ຮອງນາຍົກ ແລະ ລມຕ ກະຊວງ ຖວທ ຕ້ອນຮັບຄະນະ ຜູ້ແທນ ສປ ຈີນ


...

16.05.2018 9:30     

   ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບ ທ່ານ ຕູ້ ຈ່ຽງ (Mr Du Jiang) ຮອງລັດຖະມົນຕີກະຊວງວັດທະນະທຳ ແລະ ທ່ອງທ່ຽວ ແຫ່ງ ສປ ຈີນ ພ້ອມຄະນະ ໃນວັນທີ 15 ພຶດສະພານີ້, ທີ່ສຳນັກງານນາຍົກລັດຖະມົນຕີ ນະຄອນຫຼວງວຽງຈັນ, ໃນໂອກາດທີ່ ທ່ານພ້ອມຄະນະ ໄດ້ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ. ໃນໂອກາດດັ່ງກ່າວນີ້ ທ່ານຮອງນາຍົກລັດຖະມົນຕີ ກໍໄດ້ສະແດງຄວາມຕ້ອນຮັບອັນອົບອຸ່ນ ແລະ ສະໜິດສະໜົມຕໍ່ທ່ານ ຕູ້ ຈ່ຽງ ພ້ອມດ້ວຍຄະນະ ທີ່ໄດ້ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກໍຄືການເສີມຂະຫຍາຍສາຍ ພົວພັນຮ່ວມມືລະຫວ່າງສອງລັດຖະບານເວົ້າລວມ, ເວົ້າສະເພາະກໍຄືການພົວພັນ ຮ່ວມມືລະຫວ່າງກະຊວງຖະ ແຫຼງຂ່າວ, ວັດທະນະທຳ ແລະ ທ່ອງທ່ຽວ ສປປ ລາວ ກັບກະ ຊວງວັດທະນະທຳ ແລະ ທ່ອງ ທ່ຽວ ສປ ຈີນ ໃຫ້ນັບມື້ ນັບ ແຕກດອກອອກຜົນ ແລະ ກ້າວ ເຂົ້າສູ່ລວງເລິກຍິ່ງໆຂຶ້ນ. ໃນວັນດຽວກັນ ທ່ານ ບໍ່ແສງຄຳ ວົງດາລາ ລັດຖະ ມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ກໍໄດ້ຕ້ອນຮັບ ທ່ານ ຕູ້ ຈ່ຽງ (Mr Du Jiang) ຮອງລັດ ຖະມົນຕີກະຊວງວັດທະນະທຳ ແລະ ທ່ອງທ່ຽວ ແຫ່ງ ສປ ຈີນ ພ້ອມດ້ວຍຄະນະ. ໃນໂອກາດດັ່ງກ່າວ ທ່ານ ລັດຖະມົນຕີກະຊວງ ຖວທ ກໍ ໄດ້ຕີລາຄາສູງ ແລະ ສະແດງ ຄວາມຍ້ອງຍໍຊົມເຊີຍຍິນດີ ຕ້ອນຮັບ ທ່ານ ຕູ້ ຈ່ຽງ (Mr Du Jiang) ພ້ອມຄະນະ ຊຶ່ງໄດ້ ເດີນທາງມາຢ້ຽມຢາມ ແລະ ເຂົ້າ ຮ່ວມກອງປະຊຸມເວທີສາກົນ ການຮ່ວມມືດ້ານການທ່ອງທ່ຽວ ລະຫວ່າງ ສປປ ລາວ - ສປ ຈີນ ທີ່ ນະຄອນຫຼວງວຽງຈັນ ໃນຄັ້ງນີ້ ຊຶ່ງເປັນນິມິດໝາຍສຳຄັນເຂົ້າ ໃນການປະກອບສ່ວນເສີມສ້າງ ສາຍພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງ ສອງພັກ-ລັດ ແລະ ປະຊາຊົນ ສອງຊາດ ລາວ-ຈີນ ທີ່ມີມາ ແລ້ວນັ້ນ ໃຫ້ນັບມື້ເຕີບໃຫຍ່ ຂະຫຍາຍຕົວຍິ່ງໆຂຶ້ນ. (ຂ່າວ: ສຸກສາຄອນ+ ຍຸພິນທອງ)