ເປີດງານຕະຫຼາດນັດແຮງງານ ປີ 2019


...

18.10.2019 9:30     

   ພະແນກແຮງງານ ແລະ ສະຫວັດດີການສັງຄົມ ນະຄອນ ຫຼວງວຽງຈັນ ແລະ ບໍລິສັດລາວເວີນມະຫາຊົນຈຳກັດ ໄດ້ຮ່ວມກັນຈັດງານຕະຫຼາດນັດແຮງງານຂຶ້ນໃນວັນທີ 16 ຕຸລາ ທີ່ສູນການຄ້າລາວໄອເຕັກ (ຕຶກເກົ່າ) ໂດຍການເຂົ້າຮ່ວມຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ມີຜູ້ຕາງໜ້າຈາກຫົວໜ່ວຍແຮງງານ ພ້ອມແຂກຖືກເຊີນເຂົ້າຮ່ວມ.
    ທ່ານ ສີຫຸນ ສິດທິລືໄຊ ໄດ້ກ່າວວ່າ: ໃນການຈັດງານຕະຫຼາດນັດແຮງງານຄັ້ງນີ້ ເພື່ອສ້າງໂອກາດ ແລະ ເອື້ອອຳນວຍຄວາມສະດວກໃຫ້ຜູ້ຊອກວຽກເຮັດງານທຳ ແລະ ບັນດາຫົວໜ່ວຍແຮງງານໄດ້ມີເວທີພົບປະກັນແລ້ວນຳໄປສູ່ການຈ້າງງານ ສ້າງເງື່ອນໄຂໃຫ້ຜູ້ອອກແຮງງານທີ່ຕ້ອງການພັດທະນາສີມືແຮງງານສາມາດເຂົ້າເຖິງສະຖາບັນການສຶກສາຕ່າງໆໄດ້ຮັບການຍົກລະດັບສີມືແຮງງານແທດເໝາະກັບຄວາມຕ້ອງການຂອງຕະຫຼາດແຮງງານ,ເພື່ອຫຼຸດຜ່ອນອັດຕາການວ່າງງານ ຫຼຸດຜ່ອນການເຄື່ອນຍ້າຍແຮງງານໄປເຮັດວຽກຢູ່ຕ່າງປະເທດແບບບໍ່ຖືກຕ້ອງທັງເປັນການສົ່ງເສີມການເຮັດວຽກຢູ່ພາຍໃນປະເທດ ແລະເປັນການປູກຈິດສຳນຶກ ໃຫ້ຜູ້ປະກອບການ ແລະ ຜູ້ຊອກວຽກເຮັດງານທຳມີຄວາມຮັບຮູ້ ແລະ ເຂົ້າໃຈຕໍ່ແນວທາງ ຂໍ້ກຳນົດກົດລະບຽບຕ່າງໆທີ່ກ່ຽວຂ້ອງກັບວຽກງານແຮງງານຫຼາຍຂຶ້ນ.
    ໃນງານນັດພົບແຮງງານປີນີ້ ມີກິດຈະກຳທີ່ຫຼາກຫຼາຍເປັນຕົ້ນການລົງທະບຽນຮັບສະໝັກງານ ການໃຫ້ຂໍ້ມູນຂ່າວສານຕະຫຼາດແຮງງານ ຂໍ້ມູນກ່ຽວກັບການຝຶກວິຊາຊີບ ໂດຍມີບັນດາອົງການຈັດຕັ້ງພາກລັດ ພາກເອກະຊົນ ຫົວໜ່ວຍແຮງງານ ໂຄງການ ເຂດເສດຖະກິດ ບໍລິສັດຈັດຫາງານ ສະຖາບັນການສຶກສາ ສູນຝຶກວິຊາຊີບ ແລະ ຊາວຄ້າຂາຍເຂົ້າຮ່ວມ 300 ຮ້ານ ໃນນີ້ມີຮ້ານຮັບສະໝັກງານ 49 ຮ້ານ. ຮ້ານວາງສະແດງ ແລະ ໂຄສະນາສິນຄ້າ 31 ຮ້ານ ແລະ ຮ້ານຂາຍສິນຄ້າທົ່ວໄປ 220 ຮ້ານ.
    ປັດຈຸບັນມີຕຳແໜ່ງງານວ່າງທັງໝົດ 5.200 ຕຳແໜ່ງ ຄາດວ່າຈະມີນັກຮຽນ ນັກສຶກສາ ຜູ້ຊອກວຽກເຮັດງານທຳ ຜູ້ຕ້ອງການປ່ຽນວຽກໃໝ່ຫຼາຍກວ່າ 3000 ຄົນ ແລະ ຄາດວ່າຜູ້ຊອກວຽກເຮັດງານທຳຈະຖືກຄັດເລືອກບັນຈຸເຂົ້າໃນຕຳແໜ່ງວ່າງຂອງບັນດາຫົວໜ່ວຍແຮງງານ ໂຄງການ ແລະ ເຂດເສດຖະກິດພິເສດຈຳນວນ1.500 ຄົນ ນອກນີ້ ຍັງເຮັດໃຫ້ມວນຊົນໄດ້ຮັບຮູ້ ແລະ ເຂົ້າໃຈຕໍ່ລະບຽບກົດໝາຍດ້ານແຮງງານລະບຽບການຂັ້ນຕອນຕ່າງໆໃນການໄປອອກແຮງງານທີ່ຕ່າງປະເທດຢ່າງຖືກຕ້ອງ.
(ຂ່າວ: ມະລິ)