ຮອງນາຍົກ ເຄື່ອນໄຫວຊຸກຍູ້ວຽກງານ ຢູ່ລັດວິສາຫະກິດລາວບໍລິການສິນຄ້າຜ່ານແດນ


...

06.08.2019 10:11     

   ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະ ມົນຕີກະຊວງການເງິນ ໄດ້ໄປ ເຄື່ອນໄຫວຢ້ຽມຢາມ ແລະ ຊຸກ ຍູ້ການຈັດຕັ້ງປະຕິບັດວຽກງານຢູ່ລັດວິສາຫະກິດ ລາວບໍລິການສິນຄ້າຜ່ານແດນ (ລລບສ), ເມື່ອວັນທີ 2 ສິງຫາຜ່ານມາ ໂດຍການຕ້ອນຮັບຂອງທ່ານ ສຸລິຍາ ມະນີວົງ ຜູ້ອໍານວຍການໃຫຍ່ລັດວິສາຫະກິດ ລາວບໍລິການສິນຄ້າຜ່ານແດນ, ມີຄະນະຜູ້ອໍານວຍການໃຫຍ່ ລລບສ, ພາກສ່ວນກ່ຽວຂ້ອງເຂົ້າຮ່ວມ.ທ່ານ ສຸລິຍາ ມະນີວົງ ໄດ້ລາຍງານໂດຍສັງເຂບກ່ຽວກັບການຈັດຕັ້ງປະຕິບັດວຽກງານຂອງ ລລບສ ຕໍ່ທ່ານ ຮອງນາຍົກລັດຖະມົນຕີ ຊາບວ່າ: ລລບສ ສ້າງຕັ້ງໃນວັນທີ 1 ເມສາ 2008 ຕາມຂໍ້ຕົກລົງຂອງລັດຖະມົນຕີກະຊວງການເງິນ, ສຳນັກງານໃຫຍ່ຕັ້ງຢູ່ບ້ານທ່ານາແລ້ງ ເມືອງຫາດຊາດຟອງ ນະຄອນຫຼວງວຽງຈັນ, ປະ ກອບມີ 3 ສາຂາຄື: ສາຂາແຂວງ ບໍ່ແກ້ວ ປະຈໍາດ່ານສາກົນຂົວມິດຕະພາບລາວ-ໄທ ແຫ່ງທີ 4, ສາຂາແຂວງ ຄໍາມ່ວນ ປະຈໍາດ່ານສາກົນຂົວມິດຕະພາບລາວ-ໄທ ແຫ່ງທີ 3, ສາຂາແຂວງຈຳປາສັກ ປະຈໍາດ່ານສາກົນວັງເຕົ່າມີ 3 ໜ່ວຍບໍລິການ ຄື: ໜ່ວຍບໍລິການນາເພົ້າ ປະ ຈໍາດ່ານສາກົນນາເພົ້າຊາຍ ແດນລາວ-ຫວຽດນາມ,ໜ່ວຍ ບໍລິການປາກຊັນ ປະຈໍາດ່ານສາກົນປາກຊັນຊາຍແດນລາວ-ໄທ, ໜ່ວຍບໍລິການລານຕູ້ຄອນເທັນເນີ cy ແລະ ມີ 2 ບໍລິສັດຮ່ວມທຶນຄື: ລັດວິສາຫະກິດ ລາວບໍລິການທ່າເຮືອຫວຸງອ່າງ ສສ ຫວຽດນາມ, ບໍລິສັດ ລາວສາກົນ ໄອຊີດີ ຈຳກັດ ປະຈໍາດ່ານພາສີສາກົນບໍ່ເຕ່ນ-ບໍ່ຫານຊາຍແດນລາວ-ຈີນ. ການດໍາເນີນທຸລະກິດບໍລິການຮັບຝາກສິນຄ້າເຄື່ອງຂອງ, ພາຫະນະທຸກປະເພດ, ມີສາງປິດ,ສາງຮົ່ມ, ສາງກາງແຈ້ງໃຫ້ເຊົ່າ, ບໍລິການຕິດສັ່ງນໍ້າໜັກ, ຍົກຍໍ-ຄ່ຽນຖ່າຍສິນຄ້າດ້ວຍກົນຈັກໜັກທີ່ທັນສະໄໝ ແລະ ແຮງງານ, ສາງເກັບມ້ຽງຕູ້ຄອນເທັນເນີ, ພິມໃບແຈ້ງພາສີເອເລັກໂຕຣນິກ (ASYCUDA) ແລ່ນເອກະສານສິນຄ້ານໍາເຂົ້າ, ສົ່ງອອກ, ນຳເຂົ້າເພື່ອສົ່ງອອກ ແລະ ຜ່ານແດນ (CUSTOMS CLEARANCE), ຈັດສົ່ງ-ຂົນສົ່ງສິນຄ້າພາຍໃນ ແລະ ຕ່າງປະເທດ, ບໍລິການໃຫ້ຄໍາປຶກສາດ້ານເອກະສານ, ນໍາເຂົ້າເພື່ອສົ່ງອອກ-ສິນຄ້າຜ່ານແດນ ແລະ ອື່ນໆ. ສ່ວນຜົນປະກອບການໃນການດໍາເນີນທຸລະກິດຂອງ ລລບສ ມາຮອດທ້າຍເດືອນມິຖຸນາ 2019 ສາມາດສ້າງລາຍຮັບໄດ້ທັງໝົດ 23 ຕື້ກວ່າກີບເທົ່າກັບ 45,16% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາເທົ່າກັບ 103,35%, ດ້ານລາຍຈ່າຍ 15,3 ຕື້ກວ່າກີບເທົ່າກັບ 43,24% ຂອງແຜນການປີ,ທຽບໃສ່ໄລຍະດຽວກັນຂອງປີຜ່ານມາເທົ່າກັບ 108,68% ແລະ ມີກໍາໄລ 7,74 ຕື້ກີບເທົ່າກັບ 49,53% ຂອງແຜນການປີ 2019 ແຕ່ຖ້າທຽບໃສ່ໄລຍະດຽວກັນຂອງປີຜ່ານມາເທົ່າກັບ 94,20%. ໂອກາດນີ້, ທ່ານ ສົມດີ ດວງດີ ໄດ້ເນັ້ນໃຫ້ຄະນະ ລລບສ ເອົາໃຈໃສ່ສູ້ຊົນປະຕິ ບັດໂຕເລກຄາດ ໝາຍ, ສ້າງຜະ ລິດຕະພັນດ້ານການບໍລິການຕົ້ນຕໍຂອງວິສາຫະກິດໃຫ້ບັນລຸ ຕາມແຜນການ, ເອົາໃຈໃສ່ການປະຢັດມັດທະຍັດໃຫ້ມີປະສິດທິຜົນສູງ, ສືບຕໍ່ຈັດຕັ້ງປະຕິບັດແຜນການດຳເນີນທຸລະກິດ, ເລັ່ງພັດທະນາຂະ ຫຍາຍກິດຈະການຕາມແຜນ ການ, ສືບຕໍ່ປະສານສົມທົບກັບຂະແໜງການກ່ຽວຂ້ອງພາກລັດ ແລະ ເອກະຊົນ, ເພື່ອເຮັດ ໃຫ້ການດຳເນີນທຸລະກິດມີຄວາມເຂັ້ມແຂງ, ປັບປຸງຄືນລາຄາການບໍລິການໃຫ້ແທດ ເໝາະກັບສະພາບການໃນປັດຈຸບັນ ເພື່ອເປັນການດຶງດູດໃຫ້ຜູ້ປະກອບການມາໃຊ້ບໍລິການນັບມື້ນັບຫຼາຍຂຶ້ນ ແລະ ບັນຫາອື່ນໆທີ່ຕິດພັນກັບການດຳເນີນທຸລະກິດຂອງລັດວິສາຫະກິດ ລາວບໍລິການສິນຄ້າຜ່ານແດນ. (ຂ່າວ-ພາບ: ກະຊວງການເງິນ)