ເຊັນສັນຍາຮ່ວມມືພັດທະນາໂຄງການທາງດ່ວນ ນະຄອນຫຼວງວຽງຈັນ ຫາ ຊາຍແດນລາວ-ຈີນ


...

30.05.2019 10:33     

   ພິທີເຊັນສັນຍາຮ່ວມມືວ່າດ້ວຍການພັດທະນາ ໂຄງການທາງດ່ວນຈາກນະຄອນຫຼວງວຽງຈັນ ຫາຊາຍແດນ ສປປ ລາວ ກັບ ສປ ຈີນ (ດ່ານສາກົນ ບໍ່ເຕ່ນ-ບໍ່ຫານ) ໄດ້ມີຂຶ້ນໃນວັນທີ 28 ພຶດສະພາ ຜ່ານມາທີ່ໂຮງແຮມລາວພລາຊາ ນະຄອນຫຼວງວຽງຈັນ ໃຫ້ກຽດລົງນາມໃນພິທີເຊັນສັນຍາຂອບການຮ່ວມມືດັ່ງກ່າວ ຊຶ່ງຝ່າຍລາວ ຕາງໜ້າເຊັນໂດຍ ທ່ານ ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນ ການ ແລະ ການລົງທຶນ ແລະ ຝ່າຍຈີນ ຕາງໜ້າເຊັນໂດຍ ທ່ານ ເສິນ ເວີນຊານ ປະທານກຸ່ມບໍລິສັດ ກໍ່ສ້າງ-ລົງທຶນ ແລະ ຖືຮຸ້ນ ແຂວງຢຸນນານ ຈຳກັດ ໂດຍການເຂົ້າຮ່ວມເປັນສັກຂີພິຍານຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ທ່ານ ຫຼວນ ເສີງຟາ ເຈົ້າແຂວງໆ ຢຸນນານ, ທ່ານ ຈຽງ ຈ້າຍຕົງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ ພ້ອມນັ້ນມີ ພາກສ່ວນກ່ຽວຂ້ອງເຂົ້າຮ່ວມ. ຈຸດປະສົງໃນການລົງນາມຄັ້ງນີ້: ສຳລັບໄລຍະທຳອິດແຕ່ນະຄອນຫຼວງວຽງຈັນ ຫາວັງວຽງ ແມ່ນໄດ້ເລີ່ມຈັດຕັ້ງປະຕິບັດໂຄງການແລ້ວ, ສ່ວນໄລຍະທີ່ຍັງເຫຼືອ ຈາກເມືອງວັງວຽງ ຫາ ນະຄອນ-ຫຼວງພະບາງ ແລະ ແຂວງອຸດົມໄຊ ຫາດ່ານສາກົນ ບໍ່ເຕ່ນ-ບໍ່ຫານ, ແຂວງຫຼວງນຳ້ທາ ແມ່ນຈະໄດ້ຈັດຕັ້ງປະຕິບັດໂຄງການສຶກສາສຳຫຼວດຄວາມເປັນໄປໄດ້ຕາມກອບເວລາທີ່ ໄດ້ຕົກລົງກັນ ບົນພື້ນຖານກົດ ໝາຍທີ່ກ່ຽວຂ້ອງ ຂອງ ສປປ ລາວ ຊຶ່ງຕ່າງຝ່າຍຕ່າງມີຜົນປະ ໂຫຍດ ແລະ ໂຄງການທາງດ່ວນຖືເປັນຜົນຮູບປະທຳຂອງການປະສານກັນລະຫວ່າງການລິເລີ່ມ ໜຶ່ງແລວ ໜຶ່ງເສັ້ນທາງ ແລະ ຍຸດທະສາດລະດັບຊາດ ຫັນປ່ຽນຈາກປະເທດບໍ່ມີທາງອອກສູ່ທະເລ ໃຫ້ກາຍເປັນ ປະເທດທາງເຊື່ອມຕໍ່ຂອງລາວ, ໂດຍການເຊັນສັນຍາຮ່ວມທຶນໂຄງການແມ່ນພາຍໃຕ້ການເປັນສັກຂີພິຍານຂອງ ທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນ ກາງພັກປະຊາຊົນ ປະຕິວັດ ລາວ ປະທານປະເທດ ແຫ່ງ ສປປ ລາວ ແລະ ທ່ານ ສີ ຈິ້ນຜິງ ເລຂາທິການໃຫຍ່ພັກກອມມູນິດຈີນ ປະທານປະເທດແຫ່ງ ສປ ຈີນ ຊຶ່ງໄດ້ບັນທຶກໃສ່ຖະແຫຼງການຮ່ວມລາວ-ຈີນ; ພ້ອມດຽວກັນນັ້ນ, ໂຄງການດັ່ງກ່າວໄດ້ມີການບັນທຶກລົງລາຍເຊັນໂດຍທ່ານ ບຸນຍັງ ວໍລະຈິດ ແລະ ທ່ານ ສີ ຈິ້ນຜິງ ແຜນການເຄື່ອນໄຫວຮ່ວມກັນສ້າງຕັ້ງປະຊາຄົມຮ່ວມຊາຕາກຳຂອງພັກປະຊາຊົນປະຕິວັດລາວ ແລະ ພັກກອມມູນິດຈີນ ກາຍເປັນສ່ວນໜຶ່ງຂອງແຜນປະຊາຄົມຮ່ວມຊາຕາກຳ ລາວ-ຈີນ; ເປັນໂຄງການກໍ່ສ້າງເສັ້ນທາງທີ່ໃຫຍ່ທີ່ສຸດຂອງ ການຮ່ວມມືລະຫວ່າງລາວ - ຈີນ ໃນປັດຈຸບັນນີ້. ໂຄງການກໍ່ສ້າງທາງດ່ວນ ມີແຜນການດຳເນີນປະຕິບັດ 4 ຂັ້ນຕອນ, ແບ່ງຕາມລຳດັບຄື: ນະຄອນຫຼວງວຽງຈັນ ຫາ ວັງວຽງ, ວັງວຽງ ຫາ ແຂວງ ຫຼວງພະບາງ, ແຂວງ ຫຼວງພະບາງ ຫາ ແຂວງ ອຸດົມໄຊ ແລະ ແຂວງ ອຸດົມໄຊ ຫາ ດ່ານສາກົນ ບໍ່ເຕ່ນ-ບໍ່ຫານ. ປັດຈຸບັນ, ໄລຍະນະຄອນຫຼວງວຽງຈັນ ຫາ ວັງວຽງ ແມ່ນໄດ້ເຂົ້າສູ່ຂັ້ນຕອນການລົງມືກໍ່ສ້າງແລ້ວ, ສ່ວນໄລຍະທີ່ຍັງເຫຼືອ: ວັງວຽງ-ແຂວງຫຼວງພະບາງ-ອຸດົມໄຊ-ຊາຍແດນບໍ່ເຕ່ນ-ບໍ່ຫານ ແມ່ນກຳລັງດຳເນີນວຽກງານການສຶກສາຄວາມເປັນໄປໄດ້ໃນການກໍ່ສ້າງ, ໂດຍລວມແລ້ວ ໂຄງການກຳລັງດຳເນີນໄປໄດ້ດີຕາມຄວາມຄາດໝາຍ. (ຂ່າວ: ນາງ ສະຫວັນຄຳ)