ກອງປະຊຸມໃຫຍ່ ຄັ້ງທີ III ຄະນະພັກຮາກຖານ ລັດວິສາຫະກິດ ນ້ຳປະປາ ນວ


...

10.10.2019 8:35     

   ກອງປະຊຸມໃຫຍ່ ຄັ້ງທີ III ຂອງຄະນະພັກຮາກຖານລັດ ວິສາຫະກິດນ້ຳປະປາ ນະຄອນ ຫຼວງວຽງຈັນ (ນວ) ໄດ້ຈັດຂຶ້ນໃນ ວັນທີ 9 ຕຸລານີ້ ທີ່ຫ້ອງປະຊຸມໃຫຍ່ລັດວິສາຫະກິດດັ່ງກ່າວ ໂດຍເປັນກຽດເຂົ້າຮ່ວມຂອງ ສະ ຫາຍ ບຸນທ່ຽງ ຂຸນສີ ຄະນະພັກ ປະທານແນວລາວສ້າງຊາດນະຄອນຫຼວງ, ມີຄະນະໜ່ວຍພັກຮາກຖານ, ສະມາຊິກພັກ ແລະ ແຂກຖືກເຊີນເຂົ້າຮ່ວມ. ສະຫາຍ ຄຳເຜີຍ ວົງສາຄຳຜຸຍ ເລຂາຄະນະພັກຮາກຖານລັດວິສາຫະກິດນ້ຳປະປາ ນວ ໄດ້ຜ່ານບົດລາຍງານການ ເມືອງ ຊຶ່ງໄດ້ຕີລາຄາຜົນການ ຈັດຕັ້ງປະຕິບັດມະຕິກອງປະ ຊຸມໃຫຍ່ຄັ້ງທີ II ຂອງຄະນະພັກຮາກຖານ ລັດວິສາຫະກິດນ້ຳປະປານະຄອນຫຼວງ 2014-2018 ຍົກໃຫ້ເຫັນຜົນງານການ ເຄື່ອນໄຫວທີ່ພົ້ນເດັ່ນຫຼາຍດ້ານ ພ້ອມທັງຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນ ບົດຮຽນໃນການຈັດຕັ້ງປະຕິບັດ ແລະ ວາງແຜນທິດທາງໜ້າທີ່ລວມ ຄາດໝາຍໃນການເຄື່ອນໄຫວວຽກງານ 2019-2024. ຄະນະພັກຮາກຖານລັດວິສາຫະກິດນ້ຳປະປາ ນວ ປະ ກອບດ້ວຍ 8 ໜ່ວຍພັກ, ມີສະມາຊິກພັກທັງໝົດ 180 ສະຫາຍ, ຍິງ 47 ສະຫາຍ. ລະບົບກົງ ຈັກການຈັດຕັ້ງປະກອບມີ ພະ ນັກງານກຳມະກອນທັງໝົດ 658 ຄົນ, ແບ່ງການບໍລິຫານອອກເປັນ 10 ພະແນກການ, ມີ 8 ສາຂາ, 5 ໂຮງງານຜະລິດນ້ຳ, ມີ 4 ໂຄງການ, 1 ສູນຝຶກ ອົບຮົມ ແລະ 1 ໂຮງງານຜະ ລິດນ້ຳດື່ມກຣິດສະຕານລາວ. ໃນການນຳພາວຽກງານວິຊາສະເພາະ ຄະນະພັກໄດ້ຖືເອົາ ເປັນວຽກງານສຳຄັນ ເພື່ອຮັບ ປະກັນການດຳເນີນທຸລະກິດໃຫ້ຖືກຕ້ອງຕາມແນວທາງປ່ຽນແປງໃໝ່ຮອບດ້ານຂອງພັກໃຫ້ສອດຄ່ອງກັບສະພາບແຕ່ລະໄລຍະ, ປັບປຸງລະບົບການຄຸ້ມຄອງດ້ວຍເຄື່ອງມືທັນສະໄໝໃນທຸກຂົງເຂດວຽກງານ, ຮ່ວມມືກັບບັນດາທະນາຄານທຸລະກິດໃນການບໍລິການລູກຄ້າຜ່ານລະບົບຊຳລະເງິນທີ່ທັນສະໄໝ, ຂະຫຍາຍກຳລັງການຜະລິດ ເພີ່ມພື້ນທີ່ການບໍລິການ ແລະ ຂະຫຍາຍຕາຂ່າຍທໍ່ໃຫ້ກວ້າງອອກ ເພື່ອແນໃສ່ໃຫ້ການຊົມໃຊ້ນ້ຳປະປາໃຫ້ພຽງພໍ ແລະ ທົ່ວເຖິງ. ຜ່ານການຈັດຕັ້ງນຳພາສະແດງໃຫ້ເຫັນວ່າ: ກຳລັງການຜະລິດໃນປີ2018 ຜະລິດໄດ້ 320.000 ແມັດກ້ອນ/ວັນ ທຽບໃສ່ປີ 2014 ເພີ່ມຂຶ້ນ 78%. ຄວາມຍາວຂອງ ລະບົບສາຍທໍ່ປີ 2018 ມີ 2.404.324 ແມັດ ເພີ່ມ ຂຶ້ນ 65%. ສາມາດສະໜອງນ້ຳ (ທຽບໃສ່ປະຊາກອນ) ຮອດປີ 2018 ກວມ 90% ຖ້າທຽບໃສ່ພື້ນທີ່ບໍລິການໄດ້ປະມານ 96% ແລະ ຂົງເຂດວຽກງານຕ່າງໆມີການເພີ່ມ ແລະ ຂະຫຍາຍຕົວເປັນກ້າວໆ. ໃນກອງປະຊຸມຄັ້ງນີ້ ໄດ້ປ່ອນບັດຄັດເລືອກເອົາຄະນະພັກຊຸດໃໝ່ເພື່ອສືບຕໍ່ຊີ້ນຳນຳພາ. ກອງປະຊຸມຄັ້ງປະຖົມມະລືກໄດ້ເລືອກເອົາສະຫາຍ ຄຳເຜີຍ ວົງສາຄຳຜຸຍ ເປັນເລ ຂາຄະນະພັກຮາກຖານລັດວິສາຫະກິດນ້ຳປະປາ, ເລືອກເອົາ ສະຫາຍ ນາງ ເພື້ອນແສງ ໄຊນາຄຳ ເປັນຮອງເລຂາ, ເລືອກເອົາສະຫາຍ ພອນວິໄລ ທາວົງ ເປັນປະທານກວດກາ. (ຂ່າວ: ມະລິ, ພາບ: ຕຸໄລເພັດ)