ຊາວໜຸ່ມຮາກຖານ ພະແນກອຸດສາຫະກຳ ແລະ ການຄ້າ ແຂວງຈຳປາສັກ ຈັດພິທີຮັບໃບຢັ້ງຢືນ 4 ບຸກ

08.11.2019 10:30     

  ຄະນະຊາວໜຸ່ມຮາກຖານ ພະແນກອຸດສາຫະກຳ ແລະ ການຄ້າ ແຂວງຈຳປາສັກ ໄດ້ຈັດພິທີຮັບໃບຢັ້ງຢືນ 4 ບຸກຂຶ້ນ ໃນວັນທີ 5 ພະຈິກ ຜ່ານມາ ທີ່ຫ້ອງປະຊຸມຂອງພະແນກ ດັ່ງກ່າວ ພາຍໃຕ້ການເປັນປະ ທານຂອງ ທ່ານ ສຸລິສັກ ວິລະບຸດ ເລຂາໜ່ວຍຊາວໜຸ່ມຮາກຖານ ພະແນກອຸດສາຫະກຳ ແລະ ການຄ້າ, ໃຫ້ກຽດເຂົ້າຮ່ວມຂອງ ທ່ານ ອຸດົມສັກ ດີວິໄຊ ກຳມະການພັກແຂວງ ເລຂາຄະນະບໍລິຫານງານຊາວໜຸ່ມ ປປລ ແຂວງຈຳປາສັກ, ນອກນັ້ນຍັງມີ ແຂກຖືກເຊີນຈາກອົງການຈັດຕັ້ງມະຫາຊົນ ແລະ ສະມາຊິກຊາວໜຸ່ມພາຍໃນໜ່ວຍເຂົ້າຮ່ວມ ໃນພິທີ ທ່ານ ສຸລິສັກ ວິລະບຸດ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກໃນ 1 ປີຜ່ານມາ ແລະ ແຜນການຈັດຕັ້ງປະຕິບັດໃນຕໍ່ໜ້າ ໂດຍຫຍໍ້ ຊຶ່ງໄດ້ຍົກໃຫ້ເຫັນດ້ານດີທີ່ຕັ້ງໜ້າ, ດ້ານອ່ອນຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້ ເພື່ອສືບຕໍ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກໃນຊຸມປີຕໍ່ໜ້າໃຫ້ດີຂຶ້ນເທື່ອລະກ້າວ ແລະ ປັບປຸງການກໍ່ສ້າງໃຫ້ເຕີບໃຫຍ່ເຂັ້ມແຂງ, ພັດທະນາສະມາຊິກຊາວໜຸ່ມພາຍໃນໃຫ້ມີຄວາມບຸກບືນ, ເອົາໃຈໃສ່ຕັ້ງໜ້າສ້າງຕົນເອງໃຫ້ມີຄຸນສົມບັດ, ຄວາມສາມາດ, ຫ້າວຫັນເຮັດວຽກງານພັດທະນາຕົນເອງໃຫ້ຫຼຸດພົ້ນອອກຈາກຄວາມທຸກຍາກເພື່ອແກ້ໄຂຊີວິດການເປັນຢູ່ໃຫ້ດີຂຶ້ນເທື່ອລະກ້າວ ໂດຍອີງໃສ່ການເຄື່ອນໄຫວ, ສົມທຽບໃສ່ມາດຖານການແຂ່ງຂັນ ສາມາດຈັດຕັ້ງປະເພດໜ່ວຍ 4 ບຸກ ໃນແຕ່ລະດ້ານຄື: ດ້ານແນວຄິດ, ດ້ານການຝຶກຝົນຫຼໍ່ຫຼອມຕົນເອງ, ດ້ານວຽກງານການຈັດຕັ້ງ, ດ້ານການສ້າງວິຊາຊີບ ແລະ ວຽກເຮັດງານທຳ. ລວມທັງໝົດໃນແຕ່ລະດ້ານ 95% ຈັດປະເພດເປັນໜ່ວຍ 4 ບຸກ ໃນພິທີຍັງໄດ້ມອບ-ຮັບໃບຢັ້ງຢືນ 4 ບຸກ ໂດຍການເປັນກຽດຂຶ້ນມອບຂອງ ທ່ານ ອຸດົມສັກ ດີວິໄຊ ກຳມະການພັກແຂວງ ເລຂາຄະນະບໍລິຫານງານຊາວໜຸ່ມ ປປລ ແຂວງຈຳປາສັກ, ຮັບໂດຍ ທ່ານ ສຸລິສັກ ວິລະບຸດ ເລຂາໜ່ວຍຊາວໜຸ່ມຮາກຖານ ພະແນກອຸດສາຫະກຳ ແລະ ການຄ້າ. (ພາບ-ຂ່າວ ສຸລິສັກ ແສງດວງຈັນ)