ທ່ານນາຍົກຮຽກຮ້ອງໃຫ້ນັກທຸລະກິດແມ່ຍິງສົ່ງເສີມ ການຜະລິດຂອງປະຊາຊົນໃຫ້ຫຼາຍຂຶ້ນ


...

29.07.2019 8:39     

   ສະມາຄົມນັກທຸລະກິດຍິງ (ສທຍລ) ຮ່ວມກັບສູນກາງສະຫະພັນແມ່ຍິງລາວໄດ້ຈັດກອງປະຊຸມພົບປະນັກທຸລະ ກິດແມ່ຍິງທົ່ວປະເທດ ພາຍໃຕ້ຄຳຂວັນ "ການສ້າງແຮງຈູງໃຈໃນການດຳເນີນທຸລະກິດເພື່ອກ້າວໃຫ້ທັນກັບຍຸກດີຈີຕອນ" ຂຶ້ນໃນວັນທີ 26 ກໍລະກົດນີ້, ທີ່ໂຮງແຮມແລນມາກ, ເປັນກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາຄະນະບໍລິຫານງານສະມາຄົມ, ສະມາຊິກສະມາຄົມນັກທຸລະກິດຍິງ ແລະ ຜູ້ປະກອບການແມ່ຍິງລາວທົ່ວປະເທດເຂົ້າຮ່ວມ. ທ່ານ ນາງ ຈັນທະຈອນ ວົງໄຊ ປະທານສະມາຄົມນັກ ທຸລະກິດແມ່ຍິງລາວ ໄດ້ຂຶ້ນຜ່ານບົດສະຫຼຸບການເຄື່ອນ ໄຫວ 6 ເດືອນຕົ້ນປີ ແລະ ແຜນ 6 ເດືອນທ້າຍປີ 2019 ວ່າ: ໃນໄລຍະ 6 ເດືອນຜ່ານມາ ທາງສະມາຄົມນັກທຸລະກິດແມ່ຍິງລາວ ໄດ້ປະຕິບັດໜ້າທີ່ພາລະບົດບາດເປັນໃຈກາງເຕົ້າໂຮມຄວາມສາມັກຄີສົ່ງເສີມຫົວຄິດປະດິດສ້າງ, ສົ່ງເສີມທາງດ້ານວິຊາການ ແລະ ນຳພາເຄື່ອນໄຫວດຳເນີນທຸລະກິດໄດ້ເປັນ ຢ່າງດີ, ໄດ້ປຸກລະດົມ ໃຫ້ສະມາຊິກປະກອບສ່ວນບໍລິຈາກວັດຖຸ ຊັບສິນ ທຶນຮອນຂອງສະມາຄົມ ແລະ ຂອງສະມາຊິກ ສທຍລ ເພື່ອຊ່ວຍເຫຼືອສັງຄົມໄດ້ຢ່າງຫຼວງຫຼາຍ ທັງນີ້ເພື່ອປະກອບສ່ວນເຂົ້າໃນການພັດທະນາເສດຖະກິດສັງຄົມ ແລະ ພັດທະນາປະເທດຊາດ, ມາເຖິງປັດຈຸບັນສະມາຄົມໄດ້ມີຄວາມເຕີບໃຫຍ່ເຂັ້ມແຂງ, ສະແດງອອກຫຼາຍຄົນໄດ້ພັດ ທະນາເສດຖະກິດຕາມຫຼັກ ວິຊາການອັນໃໝ່ ທີ່ ທັນສະໄໝຕາມຍຸກດີຈີຕອນ. ໃນໂອກາດນີ້, ທ່ານ ທອງລຸນ ສີສຸລິດໄດ້ໃຫ້ກຽດໂອ້ລົມເພື່ອເປັນເຂັມຊີ້ທິດເຍືອງທາງໃຫ້ແກ່ສະມາຄົມນັກທຸລະກິດຍິງ ຊຶ່ງກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານອັນໃຫຍ່ຫຼວງທີ່ເອື້ອຍນ້ອງແມ່ຍິງຍາດມາໄດ້ ເວົ້າສະເພາະໃນຍຸກສະໄໝໃໝ່ນີ້ບັນດາແມ່ຍິງໄດ້ມີບົດບາດ ມີຄວາມເຕີບໃຫຍ່ເຂັ້ມແຂງຂຶ້ນ ແລະ ມີຄວາມສະເໝີພາບຍິງຊາຍ ໃນການພັັດທະນາປະເທດຊາດ ສະແດງອອກແມ່ຍິງໄດ້ມີບົດບາດສຳຄັນຢູ່ໃນຫຼາຍຕຳແໜ່ງງານເຊັ່ນ: ນັກບໍລິຫານທີ່ດີເດັ່ນ, ນັກການທູດ, ນັກວິທະຍາສາດ, ນັກປະດິດຄິດແຕ່ງ, ນັກອະນຸລັກ ແລະ ເປັນຜູ້ຮັກສາຮີດຄອງປະເພນີອັນດີງາມຂອງຊາດແຕ່ແນວໃດກໍ່ຕາມແມ່ຍິງກໍຕ້ອງໄດ້ເພີ່ມທະວີບຸກບືນຕົວຫຼາຍກວ່າເກົ່າ ໂດຍການນຳໃຊ້ຈຸດແຂງທີ່ມີຢູ່ ໃນແມ່ຍິງລາວຄື ຄວາມດຸໝັ່ນຂະຫຍັນພຽນຄວາມອ່ອນໂຍນ ຄວາມປະຢັດ ແລະ ມີຫຼັກການ ແລະ ມີຈະລິຍະທຳ ໂດຍໃຫ້ ບັນດາແມ່ຍິງຂຸດຄົ້ນອອກມາໝູນໃຊ້ໃຫ້ໄດ້ຢ່າງເຕັມສ່ວນ ພ້ອມນັ້ນກໍ່ຮຽກຮ້ອງໃຫ້ນັກ ທຸລະກິດຍິງປະກອບສ່ວນໃນການສ້າງຜະລິດຕະພັນ ກໍຄື ສິນຄ້າລາວ ໃຫ້ມີຄຸນນະພາບດຶງດູດໃຫ້ຜູ້ບໍລິໂພກຫັນມາຊົມໃຊ້ສິນຄ້າລາວໃຫ້ຫຼາຍຂຶ້ນ ໄປຄຽງຄູ່ກັບການຊຸກຍູ້ການດຳເນີນທຸລະກິດຂະໜາດນ້ອຍ ແລະ ກາງ ນອກຈາກນັ້ນກໍ່ຮຽກຮ້ອງໃຫ້ຜູ້ປະກອບການຍິງນຳໃຊ້ທຶນ ຮອນທີ່ມີລົງໄປຊຸກຍູ້ສົ່ງເສີມປະຊາຊົນຜະລິດເປັນສິນຄ້າແລ້ວເກັບຊື້ມາຈຳໜ່າຍຊ່ວຍສ້າງວຽກເຮັດງານທຳໃຫ້ກັບປະຊາຊົນທ້ອງຖິ່ນເພື່ອແກ້ໄຂຄວາມທຸກຍາກ ສ້າງລາຍໄດ້ແກ່ປະຊາຊົນ ພ້ອມທັງຊຸກຍູ້ການຈັດປະຕິບັດແນວທາງ ນະໂຍບາຍຂອງລັດຖະບານ ແລະ ຊຸກຍູ້ການສົ່ງອອກຜະລິດຕະພັນກະສິກໍາໃຫ້ຫຼາຍຂຶ້ນເພື່ອເປັນໃບໜ້າໃຫ້ແກ່ປະເທດຊາດ. (ຂ່າວ-ພາບ:ພູວັນ)