ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ເປີດຂຶ້ນຢ່າງເປັນທາງການ

08.11.2019 10:35     

  ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ (ສພຊ) ຊຸດທີ VIII ໄດ້ເປີດຂຶ້ນຢ່າງເປັນທາງການ ໃນຕອນເຊົ້າວັນທີ 7 ພະຈິກ 2019 ທີ່ສະພາແຫ່ງຊາດ (ຫຼັກ6) ພາຍໃຕ້ການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໂດຍການເປັນກຽດເຂົ້າຮ່ວມຂອງ ທ່ານ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ, ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີການນຳພັກ-ລັດ, ສະມາຊິກສະພາແຫ່ງຊາດ ແລະ ພາກສ່ວນກ່ຽວຂ້ອງເຂົ້າຮ່ວມ. ກ່າວເປີດກອງປະຊຸມຢ່າງເປັນທາງການ ທ່ານ ນາງ ປານີ ຢາທໍ່ຕູ້ ກ່າວວ່າ: ກອງປະຊຸມຄັ້ງນີ້ ເປັນກອງປະຊຸມທ້າຍປີ. ສະນັ້ນ, ຈະໄດ້ພິຈາລະນາຕົກລົງຫຼາຍບັນຫາສຳຄັນພື້ນຖານຂອງປະເທດຊາດດັ່ງນີ້: 1. ພິຈາລະນາ, ຮັບຮອງເອົາການສະເໜີແຕ່ງຕັ້ງສະ ມາຊິກລັດຖະບານ ຕາມການ ສະເໜີຂອງທ່ານນາຍົກລັດ ຖະມົນຕີ; 2. ຮັບຟັງ ແລະ ພິ ຈາລະນາ ບົດລາຍງານຂອງ ລັດຖະບານ ກ່ຽວກັບການຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນ ງົບປະມານ ແລະ ແຜນເງິນ ຕາປະຈຳປີ 2019 ແລະ ທິດ ທາງແຜນການ ປະຈຳປີ 2020; 3. ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2019 ແລະ ທິດທາງແຜນການ ປະຈຳປີ 2020 ຂອງອົງການກວດສອບແຫ່ງລັດ, ບົດລາຍງານຜົນການກວດສອບບົດສະຫຼຸບຂາດຕົວຂອງການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2018, ບົດລາຍງານຂອງອົງການກວດກາລັດຖະບານກ່ຽວກັບການກວດກາຕາມຜົນການກວດສອບ ສົກປີ 2014-2015, 2015-2016 ແລະ ປີ 2017; 4. ຮັບຟັງການປະກອບຄຳເຫັນຂອງຄະນະປະຈຳສະພາແຫ່ງຊາດ ຕໍ່ບົດລາຍງານຂອງລັດຖະບານ, ອົງການກວດສອບແຫ່ງລັດ ແລະ ອົງການກວດກາລັດຖະບານ; 5. ພິຈາລະນາ, ຮັບຮອງເອົາບົດລາຍງານຜົນການຕິດຕາມກວດກາຂອງຄະນະປະຈຳສະພາແຫ່ງຊາດ ກ່ຽວກັບການ ຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍທີ່ຕິດພັນກັບການເກັບລາຍຮັບ, ການສ້າງວິຊາຊີບ ການພັດທະນາສີມືແຮງງານ ທີ່ມີຄຸນນະພາບ, ການສ້າງວຽກເຮັດງານທຳຂອງປະຊາຊົນ ແລະ ການຈັດຕັ້ງປະຕິບັດນິຕິກຳທີ່ພົວພັນກັບການເຊົ່າ ແລະ ສຳປະທານທີ່ດິນ; 6. ພິຈາລະນາ, ຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2019 ແລະ ທິດທາງປະຈໍາປີ 2020; 7. ພິຈາລະນາ, ຮັບຮອງເອົາບົດລາຍງານກ່ຽວກັບການເຄື່ອນໄຫວວຽກງານຂອງສະພາແຫ່ງຊາດ ປະຈຳປີ 2019 ແລະ ທິດທາງແຜນການປະຈຳປີ 2020; 8. ພິຈາລະນາ, ຮັບຮອງເອົາການຈັດຕັ້ງປະເມີນຜົນການປະຕິບັດໜ້າທີ່ຂອງບຸກຄະລາກອນ ດຳລົງຕຳແໜ່ງທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງ ແລະ 9. ພິຈາລະນາ ຮັບຮອງເອົາ ການສ້າງຕັ້ງ ແລະ ປັບປຸງຮ່າງກົດໝາຍ ຈຳນວນ 8 ສະບັບຄື: ຂົງເຂດເສດຖະກິດ 4 ສະບັບ ແລະ ຂົງເຂດວັດທະນະທຳ-ສັງຄົມ 4 ສະບັບ. ນອກຈາກເນື້ອໃນທີ່ສຳຄັນທີ່ກ່າວມານັ້ນ, ກອງປະຊຸມຍັງຈະໄດ້ຮັບຟັງການຊີ້ແຈງອະທິບາຍຈາກ 5 ກະຊວງກ່ຽວຂ້ອງ ກ່ຽວກັບນະໂຍບາຍ, ວິທີການ, ມາດຕະການ ເພື່ອຊຸກຍູ້ການຜະລິດສະບຽງອາຫານ, ການສົ່ງເສີມການຜະລິດພາຍໃນເພື່ອທົດແທນການນຳເຂົ້າສິນຄ້າ ແລະ ເພື່ອການສົ່ງອອກ, ການຄຸ້ມຄອງລາຄາສິນຄ້າ ແລະ ຄຸ້ມຄອງອັດຕາເງິນເຟີ້, ອັດຕາແລກປ່ຽນ, ການປະຕິບັດນະໂຍບາຍປະຢັດ, ການຄຸ້ມຄອງການເຂົ້າ-ອອກເມືອງ ແລະ ຮັບຟັງການປະກອບຄຳເຫັນຂອງສູນກາງແນວລາວສ້າງຊາດ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດຊຸດທີ VIII. ທ່ານປະທານສະພາ ຍັງຮຽກຮ້ອງມາຍັງບັນດາສະ ມາຊິກສະພາແຫ່ງຊາດ ຈົ່ງສຸມສະຕິປັນຍາ, ຍາດເວລາສຶກສາຄົ້ນຄວ້າ ແລະ ປະກອບຄຳເຫັນຢ່າງມີຈຸດສຸມ ໃສ່ເນື້ອໃນສຳຄັນທີ່ນຳມາພິຈາລະນາໃນກອງປະຊຸມຄັ້ງນີ້ໃຫ້ບັນລຸຕາມຄາດໝາຍທີ່ວາງໄວ້. ພາຍຫຼັງທ່ານປະທານສະພາແຫ່ງຊາດກ່າວເປີດກອງປະຊຸມຢ່າງເປັນທາງການແລ້ວ, ບັນດາສະມາຊິກສະພາແຫ່ງຊາດ ໄດ້ພິຈາລະນາ ແລະ ຮັບຮອງເອົາການແຕ່ງຕັ້ງສະມາຊິກລັດຖະບານຕາມການສະເໜີຂອງທ່ານນາ ຍົກລັດຖະມົນຕີ ຈຳນວນ 2 ຕຳແໜ່ງດ້ວຍຄະແນນສຽງສ່ວນຫຼາຍ ປະກອບມີ 1.ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງແຜນການ ແລະ ການລົງທຶນ 2.ທ່ານ ກິແກ້ວ ໄຂຄຳພິທູນ ເປັນລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ. (ຂ່າວ: ຄຳເຮືອງ-ພາບ: ພູວຽງຄຳ)