ເລຂາທິການໃຫຍ່ອວຍພອນໃຫ້ປະຊາຊົນລາວຈົົ່ງສະຫຼອງປີໃໝ່ ດ້ວຍຄວາມເບີກບານມ່ວນຊື່ນ


...

13.04.2018 9:18     

       ເນື່ອງໃນໂອກາດສົ່ງທ້າຍປີເກົ່າ ປີລະກາ ພສ 2560 ແລະ ຕ້ອນຮັບປີໃໝ່ ປີຈໍ ພສ 2561, ທ່ານ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໄດ້ສົ່ງ ຄຳອວຍພອນເຖິງປະຊາຊົນລາວທຸກຖ້ວນໜ້າ ຈົ່ງສະເຫຼີມສະ ຫຼອງປີໃໝ່ດ້ວຍຄວາມເບີກບານມ່ວນຊື່ນ.
   ໃນບົດອວຍພອນຂອງ ທ່ານ ບຸນຍັງ ວໍລະຈິດ ລະບຸວ່າ:
   ພີ່ນ້ອງຮ່ວມຊາດ ແລະ ຄົນເຊື້ອຊາດລາວທຸກທ່ານ ທີ່ ຮັກແພງທັງຫຼາຍ!.
   ມື້ນີ້ ໃນບັນຍາກາດອັນຄຶກຄື້ນ ແຫ່ງການສົ່ງທ້າຍປີເກົ່າ ປີລະກາ ພສ 2560 ແລະ ຕ້ອນຮັບປີໃໝ່ ປີຈໍ ພສ 2561 ຊຶ່ງ ເປັນປາງບຸນໜຶ່ງໃນຮີດ 12 ທີ່ໄດ້ປະຕິບັດສືບທອດມາຢ່າງ ຍາວນານ ຈາກບັນພະບຸລຸດຂອງພວກເຮົາ, ຂ້າພະເຈົ້າ ຂໍຖື ໂອກາດອັນເປັນສີລິມຸງຄຸນຍິ່ງນີ້ ສົ່ງຄຳອວຍພອນອັນປະເສີດ ໄປຍັງພີ່ນ້ອງຮ່ວມຊາດ ແລະ ຄົນເຊື້ອຊາດລາວ ທັງຢູ່ພາຍໃນ ແລະ ຢູ່ຕ່າງປະເທດ ພ້ອມທັງຊາວຕ່າງປະເທດທີ່ດຳລົງຊີວິດ, ປະຕິບັດໜ້າທີ່ ແລະ ທຳມາຫາກິນຢູ່ ສປປ ລາວ, ຂໍໃຫ້ທຸກໆ ທ່ານຈົ່ງມີສຸຂະພາບ, ພະລານາໄມສົມບູນ, ສຸກກາຍ ສຸກໃຈ, ຮ່ວມສະຫຼອງປີໃໝ່ຕາມປະເພນີລາວຢ່າງເບີກບານມ່ວນຊື່ນ ແລະ ມີຜົນສຳເລັດ ໃນການປະຕິບັດໜ້າທີ່ຂອງຕົນຕະຫຼອດ ປີໃໝ່ນີ້ດ້ວຍເຖີ້ນ!
   ໃນປີເກົ່າ ພສ 2560 ທີ່ພວມກ້າວລ່ວງໄປ ເປັນປີແຫ່ງ ຄວາມພະຍາຍາມບຸກບືນຂອງທົ່ວພັກ, ທົ່ວລັດ ແລະ ທົ່ວປວງ ຊົນລາວທັງຊາດ ໃນການຈັດຕັ້ງປະຕິບັດມະຕິກອງປະຊຸມ ໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ- ສັງຄົມ ແຫ່ງລັດ ຄັ້ງທີ 8 ຢ່າງເປັນຂະບວນອັນຟົດຟື້ນ, ສາ ມາດສ້າງຜົນງານອັນໃຫຍ່ຫຼວງຫຼາຍດ້ານປະຊາຊົນເຮົາ ມີຄວາມສາມັກຄີປອງດອງເປັນປຶກແຜ່ນ, ປະເທດຊາດຂອງ ພວກເຮົາສືບຕໍ່ມີສະຖຽນລະພາບທາງດ້ານການເມືອງອັນໜັກ ແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບ ຮຽບຮ້ອຍໂດຍພື້ນຖານ. ປະຊາຊົນເຮົາໄດ້ເຊີດຊູນ້ຳໃຈຮັກຊາດ ແລະ ເສີມຂະຫຍາຍມູນເຊື້ອດຸໝັ່ນ ອອກແຮງງານທຳມາຫາ ກິນ, ປັບປຸງຊີວິດການເປັນຢູ່ໃຫ້ດີຂຶ້ນ, ເກີດມີຄອບຄົວຕົວແບບ ພົ້ນທຸກນັບມື້ນັບຫຼາຍ, ພ້ອມກັນນັ້ນ ດ້ວຍຄວາມພະຍາຍາມ ອັນຕັ້ງໜ້າຂອງທຸກພາກສ່ວນໄດ້ສ້າງເງື່ອນໄຂ ແລະ ສະພາບ ແວດລ້ອມເອື້ອອຳນວຍ ເພື່ອດຶງດູດການລົງທຶນ, ເຮັດໃຫ້ອັດຕາ ການລົງທຶນທັງພາຍໃນ ແລະ ຕ່າງປະເທດ ເພີ່ມຂຶ້ນຢ່າງຕໍ່ ເນື່ອງ, ຈັງຫວະການຂະຫຍາຍຕົວຂອງເສດຖະກິດ ໃນປີ ພສ 2560 ບັນລຸ 6,83%, ລວມຍອດຜະລິດຕະພັນພາຍໃນ ສະເລ່ຍຕໍ່ຫົວຄົນໄດ້ 2.472 ໂດລາ, ຂົງເຂດການສຶກສາ, ວັດທະນະທຳ - ສັງຄົມ ກໍໄດ້ຮັບການເອົາໃຈໃສ່, ຊີວິດການ ເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ ກໍໄດ້ຮັບ ການປັບປຸງແກ້ໄຂໃຫ້ດີຂຶ້ນຢ່າງບໍ່ຢຸດຢັ້ງ, ການພົວພັນຮ່ວມມື ລະຫວ່າງປະເທດເຮົາກັບບັນດາປະເທດເພື່ອນມິດ ແລະ ອົງ ການຈັດຕັ້ງສາກົນ ສືບຕໍ່ໄດ້ຮັບການເສີມຂະຫຍາຍຢ່າງມີ ປະສິດທິຜົນ. ໃນນັ້ນ, ສປປ ລາວພວກເຮົາ ໄດ້ຮ່ວມກັບບັນດາ ປະເທດສະມາຊິກອາຊຽນສະເຫຼີມສະຫຼອງ ຄົບຮອບ 50 ປີ ແຫ່ງການສ້າງຕັ້ງສະມາຄົມບັນດາປະຊາຊາດ ອາຊີຕາເວັນ ອອກສ່ຽງໃຕ້ ຫຼື ອາຊຽນ ແລະ ຄົບຮອບ 20 ປີ ທີ່ ສປປ ລາວ ເຂົ້າເປັນສະມາຊິກອາຊຽນ. ເຫດການທີ່ພົ້ນເດັ່ນ ໃນປີນີ້ແມ່ນ ລັດຖະບານລາວເຮົາ ໄດ້ຈັດປີທ່ອງທ່ຽວລາວ ປີ 2018 ຂຶ້ນໃນ ຂອບເຂດທົ່ວປະເທດ ເພື່ອເປັນການໂຄສະນາດຶງດູດນັກທ່ອງ ທ່ຽວທັງພາຍໃນ ແລະ ຕ່າງປະເທດ ໄດ້ເຂົ້າມາສຳພັດຕົວຈິງ ກັບແຫຼ່ງທ່ອງທ່ຽວປະຫວັດສາດ, ທິວທັດທຳມະຊາດ ແລະ ຮີດ ຄອງປະເພນີ - ວັດທະນະທຳອັນດີງາມຂອງຊາດລາວເຮົາ ໃຫ້ ຫຼາຍຂຶ້ນກວ່າເກົ່າ ເພື່ອເປັນການກະຕຸ້ນການພັດທະນາເສດ ຖະກິດ-ສັງຄົມຕື່ມອີກ.
    ນະໂອກາດນີ້, ຂ້າພະເຈົ້າ ຂໍຕາງໜ້າການນຳພັກ-ລັດ ສະແດງຄວາມຊົມເຊີຍ ສັນລະເສີນ ຄວາມຂອບໃຈຢ່າງຈິງໃຈ ມາຍັງສະມາຊິກພັກ, ພະນັກງານ, ທະຫານ, ຕຳຫຼວດ ແລະ ພີ່ ນ້ອງຮ່ວມຊາດທຸກເຜົ່າ-ທຸກຊັ້ນຄົນ ໃນຂອບເຂດທົ່ວປະເທດ, ພີ່ນ້ອງເຊື້ອຊາດລາວ ທີ່ຢູ່ຕ່າງປະເທດ ທີ່ໄດ້ປະກອບສ່ວນເຂົ້າ ໃນພາລະກິດລວມຂອງຊາດ ດ້ວຍຄວາມເປັນເຈົ້າການ ຫ້າວ ຫັນຕະຫຼອດປີຜ່ານມາ.
   ພີ່ນ້ອງຮ່ວມຊາດ ແລະ ເຊື້ອຊາດລາວ ທີ່ຮັກແພງທັງຫຼາຍ.
   ປີຈໍ ພສ 2561 ທີ່ພວມກ້າວເຂົ້າມາ ເປັນປີທີ່ມີຄວາມໝາຍ ສຳຄັນສຳລັບ ສປປ ລາວເຮົາ ຊຶ່ງເປັນປີທີສາມແຫ່ງການຈັດຕັ້ງ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງລັດ 5 ປີ ຄັ້ງທີ 8, ຊຶ່ງພວກເຮົາຈະໄດ້ພ້ອມກັນສຸມໃສ່ການແກ້ໄຂຄວາມທຸກ ຍາກຂອງປະຊາຊົນ ແລະ ຈັດຕັ້ງປະຕິບັດເປົ້າໝາຍ "ສູ້ຊົນ ພັດທະນາປະເທດເຮົາ ໃຫ້ຫຼຸຸດພົ້ນອອກຈາກສະຖານະພາບ ຄວາມດ້ອຍພັດທະນາ ໃນປີ 2020 ກ້າວໄປສູ່ປະເທດກຳລັງ ພັດທະນາ ທີ່ມີລາຍຮັບປານກາງສູງ ຕາມທິດພັດທະນາສີຂຽວ ແລະ ຍືນຍົງ ເມື່ອເຖິງປີ 2030". ຂ້າພະເຈົ້າ ຈຶ່ງຂໍຖືໂອກາດນີ້ ຮຽກຮ້ອງພີ່ນ້ອງຮ່ວມຊາດ ສະມາຊິກພັກ, ພະນັກງານ, ທະຫານ, ຕຳຫຼວດ ຈົ່ງພ້ອມກັນ ເພີ່ມທະວີຮັກສາມູນເຊື້ອຄວາມສາມັກຄີອັນເປັນປຶກແຜ່ນ ແໜ້ນໜາ, ຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍທົດ ສອບ, ສືບຕໍ່ເສີມຂະຫຍາຍຜົນສຳເລັດອັນດີງາມ ແລະ ຕັ້ງໜ້າ ແກ້ໄຂຈຸດອ່ອນ ຂໍ້ຄົງຄ້າງ ໃນປີທີ່ຜ່ານມາໃຫ້ຫຼຸຸດໜ້ອຍຖອຍ ລົງ, ພີ່ນ້ອງເຊື້ອຊາດລາວ ຢູ່ຕ່າງປະເທດ ຈົ່ງອວ່າຍໜ້າກັບມາ ຫາປະເທດຊາດບ້ານເກີດຂອງເຊື້ອເຜົ່າພົງພັນພວກເຮົາ ຮ່ວມກັບປະຊາຊົນໃນຊາດ, ເພື່ອຮ່ວມກັນເຮັດໃຫ້ປະເທດ ຊາດທີ່ແສນຮັກຂອງພວກເຮົາ ມັ່ງຄັ່ງເຂັ້ມແຂງ, ປະຊາຊົນ ຮັ່ງ ມີຜາສຸກ, ສັງຄົມມີຄວາມສາມັກຄີປອງດອງ, ມີປະຊາທິປະໄຕ ຍຸຕິທຳ ແລະ ສີວິໄລ ຍິ່ງໆຂຶ້ນໄປ.
   ຂໍໃຫ້ທຸກທ່ານ ຈົ່ງປະກອບສ່ວນເຮັດໃຫ້ປີຈໍ ພສ 2561 ເປັນປີແຫ່ງຄວາມສາມັກຄີອັນຍິ່ງໃຫຍ່, ເປັນປີແຫ່ງການເຊີດ ຊູມານະຈິດ ແລະ ການອຸທິດຕົນ ເພື່ອຄວາມຢູ່ດີກິນດີຂອງປະ ຊາຊົນ ແລະ ຄວາມມັ່ງຄັ່ງເຂັ້ມແຂງຂອງປະເທດຊາດ.
   ໃນປີຈໍ ພສ 2561 ນີ້, ຂໍໃຫ້ທຸກໆທ່ານ ຈົ່ງມີໂຊກໃໝ່ໄຊ ງາມ, ໃຫ້ເປັນປີແຫ່ງຄວາມສຸກຄວາມສົມຫວັງ ທຸກປະການເຖີ້ນ.
ສະບາຍດີປີໃໝ່
ຂໍຂອບໃຈ