ລາວ-ຈີນ ປຶກສາຫາລືກ່ຽວກັບລະບຽບ ການລົງທຶນ


...

17.10.2019 10:08     

   ມະຫາວິທະຍາໄລ ເສດ ຖະກິດການເງິນ ແຂວງຢຸນນານ ສປ ຈີນ ຮ່ວມກັບພາກສ່ວນກ່ຽວຂ້ອງຂອງ ສປປ ລາວ ຈັດ ກອງປະຊຸມ ເພື່ອປຶກສາຫາລືກ່ຽວກັບກົດໝາຍ ແລະ ນິຕິກຳກ່ຽວກັບການຄ້າການລົງທຶນ ໃນຂະນະທີ່ຝ່າຍລາວໄດ້ສະ ເໜີກ່ຽວກັບຄວາມພະຍາຍາມ ຂອງລັດຖະບານ ໃນການອຳ ນວຍຄວາມສະດວກການດຳ ເນີນທຸລະກິດ ຢູ່ ສປປ ລາວ ໂດຍໄດ້ປັບປຸງກົດໝາຍ ແລະ ລະບຽບການ ເພື່ອຕັດຂັ້ນຂອດຂອງການສະເໜີອະນຸຍາດການດຳເນີນທຸລະກິດ ເຮັດໃຫ້ໄລຍະເວລາການຂໍອະນຸຍາດສັ້ນລົງຫຼາຍ ເມື່ອທຽບກັບເມື່ອກ່ອນ.
ກອງປະຊຸມດັ່ງກ່າວ ໄດ້ຈັດຂຶ້ນໃນວັນທີ 16 ຕຸລານີ້ ທີ່ໂຮງແຮມແລນມາກ ໂດຍມີ ທ່ານ ຢູ ຢົງ ຕົວແທນຈາກມະ ຫາວິທະຍາໄລເສດຖະກິດການເງິນ ແຂວງຢຸນນານ, ນັກລົງທຶນຈາກ ສປ ຈີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຢູ ຢົງ ກ່າວວ່າ: ໂຄງ ການກໍ່ສ້າງທາງລົດໄຟລາວ -ຈີນ ຈະສຳເລັດໃນທ້າຍປີ 2021 ນີ້ ຊຶ່ງຈະເຮັດໃຫ້ການຮ່ວມມື, ການຄ້າ-ການລົງທຶນ ລະຫວ່າງຈີນ-ລາວ ໂດຍສະ ເພາະ ແຂວງຢຸນນານ ກັບ ສປປ ລາວ ຍິ່ງຈະເພີ່ມທະວີຂຶ້ນ ເພື່ອສະໜັບສະໜູນຂໍ້ລິເລີ່ມ ໜຶ່ງແລວ ໜຶ່ງເສັ້ນທາງຂອງລັດຖະບານຈີນ.
ທ່ານກ່າວອີກວ່າ: ສິ່ງສຳ ຄັນຂອງການຮ່ວມມືລະຫວ່າງສອງຝ່າຍ ຈຳເປັນຕ້ອງໄດ້ຮັບຮູ້ ແລະ ເຂົ້າໃຈກ່ຽວກັບກົດໝາຍ ແລະ ລະບຽບການຕ່າງໆກ່ຽວກັບການຄ້າ, ການລົງທຶນ ເພື່ອໃຫ້ນັກທຸລະກິດໄດ້ເຂົ້າໃຈ ແລະ ເປັນແຮງຍູ້ດັນ ແລະ ດຶງດູດເອົາການລົງທຶນຈາກ ສປ ຈີນ ເຂົ້າມາລົງທຶນຢູ່ ສປປ ລາວ.
ໃນຂະນະດຽວກັນຝ່າຍລາວໄດ້ສະເໜີກົດໝາຍສົ່ງ ເສີມການລົງທຶນ ສະບັບປັບ ປຸງ, ກົດໝາຍ ວ່າດ້ວຍການທ່ອງ ທ່ຽວ ສະບັບປັບປຸງ ແລະ ກົດ ໝາຍ ວ່າດ້ວຍວິສາຫະກິດ ລວມທັງການປັບປຸງລະບຽບການຕ່າງໆ ເພື່ອຫຼຸດຂັ້ນຕອນການຂໍອະນຸຍາດການດຳເນີນທຸລະກິດ ຢູ່ ສປປ ລາວ.
ທ່ານ ບຸດສະດີ ຄັນທະວົງ ຫົວໜ້າພະແນກມາດຖານການ ທ່ອງທ່ຽວ ແລະ ຄຸ້ມຄອງການລົງທຶນ ຕາງໜ້າຈາກກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ກ່າວວ່າ: ລັດຖະບານໄດ້ຖືເອົາວຽກງານການທ່ອງທ່ຽວ ເປັນໜຶ່ງໃນບຸລິມະສິດ ໃນການພັດທະນາເສດຖະກິດ-ສັງຄົມຂອງ ສປປ ລາວ, ດັ່ງນັ້ນ ກົດໝາຍວ່າດ້ວຍການທ່ອງທ່ຽວ ສະບັບປັບປຸງ ໄດ້ເປີດກວ້າງໃຫ້ນັກລົງ ທຶນຕ່າງປະເທດ ສາມາດມາລົງທຶນດ້ານການທ່ອງທ່ຽວເກືອບທຸກກິດຈະການ ຖ້າເປັນ ກິດຈະການສຳປະທານ ຫຼື ວ່າກິດຈະການຄວບຄຸມຕ້ອງໄດ້ ຂໍອະນຸຍາດຈາກກະຊວງແຜນ ການ ແລະ ການລົງທຶນ, ແຕ່ຖ້າເປັນກິດຈະການທົ່ວໄປ ຕ້ອງໄດ້ຂໍຂຶ້ນທະບຽນນຳຂະແໜງອຸດສາຫະກຳ ແລະ ການຄ້າ, ຫຼັງຈາກນັ້ນ ຈຶ່ງມາຂໍອະນຸຍາດດຳເນີນທຸລະກິດນຳຂະແໜງ ຖວທ ຊຶ່ງປັດຈຸບັນໄດ້ຕັດຂັ້ນຂອດການສະເໜີຂໍອະນຸຍາດການລົງທຶນໃຫ້ສັ້ນລົງ.
ນອກຈາກນີ້ ຜູ້ຕາງໜ້າຈາກກະຊວງແຜນການ ແລະ ການລົງທຶນ ແລະ ຕາງໜ້າກະ ຊວງອຸດສາຫະກຳ ແລະ ການຄ້າກໍໄດ້ອະທິບາຍກ່ຽວກັບລະ ບຽບການ ໃນການດຳເນີນທຸລະກິດຢູ່ ສປປ ລາວ ຢ່າງລະອຽດ ໂດຍສະເພາະແມ່ນຄວາມພະ ຍາຍາມຂອງລັດຖະບານ ໃນການແກ້ໄຂສິ່ງກີດຂວາງໃນການດຳເນີນທຸລະກິດຢູ່ລາວ ໂດຍໄດ້ຕັດຂັ້ນຂອດໄລຍະເວລາການຂໍອະນຸຍາດໃຫ້ສັ້ນລົງ.
(ຂ່າວ-ພາບ: ບຸນຕອມ) .