ຜັນຂະຫຍາຍມະຕິກົມການເມືອງ ວ່າດ້ວຍການຄົ້ນຄວ້າ ແນວຄິດ ໄກສອນ ພົມວິຫານ


...

10.10.2019 8:13     

   ກອງປະຊຸມຜັນຂະຫຍາຍມະຕິຂອງກົມການເມືອງສູນກາງພັກ ວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ ໄດ້ຈັດຂຶ້ນໃນວັນທີ 9 ຕຸລານີ້ ທີ່ຫ້ອງປະຊຸມຂອງຄະນະໂຄສະນາອົບຮົມສູນກາງພັກ ພາຍໃຕ້ການເປັນປະທານຂອງທ່ານ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາວິທະຍາສາດສັງຄົມແຫ່ງຊາດ ຫົວໜ້າຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມ ວິຫານ ໂດຍມີຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ, ແຂກຖືກເຊີນອ້ອມຂ້າງສູນກາງ ແລະ ທ້ອງຖິ່ນເຂົ້າຮ່ວມ. ທ່ານ ກິແກ້ວ ໄຂຄຳພິທູນ ໃນນາມປະທານກອງປະຊຸມ ໄດ້ຍົກໃຫ້ເຫັນເຖິງຈຸດປະສົງຂອງກອງປະຊຸມ ແມ່ນເພື່ອເຜີຍແຜ່ມະຕິ ເລກທີ 058/ກມສພ ລົງວັນທີ 13 ທັນວາ 2018 ວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ, ມະຕິເລກທີ 063/ກມສພ ລົງວັນທີ 12 ມີນາ 2019 ວ່າດ້ວຍການແຕ່ງຕັ້ງຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ ແລະ ບົດແນະນຳເລກທີ 12/ສພວສ ລົງວັນທີ 13/5/2019 ກ່ຽວກັບການຈັດຕັ້ງປະຕິບັດມະຕິກົມການເມືອງສູນກາງພັກ ວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ. ທ່ານ ກິແກ້ວ ໄຂຄຳພິທູນ ກ່າວວ່າ: ເພື່ອເຮັດໃຫ້ການຄົ້ນຄວ້າແນວຄິດ ໄກສອນ ພົມວິຫານ ກາຍເປັນໜ້າທີ່ຂອງທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນ ໃຫ້ກາຍເປັນຂະບວນການຟົດຟື້ນ, ກວ້າງຂວາງ, ເລິກເຊິ່ງ ເພື່ອລະນຶກວັນເກີດຂອງປະທານ ໄກສອນ ພົມວິຫານ ຄົບຮອບ 100 ປີ ໃນປີ 2020. ພວກເຮົາ ຈະໄດ້ພ້ອມກັນຄົ້ນຄວ້າ, ເຊື່ອມຊຶມເນື້ອໃນຈິດໃຈຂອງມະຕິກົມການເມືອງສູນກາງພັກ ຈຳນວນ 2 ສະບັບ, ບົດແນະນຳຂອງຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ ແລະ ຮັບຟັງແຜນການຄົ້ນຄວ້າແນວຄິດ ໄກສອນ ພົມວິຫານ ແຕ່ນີ້ຮອດປີ 2020 ຂອງຄະນະຮັບຜິດຊອບ ພ້ອມດຽວກັນນີ້ ທ່ານ ກິແກ້ວ ໄຂຄຳພິທູນ ກໍໄດ້ຍົກໃຫ້ເຫັນຄວາມຈຳເປັນພາວະວິໄສແຫ່ງການຄົ້ນຄວ້າແນວຄິດ ໄກສອນ ພົມວິຫານ, ທັດສະນະຊີ້ນຳອັນເປັນພື້ນຖານ ແລະ ຄາດໝາຍກ່ຽວກັບການຄົ້ນຄວ້າແນວຄິດ ໄກສອນ ພົມວິຫານ ແລະ ເຜີຍແຜ່ວຽກງານຈຸດສຸມ, ວິທີຈັດຕັ້ງປະຕິບັດການຄົ້ນຄວ້າແນວຄິດ ໄກສອນ ພົມວິຫານຕື່ມອີກ. (ຂ່າວ: ແສງຈັນ)