ປະທານ ສນຊ ເນັ້ນໃຫ້ແນວລາວສ້າງຊາດທຸກຂັ້ນ ເອົາໃຈໃສ່ຍົກສູງຄວາມຮັບຜິດຊອບ


...

...

09.10.2019 9:33     

   ທ່ານ ໄຊສົມພອນ ພົມວິຫານ ກຳມະການກົມການ ເມືອງສູນກາງພັກ ປະທານສູນກາງແນວລາວສ້າງຊາດ (ສນຊ)ໄດ້ໃຫ້ກຽດໂອ້ລົມຕໍ່ກອງປະຊຸມຄະນະປະຈຳສູນກາງແນວລາວສ້າງຊາດເປີດກວ້າງ ຄັ້ງທີ 4 ສະໄໝທີ X ໃນວັນທີ 8 ຕຸລານີ້ ທີ່ ສນຊ, ມີບັນດາຮອງປະທານສູນກາງແນວລາວສ້າງຊາດ, ປະທານແນວລາວສ້າງຊາດແຂວງ, ນະຄອນຫຼວງ, ເມືອງທົ່ວປະເທດ ພ້ອມດ້ວຍແຂກຖືກເຊີນເຂົ້າຮ່ວມ.
    ໃນການໂອ້ລົມຄັ້ງນີ້, ທ່ານ ໄຊສົມພອນ ພົມວິຫານ ໄດ້ສະແດງຄວາມຍ້ອງຍໍຊົມເຊີຍແລະ ຕີລາຄາສູງຕໍ່ຜົນງານການເຄື່ອນໄຫວລວມຂອງຄະ ນະປະຈຳສູນກາງແນວລາວສ້າງຊາດທີ່ໄດ້ເອົາໃຈໃສ່ຊີ້ນໍາໆພາດ້ວຍຄວາມຮັບຜິດຊອບສູງໄດ້ເຮັດໃຫ້ການປະຕິບັດໜ້າທີ່ ການເມືອງຂອງແນວລາວສ້າງຊາດສຳເລັດໃນໄລຍະ 1 ປີທີ່ຜ່ານມາ ເພື່ອເປັນການຊີ້ທິດເຍືອງທາງວຽກງານໃນຕໍ່ໜ້າໃຫ້ມີຜົນສຳເລັດດີຂຶ້ນເປັນກ້າວໆຄະນະປະຈຳ ສນຊ ກໍຄືແນວລາວສ້າງຊາດທຸກຂັ້ນຕ້ອງເອົາໃຈໃສ່ ໃນການຈັດຕັ້ງຜັນຂະຫຍາຍເນື້ອໃນຂອງກອງປະຊຸມຄະນະປະຈຳ ສນຊ ດັ່ງນີ້: ຄະນະຮັບຜິດຊອບດ້ານເນື້ອໃນຮ່າງບົດສະຫຼຸບຕີລາຄາການເຄື່ອນໄຫວຂອງຄະນະປະຈຳ ສນຊ ໃນ 1 ປີຜ່ານມາແລະ ທິດທາງວຽກງານໃນຕໍ່ໜ້າໂດຍນໍາເອົາຄໍາຄິດຄຳເຫັນຄຳສະເໜີຕ່າງໆຂອງບັນດາຜູ້ແທນກອງປະຊຸມໄປຄົ້ນຄວ້າປັບປຸງເນື້ອໃນໃຫ້ມີຄວາມສົມບູນສາມາດນໍາໄປຈັດຕັ້ງຜັນຂະຫຍາຍ ໃນຂົງເຂດວຽກງານທີ່ຕົນຮັບຜິດຊອບ, ຄະນະຮັບຜິດຊອບຮ່າງບົດຄຳເຫັນຂອງ ສນຊ ສືບຕໍ່ນໍາເອົາຄຳເຫັນຂອງບັນດາຜູ້ແທນກອງປະຊຸມນໍາໄປຄົ້ນຄວ້າປັບປຸງຕື່ມເຮັດໃຫ້ບົດດັ່ງກ່າວສັ້ນເຂົ້າ, ມີຄວາມໜັກແໜ້ນຮັດກຸມຕື່ມເພື່ອຈະນໍາໄປຜ່ານຄະນະປະຈຳສະພາແຫ່ງຊາດກ່ອນທີ່ຈະປະກອບຄຳເຫັນຕໍ່ກອງປະຊຸມສະພາແຫ່ງຊາດ, ຕໍ່ການປະຕິບັດຕາມຄຳສັ່ງຂອງນາຍົກ ລັດຖະມົນຕີເລກທີ 03/ນຍ ໃນຂົງເຂດວຽກງານສນຊພວກເຮົາເປັນຕົ້ນໃຫ້ແນວລາວສ້າງຊາດແຂວງ, ນະຄອນຫຼວງນໍາເອົາບັນດາທີ່ຕົກລົງການໂຮມໜ່ວຍງານເຂົ້າກັນຈາກ 7 ໜ່ວຍງານມາເປັນ5ໜ່ວຍງານ, ແນວລາວສ້າງຊາດເມືອງແລະນະຄອນໂຮມຈາກ4ໜ່ວຍງານມາເປັນ 3 ໜ່ວຍງານ, ການສະເຫຼີມສະຫຼອງ 70 ປີຂອງ ສນຊ ຈະໄດ້ຈັດຂຶ້ນໃນໄລຍະເວລາດຳເນີນກອງປະຊຸມສາມັນຄົບຄະນະກຳມະການ ສນຊ ຄັ້ງທີ 5 ສະໄໝທີ VII ສະເໜີໃຫ້ບັນດາອະນຸກຳມະການຕ່າງໆໄດ້ມີການກະກຽມບັນດາໜ້າວຽກທີ່ກ່ຽວຂ້ອງຂອງຕົນແຕ່ຫົວທີ ເພື່ອຮັບປະກັນຜົນສຳເລັດຢ່າງຈົບງາມ, ໃນນັ້ນແນວລາວສ້າງຊາດຂັ້ນທ້ອງຖິ່ນໃຫ້ປະຕິບັດຕາມຄຳແນະນຳ ແລະ ໃຫ້ຖືສຳຄັນການສ້າງຂະບວນການຕ້ອນຮັບກອງປະຊຸມໃຫຍ່ 3 ຂັ້ນຂອງຕົນ, ບັນດາປະທານ, ຮອງປະທານ ສນຊ ແຂວງ, ນະຄອນຫຼວງກໍຄືແນວລາວສ້າງຊາດເມືອງ ແລະ ນະຄອນສືບຕໍ່ຄົ້ນຄວ້າເຊື່ອມຊຶມກົດໝາຍວ່າດ້ວຍແນວລາວສ້າງຊາດສະບັບປັບປຸງ ແລະ ຄຳແນະນຳຈັດຕັ້ງປະຕິບັດ ເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານສນຊ ແລະ ຈັດຕັ້ງເຜີຍແຜ່ໃຫ້ສັງຄົມໄດ້ຮັບຮູ້ຢ່າງກວ້າງ ຂວາງທົ່ວເຖິງ, ປະທານ ສນຊ ແຂວງ, ນະຄອນຫຼວງ, ເມືອງ ຈົ່ງໄດ້ນໍາເອົາທິດທາງວຽກງານປີ 2020 ໄປສະເໜີຕໍ່ຄະນະພັກອົງການປົກຄອງຂັ້ນຂອງຕົນ ເພື່ອພິຈາລະນາແກ້ໄຂດ້ານໜຶ່ງ ສນຊ ກໍໄດ້ມີການສ້າງແຜນ ເພື່ອນໍາສະເໜີເຊັ່ນກັນ, ວຽກງານການຮ່ວມມືກັບຕ່າງປະເທດເປັນບັນຫາໜຶ່ງທີ່ຕ້ອງໄດ້ເອົາໃຈໃສ່ຫວັງວ່າພາຍຫຼັງສຳເລັດກອງປະຊຸມຄັ້ງນີ້ຈະໄດ້ພ້ອມກັນນໍາເອົາໄປຈັດຕັ້ງຜັນຂະຫຍາຍທຸກບັນຫາທີ່ເປັນເອກະພາບກັນໃນກອງປະຊຸມໃຫ້ເກີດດອກອອກຜົນເພື່ອເຮັດໃຫ້ອົງການແນວລາວສ້າງຊາດເຄື່ອນໄຫວຢ່າງມີປະສິດທິພາບ ແລະ ມີບາດກ້າວໃໝ່ຫັນປ່ຽນຢ່າງບໍ່ຢຸດຢັ້ງ.
(ຂ່າວ: ພູວັນ, ພາບ: ສຳນານ)