ລມຕ ກະຊວງພາຍໃນ ເນັ້ນໃຫ້ເອົາໃຈໃສ່ 7 ບັນຫາການປັບປຸງແບ່ງຂັ້ນຄຸ້ມຄອງ


...

10.10.2019 8:14     

   ລັດຖະມົນຕີກະຊວງພາຍໃນ ເນັ້ນໃຫ້ເອົາໃຈໃສ່ 7 ບັນຫາສຳຄັນໃນການຜັນຂະຫຍາຍຈັດຕັ້ງປະຕິບັດມະຕິຂອງກົມການເມືອງສູນກາງພັກສະບັບເລກທີ 076/ກມສພ, ລົງວັນທີ 19 ສິງຫາ 2019 ວ່າດ້ວຍການປັບປຸງການແບ່ງຂັ້ນຄຸ້ມຄອງ ເພື່ອສ້າງຄວາມເຂັ້ມແຂງຂອງລະບົບບໍລິຫານລັດ ໃນໄລຍະໃໝ່. ກອງປະຊຸມປຶກສາຫາລື ການຜັນຂະຫຍາຍການຈັດຕັ້ງປະຕິບັດມະຕິດັ່ງກ່າວ ໄດ້ຈັດຂຶ້ນໃນວັນທີ 9 ຕຸລານີ້ ທີ່ກະຊວງພາຍໃນ ໂດຍການເປັນປະທານຂອງທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ; ມີບັນດາທ່ານຜູ້ຕາງໜ້າຈາກບັນດາກະຊວງ, ອົງການໃນລະບົບບໍລິຫານລັດເຂົ້າຮ່ວມ. ທ່ານ ຄຳໝັ້ນ ສູນວິເລີດ ໄດ້ກ່າວວ່າ: ກອງປະຊຸມຄັ້ງນີ້ ເພື່ອເຮັດໃຫ້ມະຕິ 076/ກມສພ ໄດ້ຮັບການຜັນຂະຫຍາຍຈັດຕັ້ງປະຕິບັດໃຫ້ປະກົດຜົນເປັນຈິງ ແລະ ເປັນການທົບທວນການກະກຽມປະເມີນຜົນການຈັດຕັ້ງປະຕິບັດວຽກງານ 3 ສ້າງ ຕາມມະຕິ 25/ກມສພ ວ່າດ້ວຍທິດທາງ, ເປົ້າໝາຍ ແລະ ມາດຕະການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມ ແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ ແລະ ຄຳສັ່ງ 34/ນຍ ລົງວັນທີ 23 ສິງຫາ 2016 ວ່າດ້ວຍທິດທາງ, ເປົ້າໝາຍ ແລະ ມາດຕະການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ. ຜ່ານການປຶກສາຫາລື, ທ່ານ ຄຳໝັ້ນ ສູນວິເລີດ ໄດ້ມີຄຳເຫັນຊີ້ນຳ ແຜນການຜັນຂະຫຍາຍຈັດຕັ້ງປະຕິບັດມະຕິດັ່ງກ່າວ ໂດຍໄດ້ເນັ້ນໃສ່ 7 ວຽກງານໃຫ້ບັນດາກະຊວງ, ອົງການ ເອົາໃຈໃສ່ຈັດຕັ້ງປະຕິບັດຄື: 1). ຈັດຕັ້ງເຊື່ອມຊຶມມະຕິ 076/ກມສພ ໃຫ້ພະນັກງານຫຼັກແຫຼ່ງຂອງຕົນ ເພື່ອໃຫ້ມີຄວາມເຂົ້າໃຈເອກະພາບ. 2). ທົບທວນກົດໝາຍ, ນິຕິກຳຕ່າງໆ, ພາລະບົດບາດ, ໜ້າທີ່ ແລະ ສິດຂອງກະຊວງ, ອົງການ ເພື່ອຊອກຫາຈຸດທີ່ບໍ່ສອດຄ່ອງຕາມທິດສາມສ້າງ, ບ່ອນທີ່ບໍ່ສອດຄ່ອງກັບມະຕິ 076/ກມສພ ໃຫ້ສ້າງແຜນການປັບປຸງໃຫ້ສອດຄ່ອງ ແລະ ແທດ ເໝາະກັບສະພາບຕົວຈິງ. 3). ໃຫ້ບັນດາກະຊວງ, ອົງການ ສັງລວມວຽກງານທີ່ໄດ້ແບ່ງໃຫ້ອົງການປົກຄອງທ້ອງຖິ່ນ ກໍຄືພະແນກການຂອງຕົນຂັ້ນແຂວງ, ຫ້ອງການຂະແໜງການຕົນຂັ້ນເມືອງ ທີ່ກຳນົດໄວ້ໃນກົດໝາຍ ຫຼື ດຳລັດ ມາເຮັດເປັນຂໍ້ຕົກລົງຂອງລັດຖະມົນຕີ ຫຼື ເຮັດບົດບັນທຶກ ແບ່ງຄວາມຮັບຜິດຊອບໃນແຕ່ລະວຽກໃຫ້ພະແນກການຂອງຕົນຂັ້ນແຂວງ ແລະ ວຽກງານທີ່ແບ່ງໃຫ້ຫ້ອງການຂັ້ນເມືອງຮັບຜິດຊອບ. 4). ໃຫ້ກະຊວງ, ອົງການ ສຸມໃສ່ຮັບຜິດຊອບວຽກງານຄຸ້ມຄອງມະຫາພາກ ເປັນຕົ້ນຕໍ, ແບ່ງຂັ້ນຄຸ້ມຄອງໃຫ້ຖືກຕ້ອງ ລວມທັງຕ້ອງເອົາໃຈໃສ່ຝຶກອົບຮົມໃຫ້ທ້ອງຖິ່ນ ມີຄວາມສາມາດໃນການປະຕິບັດວຽກງານໄດ້ຢ່າງມີປະສິດທິພາບສູງ, ໃນໄລຍະດໍາເນີນການປະຕິບັດຕົວຈິງນັ້ນ ກະຊວງ, ອົງການຂັ້ນສູນກາງ ກໍຕ້ອງເອົາໃຈໃສ່ຕິດຕາມ ແນະນຳຢ່າງສະໝໍ່າສະເໝີຈົນກວ່າເຂົາເຈົ້າຈະຊໍານານ. 5). ສຳລັບການແບ່ງວຽກຄຸ້ມຄອງກົງຈັກການຈັດຕັ້ງ ແລະ ບຸກຄະລາກອນ ໃຫ້ເອົາໃຈໃສ່ປະຕິບັດຕາມທິດຊີ້ນໍາຂອງກົມການເມືອງສູນກາງພັກ ທີ່ກຳນົດໄວ້ໃນມະຕິວ່າດ້ວຍການປັບປຸງການແບ່ງຂັ້ນຄຸ້ມຄອງຢ່າງເຂັ້ມງວດ. 6). ໃຫ້ບັນດາກະຊວງ, ອົງການ ເອົາໃຈໃສ່ປະຕິບັດແຈ້ງການຂອງຄະນະປັບປຸງກົງຈັກການຈັດຕັ້ງລັດ ສະບັບເລກທີ 01/ຄປກລ, ລົງວັນທີ 2 ຕຸລາ 2019 ກ່ຽວກັບການແຕ່ງຕັ້ງຄະນະຮັບຜິດຊອບປັບປຸງກົງຈັກການຈັດຕັ້ງຂອງກະຊວງ, ອົງການ, ນະຄອນຫຼວງ ແລະ ບັນດາແຂວງ. 7). ພາຍຫຼັງກະຊວງ, ອົງການ ໄດ້ສ້າງແຜນການຜັນຂະຫຍາຍຈັດຕັ້ງປະຕິບັດມະຕິ 076/ກມສພ ແລະ ສ້າງແຜນການປັບປຸງກົງຈັກຂອງກະຊວງ, ອົງການ ແລ້ວ ໃຫ້ສົ່ງມາຍັງກະຊວງພາຍໃນ ເພື່ອຕິດຕາມການປະຕິບັດ. (ຂ່າວ - ພາບ: ສຸກສະຫວັນ)