ທຄຕລ ສະຫຼອງ 30 ປີ ການຫັນເປັນທະນາຄານທຸລະກິດ


...

04.11.2019 10:22     

   ທະນາຄານການຄ້າຕ່າງປະ ເທດລາວມະຫາຊົນ (ທຄຕລ) ໄດ້ຈັດພິທີສະເຫຼີມສະຫຼອງວັນຫັນເປັນທະນາຄານທຸລະກິດຄົບຮອບ 30 ປີ ຂຶ້ນໃນວັນທີ 1 ພະຈິກ ທີ່ໂຮງແຮມແລນມາກ ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມຂອງ ທ່ານ ສົມດີ ດວງດີ ຮອງນາຍົກ ລັດຖະມົນຕີ ລັດຖະມົນຕີກະ ຊວງການເງິນ, ທ່ານ ສອນໄຊ ສິດພະໄຊ ຜູ້ວ່າການທະນາ ຄານ ແຫ່ງ ສປປ ລາວ ພ້ອມ ດ້ວຍຄະນະຜູ້ວ່າການ, ບັນດາຄະນະກົມຈາກ ທຫລ ພາກສ່ວນກ່ຽວຂ້ອງ, ບໍລິສັດໃນເຄືອ, ພະ ນັກງານ, ອະດີດພະນັກງານຂອງ ທຄຕລ ແລະ ແຂກຖືກເຊີນເຂົ້າຮ່ວມ. ໃນພິທີ ທ່ານ ພູຂົງ ຈັນທະຈັກ ຜູ້ອໍານວຍການໃຫຍ່ ທຄຕລ ໄດ້ລາຍງານ ໂດຍຫຍໍ້ກ່ຽວກັບປະ ຫວັດການເຕີບໃຫຍ່ຂະຫຍາຍ ຕົວຂອງ ທຄຕລ ໃນໄລຍະ 30 ປີທີ່ຜ່ານມາ ໂດຍຍົກໃຫ້ເຫັນວ່າ ທຄຕລ ໄດ້ຫັນເປັນທະນາຄານທຸລະກິດ ໃນວັນທີ 1 ພະຈິກ 1989 ແລະ ໄດ້ຍົກລະດັບການຄຸ້ມຄອງບໍລິຫານຕາມຮູບແບບບໍລິສັດມະຫາຊົນ ດ້ວຍການຈົດທະບຽນຢູ່ໃນຕະຫຼາດຫຼັກຊັບລາວເປັນທະນາຄານແຫ່ງທໍາອິດຂອງປະເທດລາວໃນວັນທີ 11 ມັງກອນ 2011. ດໍາເນີນງານຕາມວິໄສທັດຄື: "ເປັນທະນາຄານທີ່ເຂັ້ມແຂງທັນສະໄໝກ້າວສູ່ມາດຕະຖານສາກົນ", ມີໂຄງສ້າງການຖືຮຸ້ນ: ລັດຖະບານຖືຮຸ້ນ 70%, ນັກລົງ ທຶນພາຍໃນ ແລະ ຕ່າງປະເທດ 20% ແລະ ຄູ່ຮ່ວມຍຸດທະສາດ 10%. ມາຮອດປັດຈຸບັນ ທຄຕລ ມີທັງໝົດ 14 ພະແນກ, 3 ສູນ, 20 ສາຂາ, 93 ໜ່ວຍບໍລິການ, 15 ຫ້ອງແລກປ່ຽນ, ມີຕູ້ ATM 408 ໜ່ວຍ, CDM 29 ໜ່ວຍ ແລະ ຕົວແທນບີຄໍາ 532 ຕົວແທນ, ມີພະນັກງານທັງໝົດ 2.013 ຄົນ, ຍິງ 932 ຄົນ. ຕະຫຼອດໄລຍະ 30 ປີ ທຄຕລ ໄດ້ເອົາໃຈໃສ່ປັບປຸງ ແລະ ພັດທະນາລະບົບບໍລິການຂອງຕົນຢ່າງຕໍ່ເນື່ອງ ໂດຍສະເພາະແມ່ນການປັບປຸງວັດທະນະທໍາບໍລິການ, ປັບປຸງເອກະລັກຂອງສໍານັກງານ, ຂະຫຍາຍຕາໜ່າງບໍລິການໃຫ້ກວ້າງຂວາງ, ນໍາໃຊ້ເຕັກໂນໂລຊີທີ່ທັນສະໄໝເຂົ້າໃນການບໍລິການໃຫ້ມີລະບົບຂັ້ນຕອນການບໍລິການທີ່ວ່ອງໄວ, ຖືກຕ້ອງຊັດເຈນ ແລະ ມີຄວາມປອດໄພສູງ. ເອົາໃຈໃສ່ພັດທະນາຜະລິດຕະພັນອີເລັກໂຕຣນິກ ເປັນຕົ້ນແມ່ນຜະລິດຕະພັນ iBank, BCEL ONE, CDM ແລະ ອື່ນໆທີ່ສາມາດສ້າງຄວາມສະດວກຫຼາຍດ້ານໃນການເຮັດທຸລະກໍາດ້ານການເງິນ ໂດຍສະເພາະຜະລິດຕະພັນ BCEL ONE ໄດ້ສ້າງຈຸດໄດ້ປຽບດ້ານການຊໍາລະສະສາງຜ່ານລະບົບມືຖືຮູບແບບໃໝ່. ທຄຕລ ຍັງເປັນຜູ້ລິເລີ່ມນໍາໃຊ້ການຊໍາລະດ້ວຍລະບົບ QR Code ຢູ່ພາຍໃນປະເທດຜ່ານ BCEL One Pay ທີ່ຊ່ວຍເຮັດໃຫ້ການຊໍາລະສິນຄ້າ ແລະບໍໍລິການມີຄວາມວ່ອງໄວ, ມີຄວາມປອດໄພ, ສາມາດກວດສອບໄດ້ ແລະ ໄດ້ມາດຕະຖານສາກົນ ຊຶ່ງໄດ້ສ້າງຄວາມເຊື່ອໝັ້ນສູງໃຫ້ທັງຜູ້ຊື້ ແລະ ຜູ້ຂາຍ, ສາມາດຫຼຸດຜ່ອນການນໍາໃຊ້ເງິນສົດຢູ່ໃນສັງຄົມໄດ້ເປັນຢ່າງດີ. ນອກນັ້ນ ທຄຕລ ຍັງໄດ້ພັດທະນາ ແລະ ນໍາໃຊ້ຜະລິດຕະພັນຂອງຕົນເຂົ້າໃນການເກັບລາຍຮັບເຂົ້າງົບປະມານຂອງລັດເຊັ່ນ: ໂຄງການເກັບຄ່າທໍານຽມທາງ, ຄ່າພາສີທີ່ດິນ ແລະ ໂຄງການເກັບພາສີອາກອນແບບທັນສະໄໝ (Smart Tax, Smart VAT), ລວມທັງໂຄງການເກັບຄ່າທໍານຽມຜ່ານຂົວມິດຕະພາບ 1 ຊຶ່ງແຕ່ລະໂຄງການສາມາດຊ່ວຍໃຫ້ລັດເກັບລາຍຮັບເຂົ້າງົບປະມານໄດ້ເປັນຢ່າງດີ. ພິເສດ ທຄຕລ ໄດ້ພັດທະນາໂຄງການຊ່ວຍເຫຼືອສັງຄົມ BCEL One Heart ຊຶ່ງເຮັດໜ້າທີ່ເປັນເຄື່ອງມື ແລະ ເປັນສື່ກາງໃນການຮັບບໍລິຈາກເງິນຊ່ວຍເຫຼືອສັງຄົມທີ່ອໍານວຍຄວາມສະດວກໃຫ້ທັງຜູ້ຂໍຮັບບໍລິຈາກ ແລະ ຜູ້ສະໝັກໃຈບໍລິຈາກມີຫຼາຍໂຄງການເຂົ້າຮ່ວມ. ທຄຕລ ເປັນທີ່ຮັບຮູ້ ແລະ ຍອມຮັບຈາກພາຍໃນ ແລະ ຕ່າງປະເທດເຫັນໄດ້ຈາກບັນດາລາງວັນອັນຊົງກຽດທີ່ໄດ້ຮັບລາງວັນດີເດັ່ນ ໃນການບໍລິການດ້ານການທະນາຄານສາຂາຕ່າງໆຈາກເວທີລະດັບສາກົນລວມທັງໝົດ 25 ຄັ້ງ. ໃນໂອກາດດັ່ງກ່າວ ທ່ານ ສົມດີ ດວງດີ ໄດ້ສະແດງຄວາມຍ້ອງຍໍຊົມເຊີຍຕີລາຄາສູງຕໍ່ຜົນ ງານຂອງ ທຄຕລ ທີ່ຍາດມາໄດ້ ພ້ອມທັງມີທິດຊີ້ນໍາໃຫ້ຄະນະຜູ້ບໍລິຫານ ທຄຕລ ສືບຕໍ່ໃນການພັດທະນາຢ່າງໝັ້ນຄົງ, ປັບປຸງຄຸນນະພາບການບໍລິ ການດ້ານຕ່າງໆໃຫ້ໃກ້ຄຽງກັບສາກົນ. (ຂ່າວ-ພາບ: ນ. ຍຸພິນທອງ)