ປະທານສູນກາງແນວລາວສ້າງຊາດ ເຄື່ອນໄຫວຢ້ຽມຢາມເມືອງສັງທອງ

...

23.10.2019 9:12     

   ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະ ທານສູນກາງແນວລາວສ້າງຊາດ (ສນຊ) ພ້ອມຄະນະໄດ້ເຄື່ອນໄຫວຢ້ຽມຢາມຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການຜະລິດເປັນສິນຄ້າ ຢູ່ເມືອງສັງທອງ ນະຄອນຫຼວງວຽງຈັນ,ໃນວັນທີ 20 ຕຸລາຜ່ານມາ, ມີທ່ານ ດາວເພັດ ອາລຸນ ເລຂາພັກເມືອງ ເຈົ້າເມືອງສັງທອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ. ໃນການພົບປະໂອ້ລົມຄັ້ງນີ້, ທ່ານປະທານ ສນຊ ໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມ ແລະ ການຜະລິດເປັນສິນຄ້າ ໂດຍສະເພາະວຽກງານກະສິກໍາຂອງເມືອງສັງທອງ ຈາກທ່ານ ເຈົ້າເມືອງໆສັງທອງ. ໃນໂອກາດນີ້, ທ່ານປະທານ ສນຊ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສຳເລັດໃນການຈັດຕັ້ງປະ ຕິບັດແຜນພັດທະນາເສດຖະກິດ-ສັງຄົມ ທີ່ຄະນະພັກ-ຄະ ນະນໍາ ກໍຄືປະຊາຊົນຊາວເມືອງສັງທອງໃນໄລຍະຜ່ານມາ ແລະ ທ່ານ ປະທານ ສນຊ ໄດ້ຍົກໃຫ້ເຫັນເຖິງຄວາມສຳຄັນຂອງວຽກງານແນວລາວສ້າງຊາດໂດຍໄດ້ເນັ້ນຫຼາຍບັນຫາໃຫ້ຄະນະກຳມະການແນວລາວສ້າງຊາດເມືອງ, ບ້ານ ແລະ ພາກ ສ່ວນທີ່ກ່ຽວຂ້ອງຈົ່ງເພີ່ມທະວີກ້ອນກຳລັງມະຫາສາມັກຄີທຸກຊົນເຜົ່າ, ຊັ້ນຄົນ, ສາສະໜາ, ເພດ-ໄວໃຫ້ໜັກແໜ້ນເຂັ້ມແຂງ. ເອົາໃຈໃສ່ໂຄສະນາປຸກ ລະດົມ, ເສີມຂະຫຍາຍສິດເປັນເຈົ້າຂອງປະຊາຊົນໃນການປະຕິບັດແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດ, ຄົ້ນຄວ້າຜັນຂະຫຍາຍບັນດາແນວທາງນະໂຍບາຍຂອງພັກ-ລັດ ຫັນເປັນແຜນງານ, ເປັນໂຄງການລະອຽດ, ເອົາໃຈໃສ່ຫັນລົງຮາກຖານທ້ອງຖິ່ນຕິດພັນກັບວຽກງານສາມສ້າງຕາມ 4 ເນື້ອໃນ 4 ຄາດໝາຍ, ສືບຕໍ່ປະສານສົມທົບກັບພາກສ່ວນທີ່ກ່ຽວຂ້ອງແກ້ໄຂປະກົດການຫຍໍ້ທໍ້, ຄວາມຂັດແຍ້ງຕ່າງໆໃນທົ່ວສັງຄົມໃຫ້ໝົດໄປ. ຈາກນັ້ນ, ທ່ານປະທານສູນກາງແນວລາວສ້າງຊາດ ພ້ອມຄະນະໄດ້ເດີນທາງໄປຢ້ຽມຢາມ ຄອບຄົວຕົວແບບໃນການປູກຕົ້ນໄມ້ກິນໝາກ; ຢ້ຽມຢາມພື້ນທີ່ປູກເຂົ້າອິນຊີ, ປູກຫຍ້າຫວານ (ຫຍ້າງົວ) ແລະ ການລ້ຽງງົວຂອງເມືອງ ສັງທອງຕື່ມອີກ. (ຂ່າວ-ພາບ: ສນຊ)