ຈີນ ສະໜອງເງິນກູ້ເພື່ອສົ່ງເສີມ SMEs ແກ່ລາວ


...

11.07.2019 9:34     

   ລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສປ ຈີນ ໄດ້ມອບໃຫ້ທະນາຄານແຫ່ງ ສປປ ລາວ (ທຫລ) ແລະ ທະນາຄານພັດທະນາແຫ່ງຊາດຈີນ (CDB) ຮ່ວມກັນເຊັນສັນຍາເງິນກູ້ 300 ລ້ານໂດລາ ເພື່ອສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງ (SMEs) ໃນ ສປປ ລາວ ຊຶ່ງພິທີໄດ້ຈັດຂຶ້ນໃນວັນທີ 9 ກໍລະກົດ ຜ່ານມາ ທີ່ໂຮງແຮມ ລາວພລາຊາ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ສອນໄຊ ສິດພະໄຊ ຜູ້ວ່າການ ທຫລ, ມີຄະນະນຳຈາກ ທຫລ, ທະນາຄານພັດທະນາແຫ່ງຊາດຈີນ, ຄະນະກຳມະການຮ່ວມມືລາວ-ຈີນ, ກະຊວງທີ່ກ່ຽວຂ້ອງ, ຕາງໜ້າສະຖານທູດ ສປ ຈີນ ປະຈຳ ສປປ ລາວ ເຂົ້າຮ່ວມ. ໃນການຮ່ວມລົງນາມເຊັນສັນຍາເງິນກູ້ບ້ວງດັ່ງກ່າວ ຝ່າຍລາວ ໂດຍແມ່ນທ່ານນາງ ວັດທະນາ ດາລາລອຍ ຮອງຜູ້ວ່າການ ທຫລ ແລະ ຝ່າຍຈີນ ໂດຍແມ່ນທ່ານ ຫົງ ເຈີ້ງຫົວ (Mr. Hong Zhenghua) ຫົວໜ້າສາຂາ CDB ແຂວງຢຸນນານ ໂດຍເຫັນໄດ້ເຖິງຄວາມໝາຍຄວາມສຳຄັນກ່ຽວກັບການຈັດຕັ້ງປະຕິບັດນະໂຍບາຍຂອງລັດຖະບານໃນການຊຸກຍູ້ສົ່ງເສີມບົດບາດຂອງ SMEs ໃນການຂັບເຄື່ອນເສດຖະກິດໃຫ້ມີການພັດທະນາ ແລະ ຂະຫຍາຍຕົວ ໂດຍສະເພາະໃນເງື່ອນໄຂ ຂອງ ສປປ ລາວ ທີ່ບັນດາຫົວໜ່ວຍ SMEs ມີຄວາມຕ້ອງການແຫຼ່ງທຶນຈຳນວນຫຼວງຫຼາຍ; ດັ່ງນັ້ນ,ໃນຕົ້ນປີ 2017 ທຫລ ແລະ ທະນາຄານ CDB ຈຶ່ງມີການປຶກສາຫາລືກ່ຽວກັບການສະເໜີໃຫ້ເງິນກູ້ ເພື່ອສົ່ງເສີມພັດທະນາ SMEs ແກ່ ສປປ ລາວ ໂດຍໄດ້ມີການລົງນາມໃນບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືທາງດ້ານການເງິນ ເພື່ອສົ່ງເສີມ SMEs ໃນ ສປປ ລາວ ວົງເງິນ 300 ລ້ານໂດລາ ໃນວັນທີ 13 ພະຈິກ 2017 ລະຫວ່າງ ຜູ້ວ່າການ ທຫລ ກັບປະທານສະ ພາບໍລິຫານຂອງທະນາຄານ CDB ໃນໂອກາດທີ່ຄະນະຜູ້ແທນການນຳຂັ້ນສູງ ຂອງ ສປ ຈີນ ມາຢ້ຽມຢາມທາງລັດຖະກິດຢູ່ ສປປ ລາວ ໃນເດືອນ ພະຈິກ 2017. ສຳລັບບ້ວງເງິນກູ້ດັ່ງກ່າວ ຈະແບ່ງການເບີກຖອນອອກເປັນ 3 ງວດ, ງວດລະ 100 ລ້ານໂດລາ ບົນພື້ນຖານເງື່ອນໄຂສັນຍາເງິນກູ້ທີ່ເຫັນດີນຳກັນ. ເພື່ອຜັນຂະຫຍາຍເນື້ອໃນຈິດໃຈຂອງ MOU ດັ່ງກ່າວ, ທຫລ ແລະ CDB ໄດ້ປຶກສາຫາລື ແລະ ເຮັດວຽກຮ່ວມກັນຫຼາຍຄັ້ງກ່ຽວກັບການຄົ້ນຄວ້າເອກະສານສັນຍາຕ່າງໆ. ມາຮອດວັນທີ 9 ກໍລະກົດ ນີ້, ທາງສອງຝ່າຍເຫັນດີ ລົງນາມໃນສັນຍາເງິນກູ້ດັ່ງກ່າວ. ພາຍຫຼັງມີການເຊັນສັນຍາເງິນກູ້ ແລະ ໄດ້ຮັບການເຫັນດີເບີກຖອນເງິນກູ້ຈາກທະນາຄານ CDB ຄາດວ່າຈະມີກຳລັງແຮງທາງດ້ານແຫຼ່ງເງິນທຶນ ສົມທົບກັບແຫຼ່ງທຶນຂອງທະນາຄານທຸລະກິດພາຍໃນປະເທດໃນການຊຸກຍູ້ວຽກງານການເຂົ້າເຖິງແຫຼ່ງທຶນ ແລະ ສ້າງຄວາມເຂັ້ມແຂງຂອງ SMEs ຫຼາຍຂຶ້ນ. ບັນດາຫົວໜ່ວຍ SMEs ຈະສ້າງຜະລິດຕະພັນໃນການສົ່ງອອກ ລວມທັງສົ່ງອອກໄປ ສປ ຈີນ ແລະ ສົ່ງເສີມປີທ່ອງທ່ຽວລາວ-ຈີນ. ນອກນັ້ນ, ຍັງຈະປະກອບສ່ວນເຂົ້າໃນການປັບປຸງລະບົບທະນາຄານຢູ່ ສປປ ລາວ ກ່ຽວກັບການຈັດຕັ້ງປະຕິບັດກົນໄກສະໜອງສິນເຊື່ອ ເພື່ອ SMEs ດີຂຶ້ນ ແລະຈະຊ່ວຍຊຸກຍູ້ຈັງວະການຂະ ຫຍາຍຕົວຂອງເສດຖະກິດ ສປປ ລາວ ຕາມແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 8 ທີ່ກຳນົດໄວ້. (ຂ່າວ-ພາບ: ຣັດສະໝີ ດວງສັດຈະ)