ຄະນະບໍລິຫານງານພັກເມືອງຫົງສາ ເປີດກອງປະຊຸມ ດຳເນີນຊີວິດການເມືອງ

07.11.2019 10:55     

  ເມືອງຫົງສາ ແຂວງໄຊຍະບູລີ ໄດ້ເປີດກອງປະຊຸມດຳເນີນຊີວິດການເມືອງພາຍໃນຄະນະບໍລິຫານງານພັກເມືອງ ທ້າຍສະໄໝທີ VII ຂຶ້ນໃນລະຫວ່າງ ວັນທີ 4-5 ພະຈິກ ນີ້ ທີ່ຫ້ອງປະຊຸມ ຫ້ອງການ ກະສິກຳ ແລະ ປ່າໄມ້ເມືອງ ໂດຍການເປັນປະທານຂອງສະຫາຍ ຄຳຫຼ້າ ຜິວວັນນາ ວ່າການເລຂາພັກເມືອງ ວ່າການເຈົ້າເມືອງຫົງສາ, ເຂົ້າຮ່ວມເປັນກຽດຂອງສະຫາຍ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໄຊຍະບູລີ, ມີຄະນະຊີ້ນຳຂັ້ນແຂວງ, ມີສະມາຊິກສະພາປະຊາຊົນແຂວງ ປະຈຳເມືອງຫົງສາ, ມີຄະນະປະຈຳພັກເມືອງ ແລະ ກຳມະການພັກເມືອງເຂົ້າຮ່ວມ. ໃນວາລະກອງປະຊຸມ ສະຫາຍ ສົມສີ ພົມມະຈັນ ຮອງເລຂາພັກເມືອງ ກໍໄດ້ຂຶ້ນຜ່ານຮ່າງບົດສຳຫຼວດການນຳພາລວມຂອງຄະນະບໍລິຫານງານພັກເມືອງຫົງສາ ສະໄໝທີ VII ຕໍ່ກອງປະຊຸມ ຊຶ່ງຄະນະບໍລິຫານງານພັກເມືອງ ໄດ້ຮັບເລືອກຕັ້ງຈາກກອງປະຊຸມໃຫຍ່ຜູ້ແທນອົງຄະນະບໍລິຫານງານພັກເມືອງ ໃນວັນທີ 8-9 ມີນາ 2014 ປະກອບມີ 25 ສະຫາຍ ຍິງ 4 ສະຫາຍ. ໃນນີ້, ມີກຳມະການປະຈຳພັກເມືອງ 7 ສະຫາຍ ຍິງ 1 ສະຫາຍ. ມາຮອດປັດຈຸບັນ ມີ 22 ສະຫາຍ ຍິງ 4 ສະຫາຍ. ທົ່ວອົງຄະນະພັກເມືອງຫົງສາ ມີ 5 ຄະນະພັກຮາກຖານ, ມີ 88 ໜ່ວຍພັກ, ມີສະມາຊິກພັກທັງໝົດ 1.454 ສະຫາຍ ຍິງ 423 ສະຫາຍ. ໃນນີ້, ສຳຮອງ 116 ສະຫາຍ ຍິງ 48 ສະຫາຍ. ໃນໄລຍະຜ່ານມາ ຄະນະພັກໄດ້ຖືເອົາວຽກງານການເມືອງ-ແນວຄິດເປັນກົກ, ເຊື່ອມຊຶມແນວທາງນະໂຍບາຍ, ມະຕິ, ຄຳສັ່ງ, ຂໍ້ກຳນົດ ແລະ ລະບຽບກົດໝາຍຂອງພັກ-ນິຕິກຳຕ່າງໆ ຂອງລັດຢ່າງເປັນປົກກະຕິ ແລະ ຕໍ່ເນື່ອງ. ສະແດງອອກຄື: ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານໄດ້ 71 ໜ່ວຍພັກ ເທົ່າກັບ 83,52% ຍັງບໍ່ບັນລຸ 1,48%, ສ້າງໄດ້ສະມາຊິກພັກແຂງກວມເອົາ 96,05%, ທົ່ວເມືອງສາມາດປະກາດເປັນບ້ານເຂັ້ມແຂງໜັກແໜ້ນໄດ້ 13 ບ້ານ ກວມເອົາ 39,39%, ໄດ້ປະກາດຮັບຮອງເປັນເມືອງ 2 ດີ 5 ເປັນເຈົ້າ ຂອງສະຫະພັນກຳມະບານ, ເມືອງ 3 ດີ ຂອງສະຫະພັນແມ່ຍິງ, ເມືອງ 4 ບຸກຂອງຊາວໜຸ່ມ ປະຊາຊົນ ປະຕິວັດລາວ ແລະ ເມືອງຢຸດຕິການຖາງປ່າເຮັດໄຮ່ແບບເລື່ອນລອຍ. ພ້ອມນີ້, ກອງປະຊຸມກໍໄດ້ແບ່ງກຸ່ມ ເພື່ອສຳຫຼວດບຸກຄົນພາຍໃນຄະນະບໍລິຫານງານພັກເມືອງ. ທັງນີ້, ກໍເພື່ອຄວາມເປັນເອກະພາບ ແລະ ຮັບຮອງເອົາບັນດາເນື້ອໃນດັ່ງກ່າວ ເພື່ອນຳສະເໜີຕໍ່ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງຫົງສາ ທີ່ຈະເປີດຂຶ້ນໃນກາງເດືອນພະຈິກນີ້, ໃຫ້ບັນລຸຜົນສຳເລັດຕາມລະດັບຄາດໝາຍ.(ພາບ-ຂ່າວ: ກິດຕິສັກ ບົວໄລ)