ສານອວຍພອນ ສູນກາງພັກກອມມູນິດຫວຽດນາມ

06.02.2018 10:36     

    ຄະນະບໍລິຫານງານສູນກາງພັກປະຊາຊົນ ປະຕິວັດລາວ ໄດ້ສົ່ງສານອວຍພອນ ເຖິງຄະນະບໍລິຫານງານສູນກາງພັກ ກອມມູນິດຫວຽດນາມ ຊຶ່ງມີເນື້ອໃນດັ່ງນີ້: ເນື່ອງໃນໂອກາດ ຄົບຮອບ 88 ປີ ແຫ່ງວັນສ້າງຕັ້ງພັກກອມມູນິດ ຫວຽດນາມ (ວັນທີ 3/2/1930-3/2/2018), ໃນນາມຄະນະບໍລິຫານງານ ສູນກາງພັກປະຊາຊົນ ປະຕິວັດລາວ ແລະ ປະຊາຊົນລາວ ບັນດາເຜົ່າໃນທົ່ວປະເທດ, ພວກຂ້າພະເຈົ້າຂໍສົ່ງພອນໄຊອັນ ປະເສີດ ແລະ ໄມຕີຈິດມິດຕະພາບອັນສະໜິດສະໜົມ ຖານ ສະຫາຍອ້າຍນ້ອງ ມາຍັງຄະນະບໍລິຫານງານສູນກາງພັກກອມ ມູນິດຫວຽດນາມ ແລະ ປະຊາຊົນ ຫວຽດນາມ ອ້າຍນ້ອງທຸກ ຖ້ວນໜ້າ.
    ການກຳເນີດເກີດຂຶ້ນ ຂອງພັກກອມມູນິດຫວຽດນາມ ໂດຍປະທານ ໂຮ່ຈິມິນ ຜູ້ຍິ່ງໃຫຍ່ເປັນຜູ້ສ້າງຕັ້ງ ແລະ ເຝິກຝົນ ຫຼໍ່ຫຼອມນັ້ນ ແມ່ນບາດລ້ຽວປະຫວັດສາດ ທີ່ສຳຄັນຍິ່ງຂອງ ການປະຕິວັດຫວຽດນາມ. ນັບແຕ່ມື້ສ້າງຕັ້ງເປັນຕົ້ນມາ, ພັກ ກອມມູນິດຫວຽດນາມ ເປັນຜູ້ຈັດຕັ້ງ ແລະ ນຳພາທຸກໄຊຊະ ນະ ຂອງການປະຕິວັດຫວຽດນາມ, ນຳພາພາລະກິດຕໍ່ສູ້ກູ້ຊາດ ໄດ້ຮັບໄຊຊະນະສົມບູນ, ທ້ອນໂຮມປະເທດຊາດ ຫວຽດນາມ ສຳລັບໃນປີ 1975 ແລະ ສືບຕໍ່ດຳເນີນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມທິດສັງຄົມນິຍົມ ດ້ວຍຜົນສຳເລັດອັນສະຫງ່າງາມ, ໂດຍສະເພາະແມ່ນຜົນສຳເລັດຕະຫຼອດໄລຍະ 30 ກວ່າປີ ແຫ່ງການປະຕິບັດແນວທາງການປ່ຽນແປງໃໝ່ ອັນໄດ້ເຮັດໃຫ້ ປະເທດຊາດ ຫວຽດນາມ ມີສະຖຽນລະພາບໜັກແໜ້ນທາງ ດ້ານການເມືອງ, ສັງຄົມ ມີຄວາມເປັນລະບຽບຮຽບຮ້ອຍ, ເສດ ຖະກິດມີການພັດທະນາດ້ວຍຈັງຫວະໄວ, ໝັ້ນທ່ຽງ ແລະ ຕໍ່ ເນື່ອງ, ຊີວິດການເປັນຢູ່ທາງດ້ານວັດຖຸ ແລະ ຈິດໃຈ ຂອງປະ ຊາຊົນ ໄດ້ຮັບການຍົກສູງຂຶ້ນຢ່າງເດັ່ນຊັດ, ການປ້ອງກັນຊາດ, ປ້ອງກັນຄວາມສະຫງົບມີຄວາມໜັກແໜ້ນເຂັ້ມແຂງ, ການພົວ ພັນ ຕ່າງປະເທດໄດ້ຮັບການເປີດກວ້າງ ເຮັດໃຫ້ບົດບາດ ແລະ ອິດທິພົນຂອງ ສາທາລະນະລັດ ສັງຄົມນິຍົມ ຫວຽດນາມ ນັບມື້ ພົ້ນເດັ່ນໃນເວທີພາກພື້ນ ແລະ ສາກົນ.
    ພັກປະຊາຊົນ ປະຕິວັດລາວ ແລະ ປະຊາຊົນລາວບັນດາ ເຜົ່າ ຂໍສະແດງຄວາມຊົມເຊີຍຢ່າງສຸດອົກສຸດໃຈ ຕໍ່ຜົນສຳເລັດ ແລະ ໄຊຊະນະອັນໃຫຍ່ຫຼວງທີ່ ພັກກອມມູນິດຫວຽດນາມ ແລະ ປະຊາຊົນຫວຽດນາມ ອ້າຍນ້ອງຍາດມາໄດ້ຕະຫຼອດໄລຍະ 88 ປີທີ່ຜ່ານມາ ແລະ ຖືບັນດາໄຊຊະນະດັ່ງກ່າວ ເໝືອນ ດັ່ງຂອງຕົນເອງ ແລະ ທັງເປັນກຳລັງໃຈອັນແຮງກ້າໃຫ້ແກ່ ພວກຂ້າພະເຈົ້າ ໃນພາລະກິດປົກປັກຮັກສາ ແລະ ພັດທະນາ ປະເທດຊາດຂອງຕົນ. ພວກຂ້າພະເຈົ້າ ເຊື່ອໝັ້ນຢ່າງໜັກ ແໜ້ນວ່າ: ພາຍໃຕ້ການນຳພາອັນສະຫຼາດສ່ອງໃສ ຂອງພັກ ກອມມູນິດຫວຽດນາມ ອັນມີສະຫາຍ ເລຂາທິການໃຫຍ່ ຫງວຽນ ຟູຈ້ອງ ເປັນຜູ້ນຳໜ້ານັ້ນ, ປະຊາຊົນຫວຽດນາມ ອ້າຍນ້ອງ ຈະ ສືບຕໍ່ຍາດໄດ້ຜົນສຳເລັດໃໝ່ໃຫຍ່ຫຼວງກວ່າເກົ່າ ໃນການສ້າງ ສາພັດທະນາປະເທດຊາດ ຕາມແນວທາງປ່ຽນແປງໃໝ່, ຈັດ ຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ ກອມມູນິດຫວຽດນາມ ວາງອອກຢ່າງມີໄຊ, ສືບຕໍ່ຫັນ ສສ ຫວຽດ ນາມ ເປັນປະເທດອຸດສາຫະກຳຕາມທິດທັນສະໄໝ ແລະ ບັນລຸ ເປົ້າໝາຍເຮັດໃຫ້ປະຊາຊົນຮັ່ງມີຜາສຸກ, ປະເທດຊາດ ມັ່ງຄັ່ງເຂັ້ມແຂງ, ປະຊາທິປະໄຕ, ຍຸຕິທຳ ແລະ ສີວິໄລ.
    ພວກຂ້າພະເຈົ້າ ມີຄວາມເອກອ້າງທະນົງໃຈ ເປັນຢ່າງຍິ່ງ ທີ່ເຫັນວ່າຕະຫຼອດໄລຍະຜ່ານມາ, ສາຍພົວພັນມິດຕະພາບ ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ- ຫວຽດນາມ ນັບມື້ນັບໄດ້ຮັບການເພີ່ມພູນຄູນສ້າງ ແລະ ເພີ່ມ ທະວີທັງທາງກວ້າງ ແລະ ທາງເລິກໃນທຸກຂົງເຂດຢ່າງບໍ່ຢຸດ ຢັ້ງ, ນຳເອົາຜົນປະໂຫຍດຢ່າງແທ້ຈິງ ມາໃຫ້ແກ່ປະຊາຊົນ ສອງຊາດພວກເຮົາ, ພິເສດ ໃນປີ 2017 ຜ່ານມາ, ສອງປະເທດ ພວກເຮົາໄດ້ຈັດຕັ້ງປີສາມັກຄີມິດຕະພາບຢ່າງມີຜົນສຳເລັດ, ພັກ, ລັດ ແລະ ປະຊາຊົນລາວບັນດາເຜົ່າ ຈະເຮັດສຸດຄວາມ ສາມາດຂອງຕົນ ຮ່ວມກັບບັນດາສະຫາຍ ເພື່ອປົກປັກຮັກສາ ແລະ ເສີມຂະຫຍາຍສາຍພົວພັນດັ່ງກ່າວ ໃຫ້ຍືນຍົງຄົງຕົວ ຕະຫຼອດໄປໃຫ້ແກ່ຮຸ່ນລູກຫຼານຕໍ່ໄປ ເພື່ອຜົນປະໂຫຍດຂອງ ສອງປະເທດ ກໍຄືຜົນປະໂຫຍດ ແຫ່ງ ສັນຕິພາບ, ມິດຕະພາບ ແລະ ການຮ່ວມມືໃນພາກພື້ນ ແລະ ໃນໂລກ.
   ເນື່ອງໃນໂອກາດອັນສະຫງ່າລາສີນີ້, ພວກຂ້າພະເຈົ້າ ຂໍສະແດງຄວາມຮູ້ບຸນຄຸນຢ່າງເລິກເຊິ່ງ ແລະ ຄວາມຂອບອົກ ຂອບໃຈຢ່າງຈິງໃຈມາຍັງພັກ, ລັດ ແລະ ປະຊາຊົນຫວຽດນາມ ອ້າຍນ້ອງທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງລ້ຳຄ່າ ແລະ ມີ ປະສິດທິຜົນບົນຈິດໃຈ ສະຫາຍອ້າຍນ້ອງ ທີ່ບໍລິສຸດຜຸດຜ່ອງ ແກ່ພາລະກິດການປະຕິວັດລາວຕະຫຼອດມາ.
   ຂໍອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈົ່ງໝັ້ນຄົງຂະນົງແກ່ນ ແລະ ສວຍສົດງົດງາມຕະຫຼອດໄປ.