ສສຊ ເພດຍິງ ເປີດກອງປະຊຸມຄົບຄະນະ ປະຈຳປີ 2019


...

04.10.2019 8:28     

   ກອງປະຊຸມຄົບຄະນະປະ ຈຳປີ 2019 ຂອງສະມາຊິກສະ ພາແຫ່ງຊາດ (ສສຊ) ເພດຍິງໄດ້ເປີດຂຶ້ນຢ່າງເປັນທາງການໃນວັນທີ 3 ຕຸລານີ້ ທີ່ສະພາແຫ່ງຊາດ (ຫຼັກ 6) ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ຜູ້ຊີ້ນໍາວຽກງານຄະນະ ສສຊ ເພດຍິງ, ທ່ານ ນາງ ທັດສະດາພອນ ແສງສຸລິຍາ ປະທານຄະນະ ສສຊ ເພດຍິງສະພາແຫ່ງຊາດ ຊຸດທີ VIII, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
    ໃນພິທີ ທ່ານ ນາງ ທັດສະດາພອນ ແສງສຸລິຍາ ໄດ້ກ່າວບາງຕອນສຳຄັນໃຫ້ຮູ້ວ່າ: ກອງປະຊຸມຄົບຄະນະປະຈຳປີ 2019 ຂອງສະມາຊິກສະພາແຫ່ງຊາດ (ສສຊ) ເພດຍິງພວກເຮົາໃນຄັ້ງນີ້ ເພື່ອເປັນການສະຫຼຸບຕີລາຄາຄືນຜົນການຈັດຕັ້ງປະ ຕິບັດວຽກງານ, ຄວາມຮັບຜິດ ຊອບຕາມພາລະບົດບາດຂອງ ຕົນໃນໜຶ່ງປີຜ່ານມາ ໂດຍສະ ເພາະການເປັນເສນາທິການໃຫ້ແກ່ຂັ້ນເທິງໃນແຕ່ລະດ້ານ, ພ້ອມນີ້ກໍເພື່ອເປັນການຜ່ານຮ່າງທິດທາງແຜນການປີ 2020 ຂອງຄະນະ ສສຊ ເພດຍິງ, ຄຽງຄູ່ກັນນີ້ກໍເປັນການແລກປ່ຽນຖອດຖອນບົດຮຽນໃນການຈັດ ຕັ້ງປະຕິບັດວຽກງານຕົວຈິງບາງເຂດເລືອກຕັ້ງຂອງຄະນະ ສສຊ ເພດຍິງ ແລະ ຮັບຟັງບົດຮຽນໃນການສ້າງຄວາມເຂັ້ມແຂງເພດຍິງຕິດພັນກັບວຽກງານຕຳ ແໜ່ງນຳພາ-ຄຸ້ມຄອງຂັ້ນສູນກາງ ແລະ ທ້ອງຖິ່ນລວມທັງແຜນການກຳນົດຕຳແໜ່ງງານຈາກການສະເໜີຂອງບັນດາພາກສ່ວນທີ່ກ່ຽວຂ້ອງ.
    ກອງປະຊຸມໃນຄັ້ງນີ້ຈະໄດ້ຮັບຟັງບົດສະຫຼຸບສະພາບການເຄື່ອນໄຫວວຽກງານຂອງຄະນະ ສສຊ ເພດຍິງປີ 2019 ແລະ ທິດທາງແຜນການປີ 2020, ຄຳເຫັນໂອ້ລົມຂອງທ່ານຮອງປະທານສະພາແຫ່ງຊາດ ຜູ້ຊີ້ນໍາຄະນະ ສສຊ ເພດຍິງ, ການສ້າງຄວາມເຂັ້ມແຂງໃຫ້ພະນັກງານເພດຍິງແຕ່ລະຂັ້ນຕິດພັນກັບວຽກງານຕຳແໜ່ງນຳພາ-ຄຸ້ມຄອງຂັ້ນສູນກາງ ແລະ ທ້ອງຖິ່ນ, ການສ້າງຄວາມເຂັ້ມແຂງໃຫ້ພະນັກງານເພດຍິງຕິດພັນກັບແຜນການກຳນົດຕຳແໜ່ງງານ, ຜົນການຕິດຕາມກວດກາການຈັດຕັ້ງປະຕິບັດແນວທາງນະໂຍບາຍ ແລະ ບັນດາກົດໝາຍຕິດພັນກັບການເຄື່ອນຍ້າຍແຮງງານເພດຍິງຢູ່ແຂວງສາລະວັນ, ຜົນການຕິດ ຕາມກວດກາການຈັດຕັ້ງປະຕິ ບັດແນວທາງນະໂຍບາຍ ແລະ ກົດໝາຍກ່ຽວກັບການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ເພດຍິງ ແລະ ເດັກຢູ່ແຂວງສະຫວັນນະເຂດ, ຮ່າງມະຕິກອງປະຊຸມຄົບຄະນະປະ ຈຳປີ 2019 ຂອງຄະນະ ສສຊ ເພດຍິງ, ພ້ອມດຽວກັນນີ້ກໍຈະໄດ້ປຶກສາຫາລື ແລະ ປະກອບຄຳຄິດຄຳເຫັນໃສ່ເອກະສານຕ່າງໆໃຫ້ມີເນື້ອໃນຄົບຖ້ວນສົມບູນ, ສ່ອງແສງໄດ້ເຖິງອັນດີ, ອັນອ່ອນ, ຂໍ້ຄົງຄ້າງ ແລະ ວິທີການແກ້ໄຂເພື່ອໃຫ້ສອດຄ່ອງກັບແນວທາງນະໂຍບາຍຂອງພັກ, ຮັບໃຊ້ໜ້າທີ່ການເມືອງ ແລະ ຜົນປະໂຫຍດອັນແທ້ຈິງຂອງຊາດ ແນໃສ່ເຮັດໃຫ້ວຽກງານຂອງຄະນະ ສສຊ ເພດຍິງກໍຄືການຈັດຕັ້ງຜັນຂະຫຍາຍວຽກງານຂອງຄະນະ ສສຊ ເພດ ຍິງໃນໄລຍະໃໝ່ໃຫ້ມີປະສິດທິພາບ ແລະ ປະສິດທິຜົນສູງ.
(ຂ່າວ-ພາບ : ສຸກສາຄອນ)