ກອງປະຊຸມຄົບຄະນະກຳມາທິການບັນດາເຜົ່າ


...

10.10.2019 8:15     

   (ສພຊ) ກໍາມາທິການບັນດາເຜົ່າ (ກບຜ) ສະພາແຫ່ງຊາດ (ສພຊ) ໄດ້ຈັດກອງປະຊຸມຄົບຄະນະ ປະຈໍາປີ 2019 ຂຶ້ນທີ່ສູນ ICTC (ຫຼັກ 6) ນະຄອນຫຼວງວຽງຈັນໃນລະຫວ່າງວັນທີ 8-10 ຕຸລານີ້ ໂດຍການເປັນປະທານຂອງທ່ານ ນາງ ບົວພັນ ລີໄກຢ່າ ປະທານກໍາມາທິການບັນດາເຜົ່າ ມີບັນດາທ່ານຮອງປະທານກໍາມາທິການ, ບັນດາທ່ານສະມາຊິກສະພາແຫ່ງຊາດທີ່ເປັນກໍາມະການຂອງກໍາມາທິການບັນດາເຜົ່າ ແລະ ບັນດາທ່ານຕາງໜ້າຂອງກໍາມາທິການພາຍໃນ ສະພາແຫ່ງຊາດ, ຕາງໜ້າຈາກກະຊວງທີ່ກ່ຽວຂ້ອງ, ປະທານສູນກາງສະຫະພັນກໍາມະບານລາວ, ຜູ້ຕາງໜ້າຈາກອົງການຈັດຕັ້ງມະຫາຊົນ ແລະ ຂະແໜງການທີ່ກ່ຽວຂ້ອງ, ຄະນະກົມ, ຄະນະພະແນກ, ວິຊາການຈາກສູນກາງ, ຈາກ 18 ເຂດເລືອກຕັ້ງ ແລະ ແຂກຖືກເຊີນເຂົ້າຮ່ວມ. ຈຸດປະສົງຂອງການຈັດກອງປະຊຸມໃນຄັ້ງນີ້ ກໍເພື່ອສະຫຼຸບຕີລາຄາ, ຖອດຖອນບົດຮຽນການ ເຄື່ອນໄຫວວຽກງານຂອງກໍາມາທິການບັນດາເຜົ່າ ປະຈໍາປີ 2019 ແລະ ວາງທິດທາງແຜນການເຄື່ອນໄຫວວຽກງານໃນປີ 2020; ຮັບຮູ້ ແລະ ເຂົ້າໃຈແຈ້ງຕໍ່ບັນຫາທີ່ພົ້ນເດັ່ນໃນຂົງເຂດວຽກງານຊົນເຜົ່າ, ສາສະໜາ ໂດຍຜ່ານຈາກການຕິດຕາມກວດກາ ແລະ ເກັບກໍາຂໍ້ມູນຕ່າງໆໃນປີ 2019 ແລະ ເພື່ອຄົ້ນຄວ້າ, ປະກອບຄໍາເຫັນໃສ່ຮ່າງນິຕິກໍາ ຂອງບັນດາພາກສ່ວນທີ່ກ່ຽວຂ້ອງ ໃນຂອບເຂດຄວາມຮັບຜິດຊອບຂອງກໍາມາທິການບັນດາເຜົ່າ. ໃນພິທີເປີດກອງປະຊຸມທ່ານ ນາງ ບົວພັນ ລີໄກຢ່າ ໄດ້ກ່າວວ່າ: ກອງປະຊຸມໃນຄັ້ງນີ້ ໄດ້ເປີດຂຶ້ນທ່າມກາງບັນ ຍາກາດທີ່ສະພາແຫ່ງຊາດ ກໍຄືສະພາປະຊາຊົນແຂວງ ກໍາລັງຫ້າງຫາກະກຽມເນື້ອໃນຮອບດ້ານ ເພື່ອດໍາເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນຂັ້ນແຂວງຊຸດທີ I ທີ່ຈະເປີດຂຶ້ນຕໍ່ໜ້ານີ້. ກອງປະຊຸມຄົບຄະນະໃນຄັ້ງນີ້ ເປັນຄັ້ງທີ 4 ຂອງສະພາແຫ່ງຊາດຊຸດທີ VIII ເພື່ອເປັນການສະຫຼຸບຕີລາຄາການເຄື່ອນໄຫວວຽກງານ ປະຈໍາປີ 2019 ແລະ ວາງທິດທາງແຜນການເຄື່ອນໄຫວໃນປີ 2020 ຂອງກໍາມາທິການບັນດາເຜົ່າ ທັງຈະໄດ້ຮັບຟັງການປະກອບຄໍາຄິດຄໍາເຫັນຈາກບາງເຂດເລືອກຕັ້ງ ແລະ ບັນດາພາກສ່ວນທີ່ກ່ຽວຂ້ອງຢູ່ ສູນກາງເພື່ອເປັນການແລກປ່ຽນຄໍາຄິດຄໍາເຫັນ ແລະ ຖອດຖອນບົດຮຽນກ່ຽວກັບການເຄື່ອນໄຫວຂອງ ແຕ່ລະພາກສ່ວນ ແລະ ບັນຫາສໍາຄັນແມ່ນຜູ້ແທນກອງປະຊຸມຈະໄດ້ພ້ອມກັນແລກປ່ຽນ ຄໍາຄິດຄໍາເຫັນ ລົງເລິກໃສ່ຂອດການປະສານງານຊຶ່ງກັນ ແລະ ກັນໃນໄລຍະ 1 ປີຜ່ານມາ. (ຂ່າວ: ສອນສັກ ວັນວິໄຊ)