ເອັນທີພີ ຈະສະໜອງນ້ຳມັນໃຫ້ໂຄງການທາງລົດໄຟ


...

    ບໍລິສັດເອັນທີພີ ການຄ້າ ນ້ຳມັນເຊື້ອໄຟມະຫາຊົນ ຈະ ເປັນຜູ້ສະໜອງນ້ຳມັນເຊື້ອໄຟ ໃຫ້ແກ່ບໍລິສັດກໍ່ສ້າງທາງລົດ ໄຟເລກ 2 ສປ ຈີນ (CREC) ຊຶ່ງເປັນບໍລິສັດຮັບເໝົາກໍ່ສ້າງ ທາງລົດໄຟລາວ-ຈີນ ໄລຍະທີ 6 ແຕ່ໂພນໂຮງ ແຂວງວຽງຈັນ ຫານະຄອນຫຼວງວຽງຈັນ. ພິທີເຊັນສັນຍາສະໜອງ ນ້ຳມັນດັ່ງກ່າວ ໄດ້ຈັດຂຶ້ນໃນ ວັນທີ 12 ພຶດສະພານີ້ ທີ່ໂຮງ ແຮມດອນຈັນພາເລດ, ນະ ຄອນຫຼວງວຽງຈັນ ລະຫວ່າງ ທ່ານ ຈີນດາສັກ ຍົດໝັ້ນຄົງ ຜູ້ອຳນວຍການໃຫຍ່ບໍລິສັດ ເອັນທີພີ ການຄ້ານ້ຳມັນເຊື້ອ ໄຟ ມະຫາຊົນ ແລະ ທ່ານ ເຮີຮົງຊົງ ຜູ້ອຳນວຍການບໍລິ ສັດກໍ່ສ້າງທາງລົດໄຟເລກ 2 ສປ ຈີນ ໂດຍມີທ່ານ ບົວສອນ ບຸບຜາວັນ ຫົວໜ້າສະຖາບັນ ຄົ້ນຄວ້າເສດຖະກິດແຫ່ງຊາດ ທັງເປັນຮອງຫົວໜ້າທີມງານ ເສດຖະກິດຂອງລັດຖະບານ, ມີບັນດາທ່ານຮອງລັດຖະມົນ ຕີ ພ້ອມດ້ວຍແຂກຖືກເຊີນ ເຂົ້າຮ່ວມ. ທ່ານ ເຫຼື່ອມ ຍົງວົງສິດທິ ຜູ້ອຳນວຍການທີ 1 ບໍລິສັດ ເອັນທີພີ ການຄ້ານ້ຳມັນເຊື້ອ ໄຟມະຫາຊົນ ໄດ້ຂຶ້ນລາຍງານ ວ່າ: ບໍລິສັດໄດ້ສະໜອງນ້ຳ ມັນເຊື້ອໄຟໃຫ້ໂຄງການຕ່າງໆ ມາແລ້ວ 10 ກວ່າໂຄງການ ໃນຂອບເຂດທົ່ວປະເທດ ຊຶ່ງມີ ບໍລິມາດທັງໝົດ 200 ລ້ານ ລິດ, ຄຽງຄູ່ກັບການສະໜອງ ນ້ຳມັນແລ້ວນັ້ນ ບໍລິສັດ ຍັງ ສະໜອງແທ່ງ ພ້ອມຫົວຈ່າຍ ນ້ຳມັນໃຫ້ແຕ່ລະໂຄງການ ລວມເຖິງການຕອບສະໜອງ ນ້ຳມັນເຊື້ອໄຟໃຫ້ໂຄງການ ກໍ່ສ້າງທາງລົດໄຟລາວ-ຈີນ ໃນຄັ້ງນີ້ອີກດ້ວຍ. ຜູ້ອຳນວຍການທີ 1 ບໍລິ ສັດຍັງໄດ້ກ່າວອີກວ່າ: ຈຸດປະ ສົງຫຼັກຂອງການເຊັນສັນຍາ ສະໜອງນ້ຳມັນເຊື້ອໄຟໃຫ້ ໂຄງການກໍ່ສ້າງທາງລົດໄຟ ລາວ-ຈີນຄັ້ງນີ້ ແມ່ນໃຫ້ເຫັນ ວ່າ: ບໍລິສັດພວກເຮົາມີຄວາມ ເຂັ້ມແຂງ, ສາມາດດຳເນີນທຸ ລະກິດກັບທັງພາຍໃນ ແລະ ຕ່າງປະເທດ ຊຶ່ງການສະໜອງ ນ້ຳມັນເຊື້ອໄຟຄັ້ງນີ້ ບໍ່ແມ່ນ ເພື່ອຜົນປະໂຫຍດທາງທຸລະ ກິດຢ່າງດຽວ ແຕ່ບໍລິສັດຍັງມີ ສ່ວນຮ່ວມໃນການພັດທະນາ ເສັ້ນທາງຄົມມະນາຄົມ ແລະ ຂົນສົ່ງເວົ້າລວມ, ເວົ້າສະເພາະ ແມ່ນມີສ່ວນຮ່ວມໃນການພັດ ທະນາເສດຖະກິດ-ສັງຄົມຂອງ ປະເທດ. ຄວາມຕ້ອງການທາງ ດ້ານນ້ຳມັນເຊື້ອໄຟໃນຕະ ຫຼອດໄລຍະ 5 ປີຂອງໂຄງການ ກໍ່ສ້າງທາງລົດໄຟລາວ-ຈີນ ບໍ່ເຕັນ ຫາ ນະຄອນຫຼວງວຽງ ຈັນ ແມ່ນປະມານ 250 ລ້ານ ລິດ ຫຼື ສະເລ່ຍປີໜຶ່ງປະມານ 50 ລ້ານລິດ. ສຳລັບໄລຍະທີ 6 ແຕ່ໂພນ ໂຮງ ຫານະຄອນຫຼວງວຽງຈັນ ແມ່ນ 14.400.000 ລິດ ຫຼື ປີໜຶ່ງປະມານ 2.880.000 ລິດ. (ຂ່າວ: ແສງຈັນ)