ທ່ານນາຍົກລັດຖະມົນຕີ ລົງຊຸກຍູ້ການພັດທະນາ ຢູ່ເມືອງວັງວຽງ


...

...

09.08.2019 10:26     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດວ້ຍ ລັດຖະມົນຕີ, ຮອງລັດຖະມົນ ຕີ ແລະ ເຈົ້າແຂວງໆວຽງຈັນ ໄດ້ໄປຢ້ຽມຢາມ ແລະ ຊຸກຍູ້ ການພັດທະນາເມືອງວັງວຽງ ແຂວງວຽງຈັນ ເມື່ອວັນທີ 8 ສິງຫານີ້ ໂດຍມີທ່ານ ຄຳຜອງ ດວງວິໄລ ເຈົ້າເມືອງໆວັງວຽງ ພ້ອມດ້ວຍຄະນະ ແລະ ອຳນາດການປົກຄອງໃຫ້ການຕ້ອນ-ຮັບຢ່າງອົບອຸ່ນ. ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ໄປຢ້ຽມຢາມ ແລະ ຕິດຕາມເບິ່ງຈຸດກໍ່ສ້າງສະຖານີລົດໄຟວັງວຽງ, ເຫັນວ່າ: ເສັ້ນທາງລົດ ໄຟ ລາວຈີນ ຜ່ານແຂວງວຽງຈັນ ມີຄວາມຍາວທັງໝົດ 145 ກິ-ໂລ-ແມັດ, ຜ່ານ 4 ເມືອງ, 60 ບ້ານ, ມີຜູ້ໄດ້ຮັບຜົນກະທົບ 1.589 ຄອບຄົວ, ມາຮອດປັດຈຸບັນ ໄດ້ໄກ່ເກ່ຍທີ່ດິນ ແລະ ສິ່ງກີດຂວາງການກໍ່ສ້າງທາງລົດໄຟສໍາເລັດ 99% ແລະ ສືບຕໍ່ດຳເນີນການຊົດເຊີຍໃຫ້ແກ່ປະຊາຊົນ ທີ່ໄດ້ຮັບຜົນກະທົບຈາກໂຄງການດັ່ງກ່າວ. ສຳລັບສະຖານີລົດໄຟວັງວຽງ ແມ່ນຕັ້ງຢູ່ບ້ານຫ້ວຍສະເຫງົ້າ-ພູດິນແດງ, ຫ່າງຈາກເທດສະບານເມືອງວັງວຽງປະມານ 2 ກິໂລແມັດ, ຫ່າງຈາກເສັ້ນທາງເລກທີ 13 ເໜືອ 300 ແມັດ, ມີເນື້ອທີ່ທັງໝົດ 144 ກວ່າເຮັກຕາ, ສະເພາະເນື້ອທີ່ອາຄານສະຖານີ ມີ 5.000 ຕາແມັດ ແລະ ສາມາດຮອງຮັບຜູ້ໂດຍສານໄດ້ 600 ຄົນ. ປັດຈຸບັນ ໄດ້ສຳເລັດການອອກແບບ, ສຳເລັດການບຸກເບີກພື້ນທີ່ ແລະ ກະກຽມເພື່ອດຳເນີນການກໍ່ສ້າງ ຊຶ່ງຄາດວ່າຈະສໍາເລັດການກໍ່ສ້າງ ພາຍໃນປີ 2021. ໃນໂອກາດນີ້, ທ່ານ ນາຍົກລັດຖະມົນຕີ ໄດ້ຊີ້ນຳ ໃຫ້ຜູ້ພັດທະນາໂຄງການເອົາ ໃຈໃສ່ປະຕິບັດວຽກງານສຳເລັດຕາມແຜນການທີ່ວາງໄວ້ ແລະ ໃຫ້ມີຄຸນນະພາບ, ການກໍ່ສ້າງ ໃຫ້ເປັນໄປຕາມການອອກແບບ ທີ່ໄດ້ຮັບຮອງ, ສິ່ງສຳຄັນ ໂຄງສ້າງຕ່າງໆ ຕ້ອງໃຫ້ກົມກືນກັບທຳມະຊາດ ກໍຄືແຫຼ່ງທ່ອງທ່ຽວ ຂອງເມືອງວັງວຽງ. ຫຼັງຈາກນັ້ນ, ທ່ານນາຍົກລັດຖະມົນຕີ ໄດ້ໄປຢ້ຽມຢາມສູນບໍລິການເຕັກນິກກະສິກຳ ແລະ ໄດ້ຊີ້ນຳໃຫ້ສູນດັ່ງກ່າວ ເອົາໃຈໃສ່ການປູກພຶດປອດສານພິດ, ພືດລົ້ມລຸກ ໂດຍໃຫ້ຕິດພັນກັບການສົ່ງເສີມການທ່ອງທ່ຽວ. ພ້ອມນີ້, ໄດ້ຢ້ຽມ ຢາມສະຖານທີ່ທ່ອງທ່ຽວທຳມະຊາດ ຖໍ້ານາງຟ້າ ແລະ ຖໍ້ານອນ ໂດຍໄດ້ແນະນຳໃຫ້ຜູ້ພັດທະນາ ເອົາໃຈໃສ່ການອະນຸລັກທຳມະຊາດ ແລະ ຄວາມປອດໄພໃຫ້ແກ່ນັກທ່ອງທ່ຽວ.

...

ໃນຕອນບ່າຍຂອງວັນດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ພະ-ນັກງານຫັຼກແຫຼ່ງຂອງເມືອງວັງວຽງ, ພະນັກງານອາວຸໂສບຳນານ ແລະ ນັກທຸລະກິດຈຳນວນໜຶ່ງ ທີ່ສະໂມສອນຂອງເມືອງວັງວຽງ. ກ່ອນອື່ນ ແມ່ນໄດ້ຮັບຟັງການລາຍງານສະພາບການພັດທະນາເສດຖະກິດສັງຄົມຂອງເມືອງ ໃນໄລຍະ 6 ເດືອນຜ່ານມາ ຈາກທ່ານເຈົ້າເມືອງໆວັງວຽງ, ຊຶ່ງທົ່ວເມືອງ ຍັງສືບຕໍ່ມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະ ຫຍາຍຕົວຢ່າງຕໍ່ເນື່ອງ, ດ້ານການສຶກສາ ແລະ ວັດທະນະທຳ ຕິດພັນກັບການພັດ-ທະນາຊົນນະບົດ ແລະ ລບລ້າງຄວາມທຸກຍາກຂອງປະຊາຊົນ ກໍ່ນັບມື້ດີຂຶ້ນເປັນກ້າວໆ. ຫຼັງຈາກນັ້ນ, ທ່ານນາຍົກລັດຖະມົນຕີ ໄດ້ສະເໜີໃຫ້ບັນດາທ່ານ ລັດຖະມົນຕີ ກະຊວງກ່ຽວຂ້ອງ ຊີ້ແຈງຕໍ່ບາງບັນຫາທີ່ທາງເມືອງ ສະເໜີ ແລະ ບາງບັນຫາພົ້ນເດັ່ນ ເປັນຕົ້ນການປ້ອງກັນ ແລະ ແກ້ໄຂການລະບາດຂອງພະຍາດໄຂ້ເລືອດອອກ; ການ ສົ່ງເສີມການຜະລິດກະສິກຳອິນຊີ, ການປູກພືດປອດສານພິດ ຕິດພັນກັບການຊຸກຍູ້ສົ່ງເສີມານທ່ອງທ່ຽວ, ການ ຕິດຕາມ ເຝົ້າລະວັງການລະບາດຂອງພະຍາດອາຫິວາໝູອາຟຣິກາ; ການສ້າງ ແລະ ປັບປຸງເສັ້ນທາງເຂົ້າແຫຼ່ງທ່ອງທ່ຽວ ແລະ ການຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບຈາກທາງລົດໄຟ. ຕໍ່ການພັດທະນາຂອງເມືອງວັງວຽງໃນປັດຈຸບັນ, ທ່ານນາຍົກລັດຖະມົນຕີ ໄດ້ມີຄຳເຫັນວ່າ ເມືອງວັງວຽງ ໄດ້ຮັບ ການພັດທະນາ ແລະ ມີຫຼາຍອັນປ່ຽນແປງໃໝ່, ແຕ່ເຖິງຢ່າງໃດກໍຕາມ ຍັງມີບາງບັນຫາທີ່ຕ້ອງໄດ້ເອົາໃຈໃສ່ປັບປຸງແກ້ໄຂເປັນຕົ້ນການພັດທະນາເມືອງວັງວຽງ ຍັງບໍ່ທັນໄປຕາມຜັງເມືອງ ຢ່າງເຄັ່ງຄັດ, ຂາດການວາງ ແຜນພັດທະນາການທ່ອງທ່ຽວທີ່ດີ ແລະ ຍືນຍົງ, ບັນຫາລາ ຄາສິນຄ້າ ແລະ ຄ່າບໍລິການແພງ, ບັນຫາຄວາມສະອາດ, ຄວາມເປັນລະບຽບຮຽບຮ້ອຍ, ບັນຫາການຄຸ້ມຄອງການປ່ອຍນຳ້ເສຍລົງແມ່ນຳ້... ສະນັ້ນ ເພື່ອສືບຕໍ່ພັດທະນາເມືອງວັງວຽງ ໃຫ້ເປັນເມືອງທ່ອງທ່ຽວຢ່າງແທ້ຈິງ, ທ່ານນາຍົກລັດຖະມົນຕີ ໃຫ້ທິດຊີ້ນຳ ແກ່ການນຳຫຼັກແຫຼ່ງ ແລະ ພະນັກງານຂອງເມືອງວັງວຽງ ໃຫ້ເອົາໃຈໃສ່ຕື່ມ ເປັນຕົ້ນໃຫ້ເມືອງວັງວຽງ ກໍຄືແຂວງວຽງຈັນ ຊອກໃຫ້ເຫັນທ່າແຮງແທ້ຈິງຂອງເມືອງວັງວຽງ ແລະ ນຳໃຊ້ທ່າແຮງດັ່ງ ກ່າວຢ່າງຖືກຕ້ອງ, ຍືນຍົງ ແລະ ມີປະສິດທິຜົນສູງ; ໃຫ້ກະຊວງກ່ຽວຂ້ອງ ສົມທົບ ກັບແຂວງວຽງຈັນ ສ້າງແຜນຜັງ ແລະ ຍຸດທະ ສາດການພັດທະນາເມືອງວັງວຽງ ເພື່ອເປັນບ່ອນອີງໃນການພັດທະນາ ແລະ ພິຈາລະນາອະນຸມັດໂຄງການ ຫຼື ທຸ-ລະກິດຕ່າງໆ; ເອົາໃຈໃສ່ຕິດຕາມ, ກວດກາ, ຄຸ້ມຄອງລາຄາສິນຄ້າ, ຄ່າທີ່ພັກ, ລາ-ຄາອາ-ຫານ ໃຫ້ຖືກຕ້ອງເໝາະສົມ, ບໍ່ໃຫ້ສູງເກີນ ຄວາມເປັນຈິງ; ສົ່ງເສີມການຜະລິດກະສິກຳສະອາດ ແລະ ປູກພືດປອດສານພິດ; ຕ້ອງເຂັ້ມງວດຕໍ່ການປົກປັກ ຮັກສາສິ່ງແວດລ້ອມ, ຫ້າມການປ່ອຍນຳ້ເປື້ອນ, ຫ້າມການຖິ້ມຂີ້ເຫຍື້ອຊະຊາຍ, ຕະຫຼອດຮອດຫ້າມການສ້າງຮ້ານບັນເທິງ ທີ່ບໍ່ຖືກຕ້ອງ, ບໍ່ແທດເໝາະກັບເງື່ອນໄຂຕົວຈິງ ແລະ ເພີ່ມປະສິດທິພາບ ແລະ ເພີ່ມທະວີການຄຸ້ມຄອງ ເມືອງວັງວຽງ ໃຫ້ເປັນເມືອງທຳມະຊາດ ແລະ ວັດທະນະທຳ ຢ່າງແທ້ຈິງ. (ຂ່າວ+ພາບ: ສນຍ)