ງານວາງສະແດງຜະລິດຕະພັນລາວ ມີສິນຄ້າທີ່ເປັນ ເອກະລັກຂອງທ້ອງຖິ່ນມາວາງຂາຍ


...

23.07.2019 9:14     

   ງານວາງສະແດງຜະລິດຕະພັນລາວ 2019 ມີຜູ້ປະກອບການນຳເອົາຜະລິດຕະພັນເຂົ້າມາວາງຂາຍ 117 ບໍລິສັດ, ໃນນັ້ນ ມີຜະລິດຕະພັນທີ່ເປັນເອກະລັກ ຂອງແຕ່ລະແຂວງ ເພື່ອເປັນການໂຄສະນາສິນຄ້າໃຫ້ສັງຄົມລາວໄດ້ຮັບຮູ້. ພິທີເປີດງານດັ່ງກ່າວຢ່າງເປັນທາງການ ໄດ້ຈັດຂຶ້ນໃນວັນທີ 22 ກໍລະກົດນີ້ ທີ່ສູນການຄ້າ ລາວ-ໄອເຕັກ ໂດຍການໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ກ່າວວ່າ: ງານວາງສະແດງຄັ້ງນີ້ໄດ່້ມີຜູ້ປະກອບການ, ຜູ້ຜະລິດສິນຄ້າໃນທຸກຂະແໜງໃນທົ່ວປະເທດ ນຳເອົາຜະລິດຕະພັນທີ່ເປັນເອກກະລັກຂອງແຕ່ລະແຂວງມາວາງສະແດງ ເພື່ອໂຄສະນາ ແລະ ຈຳໜ່າຍ ແນ ໃສ່ຍົກລະດັບການຜະລິດການ ຈຳໜ່າຍພາຍໃນໃຫ້ນັບມື້ຂະ ຫຍາຍຕົວ, ມີຄຸນນະພາບ, ໄດ້ມາດຕະຖານ ແລະ ກ້າວຂຶ້ນສູ່ລະດັບສາກົນ ແລະ ເປັນການສ້າງຄວາມພາກພູມໃຈຕໍ່ສິນຄ້າ-ຜະລິດຕະພັນທີ່ຜະລິດໃນ ສປປ ລາວ ແລະ ກໍແມ່ນກິດຈະກຳໜຶ່ງຂອງພາກທຸລະກິດ ເພື່ອສະໜັບສະໜູນປີທ່ອງທ່ຽວລາວ-ຈີນ ໃນການດຶງດູດນັກທ່ອງທ່ຽວ ແລະ ນັກລົງທຶນເຂົ້າມາລາວໃຫ້ນັບມື້ຫຼາຍຂຶ້ນ, ຊຶ່ງງານໄດ້ເລີ່ມວາງສະແດງ ແລະ ຈຳໜ່າຍສິນຄ້າມາແຕ່ວັນທີ 20 ກໍລະກົດ 2019 ເປັນຕົ້ນມາ ໂດຍມີທັງໝົດ 171 ຫ້ອງ ຈາກ 117 ບໍລິສັດເຂົ້າຮ່ວມ ຊຶ່ງມາຈາກ 17 ແຂວງ ໃນນີ້ຜະລິດຕະພັນດີເດັ່ນຈາກ 17 ແຂວງ ລວມມີ: ຊາຜົ້ງສາລີ, ຜ້າຝ້າຍບໍ່ແກ້ວ, ຫັດຖະກຳອຸດົມໄຊ, ສິ້ນຊຳເໜືອ, ຫັດຖະກຳຫຼວງພະບາງ, ເຂົ້າໄກ່ນ້ອຍຊຽງຂວາງ, ຫວາຍແຂວງວຽງຈັນ, ໝໍ້ແປງ ບໍລິຄຳໄຊ, ເສັ້ນລ້ອນໄຊສົມບູນ, ກາເຟປາກຊ່ອງ, ໄມ້ແກະສະຫຼັກ ອັດຕະປື ແລະ ສິນຄ້າເອກະລັກອື່ນໆຂອງແຕ່ລະແຂວງ ຊຶ່ງໄດ້ຄັດເລືອກມາວາງສະແດງໃນງານຄັ້ງນີ້ ສິນຄ້າຕົ້ນຕໍລວມມີ: ຜະລິດຕະພັນຫັດຖະກຳ, ເຄື່ອງປະດັບ, ເຂົ້າ, ຊາ, ກາເຟ, ຜະລິດຕະ ພັນ ອາຫານ, ເຄື່ອງດື່ມ, ຜະລິດຕະພັນໄມ້ແປຮູບ, ເຟີນີເຈີໄມ້, ເຄື່ອງຕົບແຕ່ງທີ່ຜະລິດຈາກໄມ້, ຜະລິດຕະພັນຮູບເງົາຂອງລາວ, ການບໍລິການ ການຄ້າ ແລະ ອື່ນໆ ງານວາງສະແດງຜະລິດຕະພັນລາວ 2019 ຄັ້ງນີ້ຈະໄດ້ດຳເນີນໄປຮອດວັນທີ 28 ກໍລະກົດຈະເຖິງນີ້. ພາຍໃນງານຈະມີ ກອງປະຊຸມສຳມະນາໃນຫົວຂໍ້ຕ່າງໆສຳລັບວິສາຫະກິດຂະໜາດນ້ອຍ ແລະ ກາງຂອງລາວ ແລະ ການພົບປະທຸລະກິດ ສະ ມາຊິກສະພາການຄ້າ ແລະ ອຸດສາຫະກຳແຫ່ງຊາດລາວ. (ຂ່າວ-ພາບ: ພູວຽງຄຳ)