ໄຊຍະບູລີ ເປີດສົກຮຽນໃໝ່ 2019-2020


...

03.09.2019 9:50     

   ແຂວງໄຊຍະບູລີ ໄດ້ຈັດພິທີເປີດສົກຮຽນໃໝ່ ສົກ 2019-2020 ຂຶ້ນໃນຕອນເຊົ້າວັນທີ 2 ກັນຍານີ້ ທີ່ເດີ່ນກິລາໃນຮົ່ມແຂວງ, ເປັນກຽດເຂົ້າຮ່ວມໂດຍທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ມີບັນດາການນໍາຂອງແຂວງ, ເມືອງໄຊຍະບູລີ, ມີອໍານາດການປົກຄອງບ້ານເທດສະບານເມືອງ, ສະມາຄົມພໍ່ແມ່ນັກຮຽນ ພ້ອມດ້ວຍຄູ-ອາຈານ ແລະ ນັກຮຽນເຂົ້າຮ່ວມ.
    ໃນພິທີ ຜູ້ເຂົ້າຮ່ວມໄດ້ຮັບຊົມການສະແດງສິລະປະ-ວັນນະຄະດີຂອງນັກຮຽນ 4 ລາຍການ, ຈາກນັ້ນ ທ່ານ ພັນ ດວງຕາ ຮອງຫົວໜ້າພະແນກສຶກສາທິການ ແລະ ກິລາແຂວງໄຊຍະບູລີ ໄດ້ຂຶ້ນລາຍງານການກະກຽມໃຫ້ແກ່ການເປີດສົກຮຽນໃໝ່ໃນປີນີ້ວ່າ: ການກະກຽມໃຫ້ແກ່ການເປີດສົກ ຮຽນໃໝ່ ສົກຮຽນ 2019-2020, ພະແນກສຶກສາທິການ ແລະ ກິລາແຂວງແມ່ນໄດ້ສົມທົບກັບອໍານາດການປົກຄອງແຕ່ລະຂັ້ນ ເພື່ອປຸກລະດົມພໍ່ແມ່ຜູ້ປົກຄອງໃຫ້ເອົາລູກຫຼານມາເຂົ້າໂຮງຮຽນໃຫ້ໄດ້ຕາມຄາດໝາຍ, ພ້ອມທັງບູລະນະສ້ອມແປງອາຄານສະຖານທີ່ຂອງໂຮງຮຽນທີ່ເປ່ເພໃຫ້ກັບມານໍາໃຊ້ໄດ້ປົກກະຕິ ແລະ ພຽງພໍ ໂດຍສະເພາະແມ່ນຊັ້ນປະຖົມ, ຂະຫຍາຍຊັ້ນມໍຕົ້ນ 2 ແຫ່ງ ແລະ ມັດທະຍົມສົມບູນ 5 ແຫ່ງ, ໄດ້ຈັດສົ່ງວັດຖຸອຸປະກອນການສຶກສາໃຫ້ແຕ່ລະເມືອງເປັນຕົ້ນແມ່ນ ປື້ມແບບຮຽນ, ປື້ມຄູ່ມື, ໄດ້ຈັດຝຶກອົບຮົມຄູສອນຊັ້ນ ປ 1 ແລະ ອໍານວຍການຊັ້ນປະຖົມໃນທົ່ວແຂວງ, ພ້ອມດຽວກັນກໍໄດ້ວິເຄາະ, ວິໄຈ ສະພາບການສຶກສາ ແລະ ກິລາຕາມ 15 ຄາດໝາຍ, ໄດ້ເຊື່ອມຊຶມມະຕິ ວ່າດ້ວຍວຽກງານພັດທະນາຊັບພະຍາກອນມະນຸດ, ໃນນີ້ໄດ້ລົງເລິກ 17 ມາດຕະການແກ້ໄຂບັນຫາຄູເຫຼືອບໍ່ພໍ, ການສັບຊ້ອນ-ຈັດສັນຄູ ແລະ ແກ້ໄຂບັນຫາຄູອາສາສະໝັກ.
    ໃນໂອກາດນີ້, ທ່ານ ເຈົ້າແຂວງໄຊຍະບູລີ ໄດ້ຮຽກ ຮ້ອງມາຍັງການນໍາທຸກອົງການຈັດຕັ້ງພັກ-ລັດ, ນັກທຸລະກິດ, ຜູ້ປະກອບການ, ຜູ້ປົກຄອງນັກຮຽນ, ອໍານາດການປົກຄອງບ້ານ, ຄູ-ອາຈານ ແລະ ນັກຮຽນ-ນັກສຶກສາ ຈົ່ງສືບຕໍ່ເອົາໃຈໃສ່ ໃນການພັດທະນາການສຶກສາ ແລະ ກິລາ ຢ່າງຮອບດ້ານ, ສ້າງໃຫ້ມີໂຮງຮຽນຕົວແບບ, ສີຂຽວປອດສິ່ງເສບຕິດ ພ້ອມທັງຮັກສາມູນເຊື້ອນັກຮຽນເກັ່ງໄວ້ຕະຫຼອດໄປ, ສືບຕໍ່ໃຫ້ການສະໜັບສະໜູນຊ່ວຍເຫຼືອການສືກສາ ແລະ ກິລາຢູ່ແຕ່ລະທ້ອງຖິ່ນ, ເພີ່ມທະວີປະສານສົມທົບລະຫວ່າງ 3 ສະຖາບັນຄື: ໂຮງຮຽນ, ສັງຄົມ ແລະ ຄອບຄົວໃຫ້ແໜ້ນແຟ້ນ ໂດຍສະເພາະແມ່ນຄອບຄົວຕ້ອງເອົາໃຈໃສ່ໃນການສຶກສາອົບຮົມລູກຫຼານຂອງຕົນ, ເພື່ອສະກັດກັ້ນ ແລະ ຫຼີກລ່ຽງບໍ່ໃຫ້ມີສິ່ງຫຍໍ້ທໍ້ດ້ານຕ່າງໆເກີດຂຶ້ນ, ເຮັດໃຫ້ນັກຮຽນແຕ່ລະຄົນຮຽນດີ, ຮຽນເກັ່ງ ກາຍເປັນພົນລະເມືອງດີຂອງຊາດ ແລະ ຜູ້ສືບທອດພາລະກິດປະຕິວັດໃນອະນາຄົດ, ສືບຕໍ່ຍູ້ຂະບວນການສິລະປະ-ວັນນະຄະດີ ແລະ ກິລາໃຫ້ເປັນຂະບວນຟົດຟື້ນ ແລະ ໃນຕອນທ້າຍຂອງພິທີ ກໍໄດ້ມີການຕັດແຖບຜ້າ ແລະ ປ່ອຍປຸ່ມເປົ້າ ເປີດການຮຽນ-ການສອນຢ່າງເປັນທາງການ.
(ຂ່າວ: ອຸ່ນເຮືອນ ໂພທິລັກ ຫ້ອງວ່າການແຂວງ ໄຊຍະບູລີ)