ມອບ-ຮັບໂຮງຮຽນລ້ຽງເດັກອະນຸບານ ແລະ ສະໂມສອນ ຫ້ອງການສຶກສາເມືອງໄຊພູທອງ

...

30.10.2019 9:00     

  ພິທີມອບ-ຮັບອາຄານ 2 ຫຼັງ ຄື: ໂຄງການກໍ່ສ້າງໂຮງຮຽນລ້ຽງເດັກ - ອະນຸບານ ແລະ ໂຄງການກໍ່ສ້າງສະໂມສອນຫ້ອງການສຶກສາທິການ ແລະ ກິລາເມືອງໄຊພູທອງ ແຂວງສະຫວັນນະເຂດ ໂດຍການເຂົ້າຮ່ວມຂອງ ທ່ານ ຄໍາວິໃສ ຜຸຍຍະວົງ ກໍາມະການພັກແຂວງເລຂາພັກເມືອງ ເຈົ້າເມືອງໄຊພູທອງ, ມີທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີບັນດາຄະນະປະຈໍາພັກເມືອງ ແລະ ແຂກເຊີນເຂົ້າຮ່ວມ. ໂຄງການກໍ່ສ້າງໂຮງຮຽນລ້ຽງເດັກອະນຸບານເມືອງໄຊພູທອງ ຊຶ່ງໄດ້ເລີ່ມລົງມືກໍ່ສ້າງມາແຕ່ວັນທີ 12 ເດືອນມີຖຸນາ ປີ 2017 ດ້ວຍທຶນງົບປະມານທັງໝົດ 970 ລ້ານກວ່າກີບ ກີບ ໂດຍແມ່ນ ບໍລິສັດ ເທບທອງຄຳກໍ່ສ້າງເຄຫາສະຖານຈຳກັດ ເປັນຜູ້ຮັບເໝົາກໍ່ສ້າງ, ມີຂະໜາດ 10X30 ແມັດ, ປະກອບດ້ວຍຫ້ອງລ້ຽງເດັກ-ອະນຸບານ ຂະໜາດ 8X8 ແມັດ ຈໍານວນ 3 ຫ້ອງ, ຫ້ອງບໍລິຫານຄູ-ອາຈານຈຳນວນ 1 ຫ້ອງ ແລະ ຫ້ອງນ້ຳ 1 ຫຼັງ ຈຳນວນ 4 ຫ້ອງ ແລະ ສ່ວນໂຄງການກໍ່ສ້າງສະໂມສອນຫ້ອງການສຶກສາທິການ ແລະ ກິລາເມືອງໄຊພູທອງ ໄດ້ເລີ່ມລົງມືການກໍ່ສ້າງ ແຕ່ວັນທີ 16 ພຶດສະພາ 2016, ງົບປະມານໄດ້ຈາກການປະກອບສ່ວນຄູ-ອາຈານພາຍໃນເມືອງ ແລະ ຫ້ອງການສຶກສາທິການ-ກິລາເມືອງ, ມີມູນການກໍ່ສ້າງ 543 ລ້ານກວ່າກີບ,ໂຄງສ້າງເສົາ-ຄານເຮັດດ້ວຍເບຕົງເສີມເຫຼັກ ມີໂຄງສ້າງແບບຖາວອນ, ພື້ນປູກະໂລ, ຕິດຕັ້ງລະບົບໄຟຟ້າໃນອາຄານ. ກ່າວມອບອາຄານຮຽນດັ່ງກ່າວໂດຍຕ່າງໜ້າບໍລິສັດ ແລະ ກ່າວຮັບໂດຍ ທ່ານ ເມກສຸວັນ ນິນພູສະຫວັນ ຮອງຫົວ ໜ້າຫ້ອງການສຶກສາທິການ ແລະ ກິລາເມືອງ ພ້ອມນີ້ທ່ານຍັງໄດ້ກ່າວມອບອາຄານໃຫ້ຄູ-ອາຈານ ເປັນຜູ້ຄຸ້ມຄອງນໍາໃຊ້ໃຫ້ມີຜົນປະໂຫຍດສູງສຸດໃນການຮຽນ-ການສອນ ກໍຄືການພັດທະນາຊັບພະຍາກອນມະນຸດ ແລະ ພັດທະນາລູກຫຼານ ໃຫ້ມີຄວາມຮູ້ຄວາມສາມາດໃນອະນາຄົດ ແລະ ຮຽກຮ້ອງມາຍັງອຳນາດການປົກບ້ານ, ຄູ-ອາຈານ ຈົ່ງພ້ອມກັນປົກປັກຮັກສາອຸປະກອນຕ່າງໆ ແລະ ອາຄານຮຽນຫຼັງນີ້ໃຫ້ສາມາດນຳໃຊ້ໄດ້ຢ່າງຍາວນານ. (ພາບ-ຂ່າວ: ພັນທະມິດ ວົງສຸທິ)