ຄຳມ່ວນ ເປີດການຮຽນທິດສະດີ ລະບົບ ຊັ້ນກາງ ຮຸ່ນທີ XIV


...

...

10.10.2019 9:27     

   ພິທີເປີດການຮຽນ-ການສອນໂຮງຮຽນທິດສະດີການເມືອງ-ການປົກຄອງແຂວງຄຳມ່ວນ ໄດ້ຈັດຂຶ້ນຫວ່າງແລ້ວນີ້ ທີ່ສະໂມສອນ 21 ມີນາ ໂດຍເປັນກຽດເຂົ້າຮ່ວມຂອງທ່ານ ສົມໃຈ ເພັດສີນວນ ຮອງເລຂາພັກແຂວງ ປະທານສະພາປະ ຊາຊົນແຂວງຄຳມ່ວນ, ທ່ານ ນາງ ອານົງໄຊ ສັງທອງເພັດ ຜູ້ອຳນວຍການໂຮງຮຽນການເມືອງ-ການປົກຄອງແຂວງ, ມີແຂກຖືກເຊີນຈາກພະແນກ ການອ້ອມຂ້າງແຂວງ ຕະຫຼອດເຖິງພະນັກງານ, ຄູ-ອາຈານ ແລະ ນັກສຶກສາທິດສະດີການເມືອງ-ການປົກຄອງຊັ້ນກາງ ຮຸ່ນທີ XIV ເຂົ້າຮ່ວມ. ທ່ານ ບຸນເລີງ ເລີດບຸນຊູ ຮອງອຳນວຍການໂຮງຮຽນໄດ້ ຜ່ານແຜນການຮຽນ-ການສອນ ສົກປີ 2019-2020 ວ່າ: ໂຮງ ຮຽນການເມືອງ-ການປົກຄອງ ປະກອບມີພະນັກງານ, ຄູ-ອາ ຈານ 55 ທ່ານ, ໃນນີ້ມີອາຈານສອນພາຍໃນ 15 ທ່ານ ແລະ ອາ ຈານຮັບເຊີນ 40 ທ່ານ, ມີນັກ ສຶກສາຈຳນວນ 69 ຄົນ ຍິງ 19 ຄົນ, ດ້ານໂຄງປະກອບການຮຽນ-ການສອນມີໄລຍະເວລາຮຽນທັງໝົດ 15 ເດືອນ, ແບ່ງອອກເປັນ 3 ພາກຮຽນ, ປະກອບມີ 27 ວິຊາຮຽນ, ມີ 158 ບົດ ແລະ 78 ໜ່ວຍກິດ, ປະກອບມີມື້ຮຽນ 450 ວັນ, ມີ 1.248 ຊົ່ວໂມງຮຽນ ໃນນີ້ມີຊົ່ວໂມງບັນ ຍາຍ 664 ຊົ່ວໂມງ, ກຽມສຳມະນາ 65 ຊົ່ວໂມງ, ສຳມະນາ 172 ຊົ່ວໂມງ, ລາຍງານເພີ່ມ 10 ຊົ່ວໂມງ, ແກ້ໄຂຂໍ້ຂ້ອງໃຈ 102 ຊົ່ວໂມງ, ທວນສອບເສັງ 53 ຊົ່ວໂມງ, ສອບເສັງຂຽນ 90 ຊົ່ວໂມງ ແລະ ສອບເສັງປາກເປົ່າ 90 ຊົ່ວໂມງ ໃນຈຳນວນ 27 ວິຊາແມ່ນຈະໄດ້ມີການສອບເສັງປາກເປົ່າຈຳນວນ 6 ວິຊາຄື: ວິຊາປັດຊະຍາ, ເສດ ຖະສາດການເມືອງ, ລັດທິສັງ ຄົມນິຍົມວິທະຍາສາດ, ການປົກຄອງ, ກໍ່ສ້າງພັກ ແລະ ວິຊາຂົນຂວາຍກໍ່ສ້າງຮາກຖານການເມືອງ. ໂອກາດດຽວກັນຍັງໄດ້ເປີດຂະບວນການແຂ່ງຂັນ-ຍ້ອງຍໍ ພາຍໃຕ້ຄຳຂວັນ "ຮັກຊາດ ແລະ ພັດທະນາ" ຕິດພັນກັບການສອນດີ-ຮຽນເກັ່ງຂອງພະນັກງານ, ຄູ-ອາຈານ ແລະ ນັກສຶກສາ ໂດຍກຳນົດເປົ້າໝາຍ ເນື້ອໃນຂໍ້ແຂ່ງຂັນ ຕາມ 4 ເປົ້າ ໝາຍຄື: ໃຫ້ໄວ, ໃຫ້ດີ, ໃຫ້ຫຼາຍ ແລະ ໃຫ້ຖືກຕ້ອງ ໂດຍການຕັ້ງ ເປົ້າໝາຍໃຫ້ນັກສຶກສາສູ້ຊົນ ປະຕິບັດໃຫ້ໄດ້ຄະແນນເກຣດ A ກວມເອົາ 50%, B+40% ແລະ B 10% ຈາກນັ້ນ ບັນດາ ຂະແໜງການພາຍໃນໂຮງຮຽນ ແລະ ຕາງໜ້ານັກສຶກສາໄດ້ ພ້ອມກັນຈັບມື ເພື່ອຢັ້ງຢືນເຖິງການປະຕິບັດບັນດາຂໍ້ແຂ່ງຂັນໃຫ້ບັນລຸຕາມເປົ້າໝາຍທີ່ວາງໄວ້. (ຂ່າວ-ພາບ: ກອງຄຳ)