດແລ້ວນີ້ ທີ່ ສນຊ ໂດຍການເປັນປະທານຮ່ວມຂອງທ່ານ ນາງ ສີພະຈັນ ນັນທະວົງສາ ຄະນະປະຈໍາ ຫົວໜ້າກົມກວດກາ ປະທານສະຫະພັນແມ່ຍິງ ສນຊ, ທ່ານ ນາງ ຍອດແກ້ວມະນີ ສຸພານຸວົງ ຮອງປະທານ ສນຊ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
   ການຝຶກອົບຮົມໃນຄັ້ງນີ້, ເພື່ອຍົກລະດັບຄວາມຮູ້, ເສີມຄວາມສາມາດດ້ານສີມືແຮງງານໃຫ້ເອື້ອຍນ້ອງສະມາ ຊິກແມ່ຍິງ ສນຊ ໃຫ້ຮູ້ຈັກໃຊ້ເວລາຫວ່າງໃຫ້ເກີດປະໂຫຍດ ແລະ ສາມາດສ້າງລາຍໄດ້ເສີມ, ຮູ້ຈັກໃຊ້ເນື້ອທີ່ດິນຂະໜາດນ້ອຍ ໃຫ້ກາຍເປັນສວນຜັກຄົວເຮືອນໄດ້ ເພື່ອຫຼຸດຜ່ອນລາຍຈ່າຍ. ມີຜູ້ເຂົ້າຮ່ວມຝຶກອົບຮົມທັງໝົດ 78 ທ່ານ ຍິງ 65 ທ່ານ ຊຶ່ງຜູ້ ເຂົ້າຮ່ວມຝຶກອົບຮົມຈະໄດ້ຮຽນຮູ້ທັງພາກທິດສະດີ ແລະ ພາກປະຕິບັດຕົວຈິງໃນແຕ່ລະຫົວຂໍ້ຄື: ການປຸງແຕ່ງອາຫານ, ການຕັດຫຍິບຂັ້ນພື້ນຖານ, ວິທີການເຮັດໝູແໜມຫຼວງພະບາງ, ການປູກພືດຜັກອິນຊີ, ການປູກເຫັດ ແລະ ການປູກຕົ້ນຕາເວັນອ່ອນ.
    ໃນໂອກາດນີ້ ທ່ານ ນາງ ສີພະຈັນ ນັນທະວົງສາ ໄດ້ມີຄໍາເຫັນຕໍ່ກອງປະຊຸມວ່າ: ການຍົກລະດັບຄວາມຮູ້ທາງດ້ານວິຊາຊີບ ແລະ ເສີມສ້າງສີມືແຮງງານ ໃຫ້ແມ່ຍິງແມ່ນມີຄວາມຈໍາເປັນ ເພື່ອເຮັດໃຫ້ສະມາຊິກແມ່ຍິງ ສ້າງລາຍຮັບໃຫ້ແກ່ຕົນເອງ, ຄອບຄົວ ແນໃສ່ເຮັດໃຫ້ຄອບ ຄົວມີຊີວິດທີ່ດີຂຶ້ນ ແລະ ຮຽກຮ້ອງໃຫ້ເອື້ອຍນ້ອງແມ່ຍິງທຸກທ່ານ ຈົ່ງນໍາເອົາຄວາມຮູ້ທີ່ໄດ້ຮຽນຮູ້ມານັ້ນ, ໄປປະຕິບັດຕົວຈິງໃຫ້ເກີດດອກອອກຜົນ.
(ຂ່າວ-ພາບ: ສນຊ)