ເຜີຍແຜ່ແນະນຳກ່ຽວກັບການສະຫຼຸບຕີລາຄາ ຈັດຕັ້ງປະຕິບັດກົດລະບຽບພັກ ສະໄໝທີ X

31.10.2019 10:35     

  ກອງປະຊຸມເຜີຍແຜ່ແນະນໍາກ່ຽວກັບການສະຫຼຸບຕີລາ ຄາການຈັດຕັ້ງປະຕິບັດ ກົດລະບຽບພັກ ສະໄໝທີ X ໄດ້ຈັດຂຶ້ນໃນວັນທີ 30 ຕຸລານີ້ ທີ່ຄະນະຈັດຕັ້ງສູນກາງພັກ, ພາຍໃຕ້ການເປັນປະທານຂອງສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ປະທານອົງການກວດກາລັດຖະບານ ຮອງຫົວໜ້າອະນຸກໍາມະການກົດລະບຽບ-ບຸກຄະລາກອນ ກອງປະຊຸມໃຫຍ່ ຄັ້ງທີ XI ຂອງພັກ, ມີພາກສ່ວນກ່ຽວຂ້ອງເຂົ້າຮ່ວມ.
    ໃນກອງປະຊຸມ ສະຫາຍ ວັນໄຊ ພອງສະຫວັນ ຮອງຫົວໜ້າຄະນະຈັດຕັ້ງສູນກາງພັກ ຫົວໜ້າໜ່ວຍງານຄົ້ນຄວ້າປັບປຸງກົດລະບຽບພັກ ສະໄໝທີ X ຂອງພັກ ໄດ້ຂຶ້ນກ່າວຈຸດ ປະສົງ ແລະ ເຜີຍແຜ່ຄໍາແນະນໍາຂອງອະນຸກໍາມະການກົດລະບຽບ ແລະ ບຸກຄະລາກອນ ກ່ຽວກັບ ການສະຫຼຸບຕີລາຄາ ການຈັດຕັ້ງປະຕິບັດກົດລະບຽບຂອງພັກ ສະໄໝທີ X ໃນທົ່ວອົງຄະນະພັກຕົນ, ສະບັບເລກທີ 13/ອກ-ບກ ລົງວັນທີ 29 ຕຸລາ 2019 ຊຶ່ງມີດ້ານເນື້ອໃນດັ່ງນີ້:
1. ຕີລາຄາຄືນຄວາມຮັບຮູ້ເຂົ້າໃຈຂອງສະມາຊິກພັກ ຕໍ່ກົດລະບຽບພັກ ສະໄໝທີ X ດີ-ອ່ອນແນວໃດ? 2. ຕີລາຄາການຈັດຕັ້ງປະຕິບັດກົດລະບຽບພັກ ນັບແຕ່ຂອດແຈກຢາຍ, ເຊື່ອມຊຶມ ມີຂໍ້ສະດວກ,ຂໍ້ຄົງຄ້າງແນວໃດ? ການປະຕິບັດກົດລະບຽບພັກ ໄດ້ຈັດຕັ້ງປະຕິບັດຢູ່ແຕ່ລະຂັ້ນແນວໃດ? ມີດ້ານດີ-ດ້ານອ່ອນແນວໃດ? 3. ໃຫ້ສະມາຊິກພັກປະກອບຄໍາເຫັນຕໍ່ກົດລະບຽບພັກ ສະໄໝທີ X ຍັງມີບັນຫາໃດບໍ່ສອດຄ່ອງ ແລະ ບັນຫາໃດຄວນປັບປຸງປ່ຽນແປງ ຫຼື ເພີ່ມເຕີມໃໝ່, ການປັບປຸງໃຫ້ເບິ່ງຄໍາສັບໃດ, ປະໂຫຍກໃດທີ່ຄວນຕັດອອກ ຫຼື ເພີ່ມຄວາມໝາຍໃໝ່ແນວໃດ, ການເພີ່ມເຕີມ ຄວນເພີ່ມອີກຈັກໝວດ, ຈັກມາດຕາ ແລະ ຕື່ມໃສ່ຈັກບັນຫາເຂົ້າອີກໃຫ້ເປັນຈັກຂໍ້.
ສຳລັບກົດລະບຽບພັກ ສະໄໝທີ X ປະກອບມີ 14 ໝວດ, 58 ມາດຕາ, ໃນນີ້ ໃຫ້ເອົາໃຈໃສ່ຄົ້ນຄວ້າບາງບັນຫາຄື: ພາກເປີດຫົວເລື່ອງ; ເນື້ອໃນຂອງກົດລະບຽບພັກ ໃຫ້ສຸມໃສ່ໝວດ ແລະ ມາດຕາ ຄື: ໝວດທີ I ກ່ຽວກັບສະມາຊິກພັກ; ໝວດທີ IV ການຈັດຕັ້ງພັກບັນດາແຂວງ, ນະຄອນຫຼວງ, ເມືອງ, ເທດສະບານ ແລະ ນະຄອນ; ໝວດທີ V ການຈັດຕັ້ງພັກ ບັນດາກະຊວງ-ອົງການ; ໝວດທີ VI ການຈັດຕັ້ງຮາກຖານພັກ; ໝວດທີ VII ພັກນໍາພາລັດ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມ; ໝວດທີ VIII ພັກນໍາພາຄະນະຊາວໜຸ່ມປະຊາຊົນປະຕິວັດລາວ; ໝວດທີ X ວຽກງານຕິດຕາມກວດກາຂອງພັກ ແລະ ຄະນະກວດກາພັກແຕ່ລະຂັ້ນ; ໝວດທີ XII ການເງິນຂອງພັກ; ວິທີຈັດຕັ້ງປະຕິບັດ ແລະ ວຽກງານອື່ນໆ.
ໃນວັນດຽວກັນນີ້, ບັນດາຜູ້ເຂົ້າຮ່ວມປະຊຸມ ຍັງໄດ້ຮັບຟັງການລາຍງານ ກ່ຽວກັບ ຜົນການດໍາເນີນ ກອງປະຊຸມໃຫຍ່ຮາກຖານພັກຂັ້ນທ້ອງຖິ່ນ, ກະຊວງ-ອົງການ ແລະ ການກະກຽມກອງປະຊຸມໃຫຍ່ ອົງຄະນະພັກເມືອງ-ນະຄອນ. ກອງປະຊຸມ ໂດຍການເປັນປະທານຂອງທ່ານ ຈັນສີ ໂພສີຄໍາ ກໍາມະການກົມການເມືອງສູນກາງ ພັກຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ຜູ້ປະຈໍາການອະນຸກໍາມະການກົດລະບຽບ-ບຸກຄະລາກອນ ກອງປະຊຸມໃຫຍ່ ຄັ້ງທີຄັ້ງທີ XI ຂອງພັກ.
( ຂ່າວ: ແສງຈັນ)