ເມືອງເງິນ ຮັບຮອງເອົາ 11 ຫ້ອງການ 1 ກົມກອງ ເປັນກົມກອງວັດທະນະທຳ

...

07.11.2019 10:33     

  ເມືອງເງິນ ແຂວງໄຊຍະ ບູລີ ໄດ້ຈັດພິທີ ປະກາດຮັບ ຮອງເອົາ 11 ຫ້ອງການ, 1 ກົມກອງ ເປັນກົມກອງ-ຫ້ອງ ການວັດທະນະທຳຂຶ້ນໃນວັນທີ 31 ຕຸລາຜ່ານມາ ຢູ່ທ່ີຫໍປະຊຸມບ້ານຂອນ ເມືອງດັ່ງ ກ່າວ ໂດຍການເຂົ້າຮ່ວມຂອງທ່ານ ຄຳແພງ ຕັດສະຫວັດ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງເງິນ, ມີຫົວໜ້າຫ້ອງການ, ກົມກອງ, ອຳນວຍການໂຮງຮຽນ, ໂຮງໝໍ, ສຸກສາລາ, ນາຍບ້ານເທດສະບານເມືອງ ເຂົ້າຮ່ວມ. ທ່ານ ພັນໂທ ພອນສະ ຫວັນ ວໍລະສັກ ຫົວໜ້າກອງບັນຊາການ ປກສ ເມືອງ ໃນນາມຕາງໜ້າໃຫ້ແກ່ 11 ຫ້ອງການ ແລະ 1 ກົມກອງ ໄດ້ລາຍງານການຈັດຕັ້ງປະຕິບັດ ການສ້າງຄົນ, ກົມກອງ,ຫ້ອງການ ເປັນກົມກອງວັດທະນະທຳ ຊຶ່ງເລີ່ມຈັດຕັ້ງປະຕິບັດມາແຕ່ວັນທີ 22 ກໍລະກົດ 2016 ເປັນຕົ້ນມາ, ທາງຫ້ອງການຖະແຫຼງຂ່າວ-ວັດທະນະທໍາ ແລະ ທ່ອງທ່ຽວເມືອງເງິນ ໄດ້ສຸມໃສ່ເຜີຍແຜ່ ເອກະສານມາດຖານ-ເງື່ອນໄຂ ຂອງການສ້າງຄົນ, ຫ້ອງການ, ກົມກອງ ວັດທະນະທຳ ຜ່ານການຈັດຕັ້ງປະຕິບັດໄດ້ເຮັດໃຫ້ຫ້ອງການ-ກົມກອງ, ມີຄວາມກະຕືລືລົ້ນ ໃນການຊຸກຍູ້ ສົ່ງເສີມ ໃນການແຂ່ງຂັນກັນສ້າງຫ້ອງການ-ກົມກອງ ຕາມມາດຖານ ເງື່ອນໄຂ, ມີການກວດກາຕິດຕາມປະເມີນໄດ້ທັງໝົດ 3 ຄັ້ງຄື: ຄັ້ງທີ 1 ວັນທີ 20 ຕຸລາ 2017, ຄັ້ງທີ 2 ວັນທີ 26 ມິຖຸນາ 2018 ແລະ ຄັ້ງທີ 3 ວັນທີ 15 ຕຸລາ 2019 ໂດຍແມ່ນ ທີມງານຈາກພະແນກຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ເປັນຜູ້ປະເມີນ. ຜ່ານການກວດກາປະເມີນຜົນ ຫ້ອງການສາມາດປະຕິບັດໄດ້ຕາມ 4 ມາດຖານເງື່ອນໄຂຂອງການສ້າງຄົນ ແລະ ກົມກອງ, ຫ້ອງການ ວັດທະນະທຳປະກອບມີ 11 ຫ້ອງການ,1 ກົມກອງ ດັ່ງນີ້: ຫ້ອງການຖະແຫຼງຂ່າວ, ວັດ ທະນະທຳ ແລະ ທ່ອງທ່ຽວ ເມືອງ, ຫ້ອງການແຮງງານ ແລະ ສະຫວັດດີການສັງຄົມເມືອງ, ຫ້ອງການສຶກສາທິການ ແລະ ກິລາເມືອງ, ຫ້ອງ ການຊັບພະຍາກອນ, ທຳມະຊາດ ແລະ ສິ່ງແວດລ້ອມເມືອງ, ຫ້ອງການກະສິກຳ ແລະ ປ່າໄມ້ເມືອງ, ຫ້ອງການຊາວໜຸ່ມເມືອງ, ກອງບັນຊາການ ປກສ ເມືອງ, ຫ້ອງການ-ການເງິນ ເມືອງ, ຫ້ອງການໂຍທາທິການ-ຂົນສົ່ງເມືອງ, ຫ້ອງການສະຫະພັນແມ່ຍິງເມືອງ, ຫ້ອງການສາທາລະນະສຸກເມືອງ ແລະ ຫ້ອງການພາຍໃນເມືອງ. (ຂ່າວ-ພາບ: ອິນແປງ ແຫວນຄຳ)