ເລ່ີມ​ລົງ­ມື​ກໍ່­ສ້າງ​ສູນ​ກາງ​ການ​ສຶກ­ສາ​-​ບໍ­ລິ­ການ​ສຸ­ຂະ­ພາບຢູ່​ເຂດ​ເສດ­ຖະ­ກິດ​ບໍ່​ເຕ່ນ

...

21.10.2019 10:45     

   ເຂດ​ເສດຖະກິດ​ພິເສດ​ບໍ່​ເຕ່ນ​ແດນ​ງາມ ໄດ້​ຈັດ​ພິທີ​ວາງ​ສີ​ລາ​ລືກ​ກໍ່ສ້າງ​ອາຄານ​ສູນ​ກາງ​ການ​ສຶກສາ​ຄົບ​ວົງ​ຈອນ ແລະ ອາຄານ​ບໍລິການ​ສຸຂະພາບ ໂດຍ​ກໍ່ສ້າງ​ໂຮງຮຽນ​ຕັ້ງແຕ່​ຊັ້ນ​ອະນຸບານ​ຈົນ​ຮອດ​ລະດັບ​ວິຊາ​ຊີບ ໃນ​ຂະນະ​ທີ່​ການ​ບໍລິການ​ສຸຂະພາບ​ກໍ​ຈະ​ສ້າງຕັ້ງ​ໂຮງໝໍ​ທີ່​ທັນ​ສະໄໝ ເພື່ອ​ບໍລິການປິ່ນ ປົວ​ສຸຂະພາບ ຊຶ່ງ​ອະນາຄົດ​ເຂດ​ບໍ່​ເຕ່ນຈະ​ກາຍເປັນ​ຕົວ​ເມືອງ​ທີ່​ທັນ​ສະໄໝ ແລະ ມີ​ຫຼາຍ​ຮ້ອຍ​ບໍລິສັດ​ເຂົ້າ​ມາ​ລົງ​ທຶນ.

   ພິທີ​ວາງ​ສີ​ລາ​ລືກ​ໂຄງ ການດັ່ງກ່າວ​ໄດ້​ມີ​ຂຶ້ນ​ໃນ​ວັນ​ທີ 18 ຕຸລາ​ຜ່ານ​ມາ ທີ່​ເຂດ​ເສດ ຖະກິດ​ພິເສດ​ບໍ່​ເຕ່ນ​ແດນ​ງາມ ແຂວງ​ຫຼວງ​ນ້ຳ​ທາ ໂດຍ​ມີທ່ານ ນາງ ຄຳ​ຈັນ ວົງ​ແສນ​ບູນ ຮອງ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ, ມີ​ບັນດາ​ຮອງ​ເຈົ້າແຂວງ 4 ແຂວງ​ພາກ​ເໜືອ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

   ທ່ານ ເຊິງ ຈິງ ເຊິນ ຮອງ​ປະທານ​ຄະນະ​ບໍລິຫານ​ເຂດ​ ເສດຖະກິດ​ພິເສດ​ບໍ່​ເຕ່ນ​ແດນ​ງາມ ໄດ້​ກ່າວ​ວ່າ: ຕາມ​ແຜນ​ແມ່​ບົດ​ຂອງ​ເຂດ​ເສດຖະກິດ​ພິເສດ​ບໍ່​ເຕ່ນ​ແດນ​ງາມໄດ້​ກຳນົດ 4 ເຂດ ຫຼື (4 ກິດຈະການ​ໃຫຍ່) ຊຶ່ງ​ໃນ​ນັ້ນ ເຂດ​ການ​ສຶກສາ ແລະ ເຂດ​ບໍລິການ​ສຸຂະພາບ​ກໍ​ແມ່ນ​ໜຶ່ງ​ໃນ​ກິດຈະການ​ຮາກ​ຖານ​ທີ່​ສະໜັບສະໜູນ​ການ​ພັດທະນາ​ເຂດ​ບໍ່​ເຕ່ນ​ໃຫ້​ມີ​ຄວາມ​ຍືນ​ຍົງ ໂດຍ​ຈະ​ກໍ່ສ້າງ​ໂຮງຮຽນ​ຕັ້ງແຕ່​ລະດັບ​ຊັ້ນ​ອະນຸ​ບານ​-​ປະ​ຖົມ​-​ມັດທະຍົມ ຈົນ​ຮອດ​ລະດັບ​ວິທະຍາໄລ ໃນ​ສາຂາ​ວິຊາ​ຊີບ​ຕ່າງໆ ໃຫ້​ກາຍເປັນ​ສູນ​ກາງ​ການ​ຮຽນ​ຮູ້, ແລກປ່ຽນ ແລະ ການ​ຮ່ວມ​ມື​ລາວ​-​ຈີນ.

   ສຳລັບ​ການ​ບໍລິການ​ສຸ ຂະພາບຈະ​ກໍ່ສ້າງ​ໂຮງໝໍ​ປິ​່ນ​ປົວ​ສຸຂະພາບ​ຄົບ​ວົງ​ຈອນ ເພື່ອ​ບໍລິການ​ປິ່ນປົວ​ສຸຂະພາບ​ໃຫ້​ປະຊາຊົນ​ທົ່ວ​ໄປ ໂດຍ​ມີ ໂຮງໝໍ​ຊື່​ດັງ​ຈາກ ສປ ຈີນ ລວມ​ທັງ​ປະເທດ​ອື່ນໆ ໃຫ້​ຄວາມ​ສົນໃຈ​ມາ​ລົງທຶນ ແລະ ບໍລິການ​ປິ່ນປົວ​ສຸຂະພາບ​ຢູ່​ເຂດ​ເສດຖະກິດ​ແຫ່ງ​ນີ້ ໂດຍ​ຈະ​ນຳ​ອຸປະກອນ​ການ​ແພດ​ທີ່​ທັນ​ສະໄໝ​ເຂົ້າ​ມາ ເພື່ອ​ບໍລິການ​ປິ່ນປົວ, ລວມ​ທັງ​ການ​ຄົ້ນຄວ້າ​ວິໄຈ​ຜະລິດ​ຕະ​ພັນ​ຢາ ເປັນຕົ້ນ​ແມ່ນ​ຢາ​ຕ້ານ​ມະ​ເຮັງ ແລະ ອື່ນໆ, ນອກຈາກ​ນີ້ ຍັງ​ຈະ​ກໍ່ສ້າງ​ອາຄານ​ບໍລິການ​ຜູ້​ອາຍຸ​ສູງ.

   ທ່ານ ນາງ ຄຳ​ຄຳ​ຈັນ ວົງ​ແສນ​ບູນ ກ່າວ​ວ່າ: ກິດຈະການ​ການ​ສຶກສາ ແລະ ບໍລິການສຸ ຂະພາບເປັນ​ໜຶ່ງ​ໃນ​ກິດຈະ ການ​ທີ່​ນອນ​ຢູ່​ໃນ​ສັນຍາ​ສຳປະ ທານ ແລະ ແຜນ​ແມ່​ບົດ​ຂອງ​ເຂດ​ເສດຖະກິດ​ພິເສດ​ບໍ່​ເຕ່ນ​ແດນ​ງາມ, ໂຄງການ​ບໍລິການ​ສຸຂະພາບ​ມີ​ເປົ້າ​ໝາຍ​ແນໃສ່​ບໍລິການ​ປິ່ນປົວ​ສຸຂະພາບຄົບ ​ວົງ​ຈອນ ໃນ​ຂະນະ​ທີ່​ການ ​ສຶກສາ ມີ​ເປົ້າ​ໝາຍ​ເພື່ອ​ພັດທະນາ​ການ​ສຶກສາ​ຄົບ​ວົງ​ຈອນ ຊຶ່ງ​ຫາກ​ໂຄງການ​ນີ້​ສຳເລັດ​ການ​ກໍ່ສ້າງ, ເຂດ​ເສດຖະກິດ​ພິເສດ​ບໍ່​ເຕ່ນ​ແດນ​ງາມ ກໍ​ຄື ສປປ ລາວ ຈະ​ມີ​ສະຖານທີ່​ປິ່ນປົວ ແລະ ສະ​ຖາ​ບັນ​ການ​ສຶກສາ​ທີ່​ມີ​ຄຸນ​ນະ​ພາບ​ທຽບ​ເທົ່າ​ກັບ​ພາກ​ພື້ນ ແລະ ສາ​ກົນ.

   ສຳລັບ​ເຂດ​ເສດຖະກິດ​ພິເສດ​ບໍ່​ເຕ່ນ​ແດນ​ງາມ ປັດຈຸບັນ​ກຳລັງ​ບຸກເບີກ ແລະ ປັບ​ໜ້າດິນ ເພື່ອ​ເປີດ​ທາງ​ໃຫ້​ແກ່​ການ​ກໍ່ ສ້າງ​ໂຄງ​ລ່າງ​ພື້ນຖານ ຊຶ່ງ​ມາ​ຮອດ​ປັດຈຸບັນ​ການ​ບຸກເບີກ ແລະ ປັບ​ໜ້າດິນ​ຄືບ​ໜ້າ​ແລ້ວ 80-90% ໃນ​ຂະນະ​ທີ່​ແຜນ​ແມ່​ບົດ​ພັດທະນາ​ເຂດ​ດັ່ງກ່າວ ໄດ້​ກຳນົດ​ເປັນ 4 ກິດຈະການ​ໃຫຍ່ ເຊັ່ນ: ເຂດ​ນິຄົມ​ອຸດສາຫະກຳ ແລະ ໂລ​ຈິ​ສ​ຕິກ; ເຂດ​ການ​ຄ້າ​-​ການ​ເງິນ​ສາກົນ; ເຂດ​ການ​ສຶກສາ​-​ບໍລິການ​ສຸຂະພາບ ແລະ ເຂດ​ການທ່ອງທ່ຽວ ຖ້າຫາກ​ ວ່າໄດ້ພັດທະນາ​ເຕັມຮູບ​ແບບ ຈະ​ມີ​ຫຼາຍ​ຮ້ອຍ​ບໍລິສັດ​ເຂົ້າ​ມາ​ລົງທຶນ ໃນ​ຂະນະ​ທີ່​ເຂດ​ບໍ່​ເຕ່ນ ຈະ​ກາຍເປັນ​ເມືອງ​ທີ່​ທັນ​ສະໄໝ ທີ່​ມີ​ປະ​ຊາ​ກອນ​ບໍ່​ຕ່ຳ​ກວ່າ 3 ແສນ​ຄົນ.
(ຂ່າວ: ຄຳ​ເຮືອງ)