ລັດຖະມົນຕີກະຊວງການຕ່າງປະເທດ ເຂົ້າຮ່ວມກອງປະຊຸມກາງສະໄໝຂອງ ຂະບວນການບໍ່ຮ່ວມກຸ່ມ


...

10.04.2018 10:51     

   ທ່ານ ສະເຫຼີມໄຊ ກົມມະ ສິດ ລັດຖະມົນຕີກະຊວງການ ຕ່າງປະເທດ ໄດ້ນຳພາຄະນະ ຜູ້ແທນ ສປປ ລາວ ເຂົ້າຮ່ວມ ກອງປະຊຸມກາງສະໄໝລະດັບ ລັດຖະມົນຕີ ຄັ້ງທີ 18 ຂອງຂະ ບວນການບໍ່ຮ່ວມກຸ່ມ (NAM) ຈັດຂຶ້ນທີ່ເມືອງບາກູ ປະເທດ ອາແຊັກໄບຊານ ໃນລະຫວ່າງ ວັນທີ 5-6 ເມສາຜ່ານມາ ພາຍ ໃຕ້ຫົວຂໍ້ "ການສົ່ງເສີມສັນ ຕິພາບ ແລະ ຄວາມໝັ້ນຄົງ ສາກົນ ເພື່ອການພັດທະນາ ແບບຍືນຍົງ" ຊຶ່ງມີຄະນະຜູ້ ແທນຂັ້ນສູງຈາກ 175 ປະເທດ ເຂົ້າຮ່ວມ. ໃນການປະກອບຄຳເຫັນ ຂອງບັນດາຄະນະຜູ້ແທນສ່ວນ ໃຫຍ່ໄດ້ຍົກໃຫ້ເຫັນສະພາບ ການສາກົນ ແລະ ພາກພື້ນທີ່ ເຕັມໄປດ້ວຍສິ່ງທ້າທາຍຕໍ່ສັນ ຕິພາບ ແລະ ຄວາມໝັ້ນຄົງ ສາກົນ ພ້ອມທັງເປັນອຸປະສັກ ຕໍ່ການພັດທະນາ. ນອກຈາກ ນັ້ນຍັງໄດ້ຢ້ຳຄືນບັນດາຫຼັກ ການຕົ້ນຕໍ ແລະ ເປົ້າໝາຍຂອງ ຂະບວນການບໍ່ຮ່ວມກຸ່ມ ໂດຍ ສະເພາະຫຼັກການຢູ່ຮ່ວມກັນ ໂດຍສັນຕິ, ເຄົາລົບອຳນາດ ອະທິປະໄຕຂອງກັນ ແລະ ກັນ ແລະ ບໍ່ແຊກແຊງເຂົ້າໃນກິດ ຈະການພາຍໃນຂອງປະເທດ ອື່ນ. ກອງປະຊຸມໄດ້ຮັບຮອງ ເອົາເອກະສານ 3 ສະບັບຄື: ເອກະສານຜົນກອງປະຊຸມ, ຖະແຫຼງການບາກູ ແລະ ຖະ ແຫຼງການວ່າດ້ວຍບັນຫາປາ ແລັດສະຕິນ. ທ່ານລັດຖະມົນຕີກະຊວງ ການຕ່າງປະເທດ ສປປ ລາວ ໄດ້ກ່າວບົດປາໄສໃນກອງປະ ຊຸມ ໂດຍໄດ້ເນັ້ນຄວາມສຳຄັນ ຂອງສັນຕິພາບ ແລະ ຄວາມ ໝັ້ນຄົງສາກົນ ທີ່ເປັນພື້ນຖານ ສຳຄັນ ເພື່ອຮັບປະກັນການ ພັດທະນາແບບຍືນຍົງ ແລະ ຄວາມຜາສຸກຂອງປະຊາຊົນ ໃນທົ່ວໂລກ, ພ້ອມທັງຮຽກຮ້ອງ ໃຫ້ບັນດາປະເທດສະມາຊິກ ຂະບວນການບໍ່ຮ່ວມກຸ່ມ ຈົ່ງ ເພີ່ມທະວີຮັດແໜ້ນສາມັກຄີ ກັນ, ເຄົາລົບ ແລະ ປົກປ້ອງ ຫຼັກການຢູ່ຮ່ວມກັນ ໂດຍສັນຕິ ຂອງຂະບວນການບໍ່ຮ່ວມກຸ່ມ. ນອກຈາກນີ້, ທ່ານຍັງໄດ້ລາຍ ງານຄວາມຄືບໜ້າດ້ານການ ພັດທະນາຢູ່ ສປປ ລາວ, ໂດຍ ສະເພາະ ການຈັດຕັ້ງປະຕິບັດ ແຜນພັດທະນາເສດຖະກິດ- ສັງຄົມແຫ່ງຊາດ ກໍຄື ການຈັດ ຕັ້ງປະຕິບັດເປົ້າໝາຍການພັດ ທະນາແບບຍືນຍົງ. ລວມເຖິງ ແຈ້ງຜົນການປະເມີນຄັ້ງທຳ ອິດຂອງອົງການ ສປຊ ກ່ຽວ ກັບການບັນລຸຕາມເງື່ອນໄຂທີ່ ຈະສາມາດຫຼຸຸດພົ້ນອອກຈາກ ສະຖານະພາບປະເທດດ້ອຍ ພັດທະນາຂອງ ສປປ ລາວ. ໃນໂອກາດເຂົ້າຮ່ວມກອງ ປະຊຸມຄັ້ງນີ້, ທ່ານ ສະເຫຼີມໄຊ ກົມມະສິດ ຍັງໄດ້ພົບປະສອງ ຝ່າຍກັບຄູ່ຮ່ວມຕຳແໜ່ງ ຈາກ ບັນດາປະເທດສະມາຊິກ ແລະ ປະເທດສັງເກດການຂະບວນ ການບໍ່ຮ່ວມກຸ່ມຈຳນວນໜຶ່ງ ເຊັ່ນ: ພົບປະກັບຮອງນາຍົກ ລັດຖະມົນຕີ ແລະ ລັດຖະມົນ ຕີການຕ່າງປະເທດແຊັກບີ, ລັດຖະມົນຕີການຕ່າງປະເທດ ເອກົວດໍ, ລັດຖະມົນຕີການ ຕ່າງປະເທດເວເນຊູເອລາ, ລັດຖະມົນຕີການຕ່າງປະເທດ ຕວກກີ ແລະ ທີ່ປຶກສຳຮອງປະ ທານາທິບໍດີອາແຊັກໄບຊານ ເພື່ອປຶກສາຫາລືໃນການສົ່ງ ເສີມການຮ່ວມມືນຳກັນໃນຂອບ ສອງຝ່າຍ ແລະ ຫຼາຍຝ່າຍ. ຂະບວນການບໍ່ຮ່ວມກຸ່ມ (Non-AlignedMovement -NAM) ໄດ້ຮັບການສ້າງຕັ້ງ ຂຶ້ນພາຍຫຼັງສົງຄາມໂລກ ຄັ້ງ ທີ II ໂດຍບັນດາປະເທດກຳລັງ ພັດທະນາ ແລະ ດ້ອຍພັດທະ ນາ ເພື່ອປ້ອງກັນການຖືກນາບ ຂູ່, ຖືກກົດດັນ ແລະ ບີບບັງ ຄັບຂອງປະເທດມະຫາອຳ ນາດ ຊຶ່ງກອງປະຊຸມຄັ້ງທຳອິດ ຂອງຂະບວນການບໍ່ຮ່ວມກຸ່ມ ແມ່ນຈັດຂຶ້ນໃນປີ 1961 ທີ່ ແບນກຣາດ ອະດີດຢູໂກສະ ລາວີ. ຂະບວນການບໍ່ຮ່ວມກຸ່ມ ຖືກສ້າງຂຶ້ນເພື່ອເດີນຕາມແນວ ທາງທີ່ເປັນກາງບໍ່ເຂົ້າຂ້າງຝ່າຍ ໃດໃນເວທີການເມືອງສາກົນ ພ້ອມທັງຢຶດໝັ້ນຫຼັກການຢູ່ ຮ່ວມກັນໂດຍສັນຕິເພື່ອສົ່ງ ເສີມສັນຕິພາບ ແລະ ການ ຮ່ວມມືສາກົນ.