ກອງປະຊຸມຄົບຄະນະ ຂອງໜ່ວຍສະມາຊິກສະພາປະຊາຊົນ ເພດຍິງ ນວ

07.11.2019 10:55     

  (ສພຊ) ກອງປະຊຸມຄົບຄະນະ ຂອງໜ່ວຍສະມາຊິກ ສະພາປະຊາຊົນເພດຍິງ ນະ ຄອນຫຼວງວຽງຈັນ ໄດ້ຈັດຂຶ້ນໃນວັນທີ 1 ພະຈິກ ທີ່ຫ້ອງປະຊຸມສຳນັກງານອົງການປົກຄອງ ນວ ໂດຍການເປັນປະທານຂອງ ທ່ານ ນາງ ຄຳຟອງ ພູມວົງໄຊ ຮອງປະທານສະພາປະຊາຊົນ ນວ, ຮອງປະທານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນວ, ຫົວໜ້າ ໜ່ວຍສະມາຊິກສະພາປະຊາຊົນ ເພດຍິງ ນວ. ເຂົ້າຮ່ວມໂດຍ ທ່ານຮອງປະທານ ແລະ ບັນດາທ່ານ ສະມາຊິກ ໜ່ວຍສະມາຊິກສະພາປະຊາຊົນ ເພດຍິງ ນວ. ກອງປະຊຸມ ໄດ້ຮັບຟັງ ການລາຍງານຂອງທ່ານນາງ ສົມຈັນ ສິງທະບຸດ ຮອງຫົວ ໜ້າ ໜ່ວຍສະມາຊິກສະພາປະຊາຊົນ ເພດຍິງ ນວ. ກ່ຽວກັບການເຄື່ອນໄຫວວຽກງານ 9 ເດືອນ ປີ 2019, ແຜນວຽກຈຸດສຸມ 3 ເດືອນ ທ້າຍປີ 2019 ແລະ ທິດທາງແຜນການ ປີ 2020 ຂອງໜ່ວຍສະມາຊິກສະພາປະຊາຊົນ ເພດຍິງ ນວ. ໂດຍທ່ານໄດ້ໃຫ້ຮູ້ວ່າ: ໜ່ວຍສະມາຊິກສະພາປະຊາຊົນ ເພດຍິງ ນວ ແມ່ນກົງຈັກການຈັດຕັ້ງໜຶ່ງຂອງຄະນະປະຈຳສະພາປະຊາຊົນ ນວ. ປະຕິບັດພາລະບົດບາດເປັນເສນາທິການໃຫ້ແກ່ຄະນະປະຈຳ ສະພາປະຊາຊົນ ນວ. ຄະນະປະຈຳ ສະພາແຫ່ງຊາດ ແລະ ຄະນະສະມາຊິກສະພາແຫ່ງຊາດເພດຍິງ. ເພື່ອຮັບ ປະກັນໃຫ້ແກ່ການຈັດຕັ້ງປະ ຕິບັດວຽກງານຂອງຄະນະສະມາຊິກສະພາປະຊາຊົນ ເພດຍິງ ນວ. ໃນການສົ່ງເສີມຄວາມກ້າວໜ້າ, ປົກປ້ອງສິດຂອງແມ່ຍິງ ແລະ ເດັກນ້ອຍ ຄຽງຄູ່ກັບການຈັດຕັ້ງປະຕິບັດວຽກງານຂອງສະພາປະຊາຊົນ ນວ. ໃນໄລຍະ 9 ເດືອນຜ່ານມາ, ໜ່ວຍສະມາຊິກສະພາປະຊາຊົນ ເພດຍິງ ນວ. ໄດ້ເອົາໃຈໃສ່ຈັດຕັ້ງປະຕິບັດເຄື່ອນໄຫວວຽກງານຂອງຕົນດ້ວຍຄວາມຮັບຜິດຊອບສູງ ຕາມ 3 ພາລະບົດບາດ ທີ່ໄດ້ກຳນົດໄວ້ໃນກົດໝາຍວ່າດ້ວຍສະພາປະຊາຊົນຂັ້ນແຂວງ ທາງດ້ານນິຕິກຳ, ດ້ານການຕົກລົງບັນຫາສຳຄັນພື້ນຖານຂອງທ້ອງຖິ່ນ ແລະ ດ້ານການຕິດຕາມກວດກາ. ໃນນີ້, ຄະນະໜ່ວຍ ແລະ ກຳມະການ ໄດ້ຕັ້ງໜ້າເອົາໃຈໃສ່ໃນການປະ ຕິບັດວຽກງານຕັດສິນບັນຫາສໍາຄັນຕ່າງໆ ໃນຂົງເຂດວຽກງານລວມ ແລະ ວຽກງານສະ ເພາະ ທີ່ຕິດພັນກັບແມ່ຍິງ ແລະ ເດັກນ້ອຍ ກໍຄືການປະກອບຄຳເຫັນ ແລະ ການລົງຄະແນນສຽງໃນກອງປະຊຸມສະໄໝສາມັນ ຂອງສະພາແຫ່ງຊາດ ແລະ ສະພາປະຊາຊົນ ນວ. ທີ່ໄດ້ຈັດຂຶ້ນແຕ່ລະຄັ້ງ ພ້ອມທັງໄດ້ເອົາໃຈໃສ່ປະຕິບັດວຽກ ງານຕິດຕາມກວດກາໃນການ ຈັດຕັ້ງປະຕິບັດບັນດານິຕິກຳ, ກົດໝາຍ, ມະຕິກອງປະຊຸມສະໄໝສາມັນ ຂອງສະພາແຫ່ງຊາດ ແລະ ສະພາປະຊາຊົນ ນວ. ໂດຍສະເພາະແມ່ນການແກ້ໄຂບັນຫາຜົນກະທົບຕໍ່ສິ່ງແວດລ້ອມ ແລະ ສັງຄົມ, ລົງເຄື່ອນໄຫວຕິດຕາມກວດກາ, ຊຸກຍູ້ ແລະ ເກັບກຳຂໍ້ມູນຢູ່ອົງການຕຸລາການ ແລະ ບັນດາພະແນກການອ້ອມຂ້າງ ນວ. ນອກຈາກນີ້, ກໍໄດ້ສົມທົບກັບພາກສ່ວນກ່ຽວຂ້ອງ ໃນການລົງຕິດຕາມກວດກາສະຖານທີ່ຕົວຈິງ ຕາມຄຳສະເໜີຂອງປະຊາຊົນອີກດ້ວຍ ຊຶ່ງໄດ້ພົບເຫັນຫຼາຍບັນຫາທີ່ຕິດພັນກັບສະຫະພັນແມ່ຍິງຂັ້ນເມືອງ ເຊັ່ນ: ບັນຫາການປະຕິບັດລະບຽບຂອງຄະນະກຳມະການບໍລິຫານກຸ່ມທ້ອນເງິນຂັ້ນບ້ານ, ການປ່ອຍເງິນກູ້ທີ່ບໍ່ສາມາດເກັບຄືນໄດ້ຕາມກຳນົດເວລາ, ການປິດບັງການປ່ອຍກູ້ຂອງຄະນະບໍລິຫານງານກຸ່ມທ້ອນເງິນຂັ້ນບ້ານ, ບັນຫາການປ່ອຍເງິນກູ້ຂ້າມບ້ານ ແລະ ການນຳເອົາເງິນຈຳນວນໜຶ່ງໄປໃຊ້ຈ່າຍຄອບຄົວ ທີ່ບໍ່ຖືກຕ້ອງຕາມລະບຽບການວາງໄວ້ ແລະ ບັນຫາອື່ນໆອີກຈຳນວນໜຶ່ງ. ຫຼັງຈາກນັ້ນ, ບັນດາທ່ານທີ່ເຂົ້າຮ່ວມກອງປະຊຸມ ກໍໄດ້ປະກອບຄຳຄິດຄຳເຫັນໃສ່ບົດລາຍງານດັ່ງກ່າວ ພ້ອມທັງຄົ້ນຄວ້າປຶກສາຫາລື ແລະ ຊອກຫາວິທີແກ້ໄຂບັນຫາຮ່ວມກັນໃນຕໍ່ໜ້າ. (ນາງ ພອນທິບ ອິນທິລາດ)