ລາວໂທລະຄົມ ເປີດທົດລອງນຳໃຊ້ລະບົບ 5G


...

09.10.2019 9:37     

   ບໍລິສັດລາວໂທລະຄົມມະນາຄົມ ມະຫາຊົນ ໄດ້ເປີດທົດລອງ ນຳໃຊ້ 5G ຊຶ່ງເປັນເຕັກໂນໂລຊີ ທີ່ມີຄວາມໄວໃນການຮັບ-ສົ່ງ ຂໍ້ມູນທີ່ໄວກວ່າ 4G ເຖິງ 20 ເທົ່າ, ພິທີເປີດທົດລອງນຳໃຊ້ມີຂຶ້ນ ໃນວັນທີ 8 ຕຸລານີ້ ທີ່ສຳນັກງານ ໃຫຍ່ຂອງບໍລິສັດດັ່ງກ່າວ ໂດຍ ມີຜູ້ຕາງໜ້າຈາກກະຊວງ ປທສ ພະນັກງານຂອງບໍລິສັດຕະ ຫຼອດຮອດສື່ມວນຊົນເຂົ້າຮ່ວມ.
    ທ່ານ ສຸພົນ ຈັນທະວີໄຊ ຮອງຜູ້ອຳນວນການໃຫຍ່ ຮັບ ຜິດຊອບຂະແໜງເຕັກນິກໄດ້ກ່າວວ່າ: ເຕັກໂນໂລຊີ 5G ຫຼືການສື່ສານໃນຍຸກທີ 5 ( Fifth Generation ) ຖືກພັດທະນາຂຶ້ນໃຫ້ມີປະສິດທິພາບສູງກວ່າ 4G ເພື່ອສາມາດຕອບສະໜອງຄວາມຕ້ອງການຂອງຜູ້ຊົມໃຊ້ທີ່ປ່ຽນແປງໄປເລື້ອຍໆ, ຄຸນສົມ ບັດພິເສດຫຼັກຂອງເຕັກໂນໂລຊີ 5G ຄື: ຄວາມໄວໃນການຮັບ -ສົ່ງຂໍ້ມູນທີ່ໄວກວ່າ 4G ເຖິງ 20 ເທົ່າ ຕົວຢ່າງ: ເມື່ອໂຫຼດ ຮູບເງົາ (ໜັງ) ທີ່ມີຄວາມຍາວ 2 ຊົ່ວໂມງ 4G ຈະໃຊ້ເວລາປະມານ 6-7 ນາທີ, ໃນຂະນະທີ່ 5G ຈະໃຊ້ເວລາພຽງ 3-4 ວິນາ ທີເທົ່ານັ້ນ, ການເບິ່ງຮູບເງົາ ທີ່ມີຄວາມຍາວລະອຽດສູງລະດັບ HD 4K ຈະບໍ່ເປັນອຸປະສັກອີກຕໍ່ໄປ, ສາມາດປົດລ໋ອກຄຸນສົມບັດສູງສຸດຂອງ AR ແລະ VR ໄດ້ຢ່າງສົມບູນແບບ, ນອກນັ້ນຄວາມສາມາດຮອງຮັບການເຊື່ອມຕໍ່ທີ່ສາມາດຮອງຮັບອຸປະກອນໄດ້ຫຼາຍກວ່າ 4G 10 ເທົ່າຫຼືເທົ່າກັບ 1.000.000 ອຸປະກອນ/Sq.Km ດ້ວຍລະບົບ 5G ຈະເປີດໂລກ IOT (Internet of Things) ໄດ້ຢ່າງແທ້ຈິງ ແລະ ຈະເປັນພື້ນຖານເພື່ອຮອງຮັບການພັດທະນາເຕັກໂນໂລຊີ Smart Home, Smart City, Smart Transportation,Smart Iife,Smart heaIth ແລະອື່ນໆໂດຍສັ່ງການຜ່ານມືຖືຂອງເຮົາກໍໃຊ້ໄດ້ ຫຼື ອຸປະກອນແຕ່ລະຊະນິດສາມາດສື່ສານກັນເອງໄດ້, ຄວບຄຸມກັນໄດ້ ແລະ ເຮັດວຽກປະສານກັນໄດ້ຢ່າງອັດຕະໂນມັດ, ນອກນີ້ເວລາການຕອບສະໜອງ/ໂຕ້ຕອບ:ສັ້ນລົງເຖິງ 1 ມິນລີວິນາທີ (1ms) ດ້ວຍຄຸນສົມບັດພິເສດດັ່່ງກ່າວ 5G ຈະສາມາດຕອບໂຈດ ຂອງກຸ່ມຄົນທີ່ມັກຫຼິ້ນເກມ ຊຶ່ງຕ້ອງການຄວາມໄວໃນການໂຕ້ຕອບສູງຫຼືເວົ້າອີກຢ່າງຄືຖ້າ Latency ຍິ່ງຕໍ່າແມ່ນຍິ່ງດີ, ຕອບໂຈດການຂັບຂີ່ແບບບໍ່ມີຄົນຂັບທີ່ມີຄວາມປອດໄພສູງ ແລະ ນຳໃຊ້ໃນທາງການແພດເຊັ່ນ:ການຜ່າຕັດທາງໄກ ແລະ ອື່ນໆ.
   ທ່ານ ສຸພົນ ຈັນທະວີ ໄຊ ກ່າວອີກວ່າ: ການເປີດທົດລອງ ນຳໃຊ້ 5G ໃນມື້ນີ້ຖືວ່າເປັນ ອີກບາດກ້າວໜຶ່ງໃນຄວາມພະ ຍາຍາມຂອງ ບໍລິສັດ ໃນການນຳເອົາເຕັກນິກວິທະຍາສາດເຕັກໂນໂລຊີໃໝ່ທີ່ກ້າວໜ້າ ແລະ ທັນສະໄໝໄດ້ມາດຕະຖານທຽບເທົ່າກັບສາກົນເພື່ອເຮັດໃຫ້ສັງຄົມລາວກ້າວໄປສູ່ສັງຄົມທີ່ທັນສະໄໝໃນຍຸກແຫ່ງ DigitaI Lite ເທື່ອລະກ້າວ. ພ້ອມກັນນັ້ນກໍ່ເປັນການສົ່ງເສີມການພັດທະນາທຸລະກິດ ໂທລະຄົມ ມະນາຄົມໃຫ້ທຽບທັນ ແລະ ສາມາດເຊື່ອມໂຍງກັບບັນດາປະເທດໃນຂົງເຂດ ພາກພື້ນແລະສາກົນ.
(ຂ່າວ-ພາບ: ພູວຽງຄຳ)