ສມປຊ ເຊື່ອມຊຶມເອກະສານກ່ຽວກັບກອງປະຊຸມ 3 ຂັ້ນ

04.11.2019 9:22     

  ກອງປະຊຸມເຊື່ອມຊຶມ ເອກະສານຂອງພັກ ເພື່ອກ້າວເຂົ້າສູ່ກອງປະຊຸມ 3 ຂັ້ນ ໃຫ້ແກ່ພະນັກງານ,ຄູ-ອາຈານ ແລະ ນັກສຶກສາ ຂອງສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ໄດ້ຈັດຂຶ້ນໃນວັນທີ 1 ພະຈິກນີ້ ທີ່ສະຖາບັນດັ່ງກ່າວ ໂດຍການເປັນປະທານຂອງ ທ່ານ ພູວົງ ອຸ່ນຄຳແສງ ຮັກສາການ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີບັນດາພະນັກງານ ຄູ-ອາຈານ ແລະ ນັກສຶກສາເຂົ້າຮ່ວມ. ໃນການຈັດກອງປະຊຸມເຜີຍແຜ່ຄັ້ງນີ້ ເພື່ອເຮັດໃຫ້ພະນັກງານ-ລັດຖະກອນ,ຄູ-ອາຈານ ແລະ ນັກສຶກສາ ພາຍໃນ ສມປຊ ສາມາດກຳໄດ້ ແລະ ເຂົ້າໃຈກ່ຽວກັບ ການກະກຽມດຳເນີນກອງປະຊຸມໃຫຍ່ ອົງຄະນະພັກກະຊວງ, ອົງການ, ແຂວງ, ນະຄອນຫຼວງ, ອົງຄະນະພັກເມືອງ-ນະຄອນ ແລະ ຮາກຖານພັກ ໃນຂອບເຂດທົ່ວປະເທດ ຊຶ່ງເອກະສານທ່ີນຳມາເຊື່ອມຊຶມໃນຄັ້ງນີ້ປະກອບມີຄື: 1) ເສີມຂະຫຍາຍມູນເຊື້ອຂອງຊາດ,ຂອງລາວ; 2) ສັງຄົມສາມັກຄີປອງດອງ ແມ່ນບໍ່ເກີດແຫ່ງກຳລັງແຮງຂອງການປົກປັກຮັກສາ ແລະ ພັດທະນາປະເທດຊາດ ແລະ 3) ການແກ້ໄຂຄວາມທຸກຍາກ.
ທ່ານ ພູວົງ ອຸ່ນຄຳແສງ ໄດ້ກ່າວວ່າ: ໃນກອງປະຊຸມໃຫຍ່ ຄັ້ງທີ X ຂອງພັກ ໄດ້ຢັ້ງຢືນຢ່າງໜັກແໜ້ນວ່າ ການເພີມທະວີຄວາມສາມັກຄີປອງດອງຂອງປະຊາຊົນ, ບັນ ດາຊັ້ນຄົນ, ເພດໄວ ແລະ ສາ ສະໜາ ພາຍໃຕ້ການນຳພາຂອງພັກແມ່ນມູນເຊື້ອອັນດີ ງາມ, ແມ່ນກຳລັງແຮງຊະນະເລີດ ແລະ ເປັນປັດໄຈຕັດສິນຊີ້ຂາດຕໍ່ໄຊຊະນະຂອງພາລະກິດກູ້ຊາດ, ການປົກປັກຮັກສາ ແລະ ສ້າງສາພັດທະນາປະເທດຊາດກໍຄື ຕໍ່ຄວາມໝັ້ນຄົງຂອງລະບອບການເມືອງ ແລະ ຄວາມຍືນຍົງຄົງຕົວຂອງຊາດເຮົາຕາມເສັ້ນທາງກ້າວຂຶ້ນສູ່ຈຸດໝາຍສັງຄົມນິຍົມ.
(ຂ່າວ: ບຸນຕອມ)