ໄຊສົມບູນ ປະກາດຮັບຮອງບ້ານນາໄຊສະຫວ່າງ ເປັນບ້ານວັດທະນະທຳ

...

...

30.10.2019 9:31     

  ພິທີປະກາດຮັບຮອງ ບ້ານນາໄຊສະຫວ່າງ ເປັນບ້ານວັດທະນະທໍາ ແຫ່ງທີ 4 ຂອງເມືອງລ້ອງແຈ້ງ ແຂວງໄຊສົມບູນ ໄດ້ຈັດຂຶ້ນໃນວັນທີ 24 ຕຸລາຜ່ານມານີ້ ທີ່ເດີ່ນໂຮງຮຽນປະ ຖົມນາໄຊສະຫວ່າງ ໂດຍການເຂົ້າຮ່ວມຂອງທ່ານ ແດງປະທຸມທອງ ຮອງເຈົ້າແຂວງໄຊ ສົມບູນ, ມີພາກສ່ວນກ່ຽວຂ້ອງເຂົ້າຮ່ວມ. ໃນພິທີ ທ່ານ ຊຽງຄໍາພັນ ພົມມະທັດ ເລຂາພັກບ້ານ ນາຍບ້ານນາໄຊສະຫ່ວາງ ໄດ້ ຂຶ້ນຜ່ານບົດລາຍງານການ ເຄື່ອນໄຫວວຽກງານຂອງບ້ານໃນໄລຍະຜ່ານມາ ຊຶ່ງບ້ານນາໄຊສະຫ່ວາງ ໄດ້ສ້າງຕັ້ງຂຶ້ນໃນປີ 1997, ຫ່າງຈາກເທດສະບານເມືອງລ້ອງແຈ້ງ ປະມານ 106 ກິໂລແມັດ, ມີ 208 ຫຼັງຄາເຮືອນ, ມີ 261 ຄອບຄົວ, ມີ 13 ໜ່ວຍສາມັກຄີ, ມີພົນລະເມືອງທັງໝົດ 1.121 ຄົນ, ຍິງ 537 ຄົນ, ມີສອງຊົນເຜົ່າຢູ່ຮ່ວມກັນຄື: ຊົນເຜົ່າລາວລຸ່ມ ແລະ ຊົນເຜົ່າຂະມຸ ຊຶ່ງປະຊາຊົນພາຍໃນບ້ານສ່ວນຫຼາຍແມ່ນຢຶດຖືການປູກຝັງລ້ຽງສັດເປັນອາຊີບຕົ້ນຕໍ ແລະ ອາຊີບກໍາມະກອນເປັນສໍາຮອງ. ໃນໄລຍະຜ່ານມາອໍານາດການປົກຄອງບ້ານ ໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ປະຊາຊົນພາຍໃນບ້ານຢ່າງເປັນປົກກະຕິ ເພື່ອໃຫ້ເຂົາເຈົ້າໄດ້ຮັບຮູ້ ແລະ ເຂົ້າໃຈ ຕໍ່ແນວທາງຂອງພັກ, ລະບຽບກົດໝາຍຂອງລັດ ປະກອບສ່ວນເຂົ້າໃນວຽກງານຕ່າງໆຂອງຂັ້ນເທິງ ໂດຍສະເພາະກໍຄືການສ້າງຄົນ, ຄອບຄົວ ແລະ ບ້ານວັດທະນະທໍາ ຕິດພັນກັບ ມູນເຊື້ອດຸໝັ່ນຂະຫຍັນພຽນ ໃນການທໍາການຜະລິດ ເພື່ອສ້າງເສດຖະກິດຄອບຄົວໃຫ້ມີບາດກ້າວຂະຫຍາຍຕົວດີຂຶ້ນເທື່ອລະກ້າວ. ຈາກນັ້ນ, ໃນພິທີໄດ້ມີການມອບໃບຢັ້ງຢືນບ້ານນາໄຊສະຫ່ວາງ ເປັນບ້ານແມ່ຍິງ 3 ດີ, ບ້ານສາທາລະນາສຸກ ແລະ ບ້ານວັດທະນະທໍາ ໂດຍການຂຶ້ນມອບຂອງທ່ານ ແຮ ວົງສຸວັດ ເຈົ້າເມືອງລ້ອງແຈ້ງ ແລະ ທ່ານ ອິນຕອງ ໂຄດປັນຍາ ຮອງເຈົ້າເມືອງລ້ອງແຈ້ງ. ໂອກາດດັ່ງກ່າວຮອງເຈົ້າແຂວງໄຊສົມບູນໄດ້ໂອ້ລົມຕໍ່ພິທີ ຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍ-ຄວາມສໍາຄັນຂອງວຽກງານສ້າງຄົນ, ສ້າງຄອບຄົວ ແລະ ສ້າງບ້ານ ໃຫ້ກາຍເປັນບ້ານວັດທະນະທໍາ ແລະ ທ່ານຍັງໄດ້ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ເປັນຕົ້ນແມ່ນອໍານາດການປົກ ຄອງບ້ານຕະຫຼອດຮອດພໍ່ແມ່ປະຊາຊົນພາຍໃນບ້ານ ຈົ່ງພ້ອມກັນປົກປັກຮັກສາມູນ ເຊື້ອວັດທະນະທໍາໃຫ້ຢູ່ຄຽງຄູ່ກັບບ້ານນາໄຊສະຫວ່າງຕະຫຼອດໄປ ເພື່ອໃຫ້ສາມາດກາຍເປັນບ້ານພັດທະນາໃນອະນາຄົດ. (ຂ່າວ: ພາພອນ)