ທ່ານ ສອນໄຊ ສີພັນດອນ ເຂົ້າຮ່ວມງານ CAEXP ຄັ້ງທີ 16 ທີ່ໜານໜິງ


...

24.09.2019 8:40     

   ງານວາງສະແດງສິນຄ້າຈີນ - ອາຊຽນ ຄັ້ງທີ 16 (CAEXPO) ແລະ ກອງປະຊຸມສຸດຍອດທຸລະກິດ ແລະ ການລົງທຶນ ຈີນ - ອາຊຽນຄັ້ງທີ 16 (CABIS) ຢູ່ນະຄອນໜານໜິງ ແຂວງກວາງຊີ ປະເທດຈີນ ຈັດຂຶ້ນລະຫວ່າງ ວັນທີ 21-24 ກັນຍານີ້ ໂດຍການເປັນປະທານຂອງທ່ານ ຮັນເຈິ້ງ ຮອງນາຍົກລັດຖະມົນຕີ ແຫ່ງ ສປຈີນ, ມີບັນດາຮອງນາຍົກລັດຖະມົນຕີບັນດາປະເທດອາຊຽນ ແລະ ອົງການຈັດຕັ້ງສາກົນຈຳນວນໜຶ່ງເຂົ້າຮ່ວມ. ສຳລັບຄະນະຜູ້ແທນ ສປປ ລາວ ແມ່ນນຳໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ. ງານວາງສະແດງຄັ້ງນີ້ ພາຍໃຕ້ຄຳຂວັນ "ສ້າງໜຶ່ງແລວໜຶ່ງເສັ້ນທາງ ເພື່ອຫັນເປັນວິໄສທັດປະຊາຄົມຮ່ວມຊາຕາກຳ ໃຫ້ປະກົດຜົນເປັນຈິງ". ຈຸດປະສົງຂອງງານ ແມ່ນແນໃສ່ສົ່ງເສີມການຮ່ວມມື, ແລກປ່ຽນ ລະຫວ່າງປະເທດອາຊຽນ ແລະ ຈີນ ໃນຂົງເຂດເສດຖະກິດ, ການຄ້າ ການລົງທຶນ ແລະ ການ ທ່ອງທ່ຽວ ກໍຄືສົ່ງເສີມທາງດ້ານວັດທະນະທຳ, ຄວາມເຂົ້າອົກເຂົ້າໃຈ ຊຶ່ງກັນ ແລະ ກັນ. ໃນພິທີເປີດງານ CAEXPO , ທ່ານ ສອນໄຊ ສີພັນດອນ ໄດ້ກ່າວສະແດງຄວາມຂອບໃຈມາຍັງລັດຖະບານ ແລະ ປະຊາຊົນຈີນ ທີ່ຍາມໃດກໍໄດ້ໃຫ້ຄວາມສຳຄັນຕໍ່ອາຊຽນ ລວມທັງ ສປປ ລາວ. ຕະຫຼອດໄລຍະ 16 ປີທີ່ຜ່ານມາ, ງານວາງສະແດງສິນຄ້າຈີນ-ອາຊຽນ ໄດ້ປະກອບສ່ວນສຳຄັນເຂົ້າໃນການຮັດແໜ້ນການຮ່ວມມືທາງດ້ານເສດຖະກິດ,ການຄ້າການລົງທຶນ ແລະ ການທ່ອງທ່ຽວລະຫວ່າງອາຊຽນ ແລະ ຈີນ ອັນໄດ້ເຮັດໃຫ້ ສປ ຈີນ ກາຍເປັນຄູ່ຄ້າອັນດັບໜຶ່ງ ແລະ ເປັນອັນດັບສາມການລົງທຶນຕ່າງປະເທດໃນອາຊຽນ. ພ້ອມກັນນັ້ນ ກໍເປັນການສົ່ງເສີມການຮ່ວມມືທາງດ້ານວັດທະນະທຳ, ການໄປມາຫາສູ່, ການສ້າງຄວາມເຂົ້າໃຈ ລະຫວ່າງ ຈີນ ແລະ ອາຊຽນ. ພ້ອມກັນນີ້, ທ່ານ ຮອງນາຍົກລັດຖະມົນຕີ ຍັງໄດ້ຕີລາຄາສູງຕໍ່ຜົນສຳເລັດການຈັດຕັ້ງປະຕິບັດຂໍ້ລິເລີ່ມ ໜຶ່ງແລວໜຶ່ງເສັ້ນທາງ ຊຶ່ງໄດ້ນຳເອົາຜົນປະໂຫຍດມາສູ່ບັນດາປະເທດໃນພາກພື້ນ ແລະ ໃນໂລກ. ທັງໝົດນີ້ ໄດ້ປະກອບສ່ວນເຂົ້າໃນການສ້າງສັນຕິພາບ, ສະຖຽນລະພາບ ແລະ ຄວາມວັດທະນາຖາວອນ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ. ພ້ອມກັນນີ້, ທ່ານຮອງນາ ຍົກລັດຖະມົນຕີ ໄດ້ຖືໂອກາດນີ້ເຊື້ອເຊີນບັນດານັກທ່ອງທ່ຽວຈາກ ສປ ຈີນ ແລະ ອາຊຽນ ໄປຢ້ຽມຢາມ ແລະ ທ່ອງທ່ຽວທາງທຳມະຊາດ, ປະຫວັດສາດ, ທຳມະຊາດອັນສວຍງາມຂອງ ສປປ ລາວ ເນື່ອງໃນໂອກາດປີນີ້ເປັນປີທ່ອງທ່ຽວ ລາວ-ຈີນ. ພາຍຫຼັງເຂົ້າຮ່ວມງານ CAEXPO ແລ້ວ ທ່ານຮອງນາຍົກລັດຖະມົນຕີ ຍັງໄດ້ເປັນກຽດໄປຢ້ຽມຊົມຮ້ານວາງສະແດງສິນຄ້າຂອງ ສປປ ລາວ ຊຶ່ງສ່ວນຫຼາຍແມ່ນເຄື່ອງເຟີນີເຈີ, ຜະລິດຕະພັນໄມ້, ເຄື່ອງຫັດຖະກຳ, ກາເຟ ແລະ ອາຫານ. ໃນນັ້ນ, ທ່ານຮອງນາຍົກລັດຖະມົນຕີ ກໍໄດ້ໄປຢ້ຽມຊົມຮ້ານເຟີນີເຈີຂອງກຸ່ມບໍລິສັດ ຄຳໄຜ່ຊະນະ ຊຶ່ງເປັນບໍລິສັດຜະລິດເຄື່ອງເຟີນີເຈີ ທີ່ມີຄຸນນະພາບສູງ, ລູກຄ້າໃຫ້ຄວາມສົນໃຈຫຼາຍທີ່ສຸດ ໂດຍສະເພາະແມ່ນລູກຄ້າຈາກ ສປ ຈີນ. ກ່ອນເຂົ້າຮ່ວມງານ CAEXPO, ທ່ານ ສອນໄຊ ສີພັນດອນ ໄດ້ມີການພົບປະສອງຝ່າຍ ກັບ ທ່ານ ຮັນເຈິ້ງ ຮອງນາຍົກລັດຖະມົນຕີຈີນ, ສອງຝ່າຍໄດ້ຕີລາຄາສູງຕໍ່ການພົວພັນລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ - ຈີນ ໃນຖາ ນະເປັນປະເທດເພື່ອນມິດຍຸດ ທະສາດ ແລະ ຄູ່ຮ່ວມຊາຕາ ກຳ. ໃນໂອກາດນີ້, ທ່ານຮອງ ນາຍົກລັດຖະມົນຕີ ໄດ້ຕາງ ໜ້າໃຫ້ລັດຖະບານ ແລະ ປະ ຊາຊົນລາວ ສະແດງຄວາມຂອບໃຈ ແລະ ຮູ້ບຸນຄຸນມາຍັງລັດຖະບານ ແລະ ປະຊາຊົນຈີນ ທີ່ຍາມໃດກໍໃຫ້ການສະ ໜັບສະໜູນຊ່ວຍເຫຼືອລາວຕະຫຼອດມາ, ສອງຝ່າຍໄດ້ແລກປ່ຽນ, ປຶກສາຫາລືກ່ຽວກັບສະພາບການພັດທະນາເສດຖະກິດ-ສັງຄົມທັງໃນຂອບສອງຝ່າຍ, ເສດຖະກິດພາກພື້ນ ແລະ ສາກົນ ເພື່ອຮ່ວມກັນກຳນົດທິດທາງໃນຕໍ່ໜ້າ. ພ້ອມທັງເປັນການຮັດແໜ້ນການຮ່ວມມືທີ່ມີຢູ່ແລ້ວໃຫ້ເກີດດອກອອກຜົນຍິ່ງໆຂຶ້ນ.
(ຂ່າວ: ສີວັນ)