ກຳມາທິການຕ່າງປະເທດ ຄົ້ນຄວ້າ ພິຈາລະນາຫຼາຍບັນຫາ

01.11.2019 9:11     

  ກອງປະຊຸມຄົບຄະນະກໍາ ມາທິການ ການຕ່າງປະເທດສະ ພາແຫ່ງຊາດ ປະຈໍາປີ 2019 ໄດ້ຈັດຂຶ້ນໃນວັນທີ 30 ຕຸລາຜ່ານມາທີ່ສູນຮ່ວມມື ແລະ ຝຶກ ອົບຮົມລາວ-ຍີ່ປຸ່ນ ໂດຍການ ເຂົ້າຮ່ວມຂອງທ່ານ ແສງນວນ ໄຊຍະລາດ ຮອງປະທານສະ ພາແຫ່ງຊາດ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ເອກສະຫວ່າງ ວົງວິຈິດ ປະທານກໍາມາທິການການຕ່າງປະເທດສະພາແຫ່ງຊາດ ໄດ້ກ່າວວ່າ: ກອງປະຊຸມຄັ້ງນີ້ຈະໄດ້ສຸມໃສ່ປຶກສາຫາລື, ຄົ້ນຄວ້າ ແລະ ພິຈາລະນາ ໃນບາງບັນຫາທີ່ສໍາຄັນຄື: ສະຫຼຸບ ຕີລາຄາການເຄື່ອນໄຫວວຽກງານການຕ່າງປະເທດ ປະຈໍາປີ 2019 ແລະ ແຜນວຽກ 2020; ຮັບຟັງບົດລາຍງານກ່ຽວກັບ ວຽກງານຕິດຕາມກວດກາຂອງກໍາມາທິການ ການຕ່າງປະເທດ ຢູ່ 2 ແຂວງພາກເໜືອຄື: ແຂວງຊຽງຂວາງ ແລະ ຫົວພັນ ແລະ ຜົນກອງປະຊຸມຂອງ 3 ກໍາມາທິການ ການຕ່າງປະເທດ ທີ່ ສສ ຫວຽດນາມ; ຮັບຟັງການລາຍງານກ່ຽວກັບການເຄື່ອນໄຫວ ວຽກງານທີ່ພົ້ນເດັ່ນວຽກງານ ການຕ່າງປະເທດຂອງລັດຖະ ບານ ປະຈໍາປີ 2019 ແລະ ທິດ ທາງແຜນການປະຈໍາປີ 2020 ເປັນຕົ້ນຜົນຂອງການຈັດຕັ້ງ ປະຕິບັດຂໍ້ຕົກລົງຂອງລັດຖະບານ ແຫ່ງ ສປປ ລາວ ແລະ ລັດ ຖະບານ ແຫ່ງ ສສ ຫວຽດນາມ ວ່າດ້ວຍບັນຫາການຍົກຍ້າຍພູມລໍາເນົາ ຕາມລໍາພັງໃຈ ແລະ ການແຕ່ງດອງຜິດກົດໝາຍຢູ່ບໍລິເວນຊາຍແດນຂອງສອງປະ ເທດ; ຮັບຟັງສະພາບການພົ້ນເດັ່ນຂອງໂລກ ແລະ ພາກພື້ນ-ການເຄື່ອນໄຫວວຽກງານການຕ່າງປະເທດຂອງລັດຖະບານ ປະຈໍາປີ 2019 ທິດທາງ 2020, ສະພາບການກ່ຽວກັບວຽກງານຊາຍແດນ, ຮັບຟັງສະພາບການເກັບກໍາລາຍຮັບຈາກການເຮັດວີຊາເຂົ້າງົບປະມານແຫ່ງລັດ; ຮັບຟັງການສະເໜີບົດກ່ຽວກັບ ສະພາບການຈັດຕັ້ງປະຕິບັດ ແຜນແມ່ບົດ ໃນການສ້າງຄູ່ຮ່ວມຊາຕາກໍາ ລາວ-ຈີນ; ຮັບຟັງການລາຍງານກ່ຽວກັບວຽກງານການຮ່ວມມືສາກົນ, ການຄຸ້ມຄອງ, ການຊ່ວຍເຫຼືອ ເພື່ອການພັດທະນາ; ຮັບຟັງການລາຍງານກ່ຽວກັບສະພາບການຮ່ວມມື ລາວ-ຫວຽດນາມ; ຮັບຟັງການລາຍງານກ່ຽວກັບສະ ພາບການຮ່ວມມື ລາວ-ຈີນ ແລະ ວຽກງານສໍາຄັນອື່ນໆອີກ. ( ຂ່າວ: ແສງຈັນ)