ຈະປ່ອຍປາສູ່ແຫຼ່ງນ້ຳທຳມະຊາດ 45 ລ້ານໂຕ


...

12.07.2018 9:41     

   ເນື່ອງໃນໂອກາດວັນ ປ່ອຍປາ ແລະ ອະນຸລັກສັດ ນ້ຳ-ສັດປ່າແຫ່ງຊາດ ທີ່ຈະ ໝູນວຽນມາບັນຈົບຄົບຮອບ ວັນທີ 13 ກໍລະກົດ ເພື່ອປູກ ຈິດສຳນຶກໃຫ້ແກ່ເຍົາວະຊົນ ແລະ ອະນຸຊົນຄົນຮຸ່ນຫຼັງ ກໍຄື ທົ່ວສັງຄົມເຫັນໄດ້ຄວາມສຳ ຄັນຂອງສັດນ້ຳ-ສັດປ່າ, ປີ 2018 ນີ້ ກະຊວງກະສິກຳ ແລະ ປ່າໄມ້ ໄດ້ຕັ້ງເປົ້າຈະປ່ອຍປາສູ່ແຫຼ່ງນ້ຳທຳມະຊາດ ໃຫ້ໄດ້ 45 ລ້ານໂຕ ໃນຂອບເຂດທົ່ວປະເທດ. ທ່ານ ລຽນ ທີແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ຖະແຫຼງຂ່າວຕໍ່ສື່ມວນຊົນ ເມື່ອວັນທີ 11 ກໍລະ ກົດຜ່ານມາ ທີ່ກະຊວງກະສິກຳ ແລະ ປ່າໄມ້ວ່າ: ຍ້ອນເຫັນ ໄດ້ຄວາມສຳຄັນຂອງສັດ ນ້ຳ-ສັດປ່າ, ພັກ-ລັດຖະບານ ຈຶ່ງໄດ້ ກຳນົດເອົາວັນທີ 13 ກໍລະກົດຂອງທຸກໆປີ ເປັນວັນປ່ອຍປາ ແລະ ອະນຸລັກສັດນ້ຳ-ສັດປ່າແຫ່ງຊາດ, ວັນດັ່ງກ່າວກົງກັບ ວັນເກີດຂອງປະທານ ສຸພານຸວົງ, ປະການໜຶ່ງ; ເພື່ອຈົດຈຳລ້ຳ ລຶກຄຸນງາມ, ຄວາມດີ ແລະ ຜົນງານອັນໃຫຍ່ຫຼວງຂອງ ປະທານ ສຸພານຸວົງ ທີ່ໄດ້ອຸ ທິດ ໃຫ້ແກ່ພາລະກິດແຫ່ງການ ຕໍ່ສູ້ກູ້ຊາດກໍຄືການປົກປັກຮັກ ສາ ແລະ ສ້າງສາພັດທະນາ ປະເທດຊາດ ຂອງພວກເຮົາ; ປະການທີສອງ; ເປັນການປູກ ຈິດສຳນຶກໃຫ້ແກ່ອະນຸຊົນ, ເຍົາວະຊົນຂອງຊາດກໍຄືລູກ ຫຼານຜູ້ເກີດໃໝ່ໃຫຍ່ລຸນໃຫ້ມີ ສະຕິຮັກ ແລະ ຫວງແຫນສັດ ນ້ຳ-ສັດປາ ທັງເປັນການປຸກ ລະດົມທົ່ວປວງຊົນເຂົ້າຮ່ວມ ໃນການຄຸ້ມຄອງ, ປົກປັກຮັກ ສາ, ພັດທະນາ ແລະ ນຳໃຊ້ ສັດນ້ຳ-ສັດປ່າ ແນໃສ່ເຮັດໃຫ້ ປະຊາກອນສັດນັບມື້ນັບມີ ຄວາມອຸດົມສົມບູນ ແລະ ກາຍ ເປັນທ່າແຮງ ໃນການຄ້ຳປະ ກັນດ້ານສະບຽງອາຫານ, ໂພ ຊະນາການກໍຄືການປັບປຸງຊີ ວິດການເປັນຢູ່ຂອງປະຊາຊົນ ໃຫ້ນັບມື້ນັບດີຂຶ້ນ; ປະການທີ ສາມ; ເປັນການສືບສານຮີດ ຄອງປະເພນີ ໃນໄລຍະເຂົ້າ ພັນສາປະວໍລະນາ ບໍ່ໃຫ້ຂ້າ ສັດ ຕັດຊີວິດ ໃຫ້ມີຄວາມໝາຍ ຍິ່ງໆຂຶ້ນ. ໄລຍະຜ່ານມາ, ລັດຖະ ບານ ໄດ້ມີແນວທາງນະໂຍ ບາຍທີ່ເໝາະສົມ ໃນການຄຸ້ມ ຄອງຊັບພະຍາກອນທຳມະ ຊາດ ແລະ ປົກປັກຮັກສາສັດ ນ້ຳ-ສັດປ່າໄດ້ຜັນຂະຫຍາຍ ອອກເປັນກົດໝາຍ ວ່າດ້ວຍ ການອະນຸລັກສັດນ້ຳ-ສັດປ່າ, ກົດໝາຍ ວ່າດ້ວຍການປະມົງ ເພື່ອສົ່ງເສີມໃຫ້ມີການລ້ຽງ, ການອະນຸລັກ, ການປົກປັກ ຮັກສາ, ພັດທະນາ ແລະ ຂະ ຫຍາຍພັນ, ຫຼຸຸດຜ່ອນການທຳ ລາຍສັດນ້ຳ-ສັດປ່າ. ມາຮອດ ປັດຈຸບັນ ທົ່ວປະເທດມີສູນ, ສະຖານີຜະລິດລູກປາຂອງລັດ ຈຳນວນ 32 ແຫ່ງ ແລະ ຟາມ ຜະລິດລູກປາຂອງເອກະຊົນ ຫຼາຍກ່ວາ 50 ແຫ່ງ, ສາມາດ ຕອບສະໜອງແນວພັນປາໃຫ້ ແກ່ສັງຄົມໄດ້ ໂດຍພື້ນຖານ; ບັນດາສູນດັ່ງກ່າວໄດ້ຄົ້ນຄວ້າ ທົດລອງລ້ຽງ ແລະ ຂະຫຍາຍ ພັນປາພື້ນເມືອງໄດ້ແລ້ວ 18 ຊະນິດຄື: ປາຊວຍໝາກໄມ້, ປາເຄິງ, ປາກົດເຫຼືອງ, ປາ ຊວຍຫາງເຫຼືອງ, ປາແກງ, ປາເພ້ຍ, ປາພອນ, ປາເອິນ, ປາສະກາງ, ປາຕອງ, ປາສະ ລິດ, ປາປາກ, ປາບູ່, ປາເຂັງ, ປາສ້ອຍ ແລະ ປາດຸກລາດ. ເພື່ອສ້າງຂະບວນການ ພ້ອມທັງເປັນການປູກຈິດສຳ ນຶກໃຫ້ທົ່ວປວງຊົນ ເນື່ອງໃນ ໂອກາດວັນປ່ອຍປາ ແລະ ອະ ນຸລັກສັດນ້ຳ-ສັດປ່າແຫ່ງຊາດ ປີນີ້, ກະຊວງກະສິກຳ ແລະ ປ່າໄມ້ ໄດ້ສົມທົບກັບຄະນະ ພັກ, ອົງການປົກຄອງທ້ອງຖິ່ນ ທົ່ວປະເທດ ກະກຽມແຜນການ ແລະ ຂະບວນປ່ອຍປາໃຫ້ເປັນ ຂະບວນຟົດຟື້ນ ຊຶ່ງຈະປ່ອຍ ປາຈຳນວນທັງໝົດ 45 ລ້ານ ໂຕ ລົງໃສ່ແຫຼ່ງນ້ຳທຳມະຊາດ ເຊັ່ນ: ແມ່ນ້ຳຂອງ, ແມ່ນ້ຳສາ ຂາ, ອ່າງເກັບນ້ຳເຂື່ອນໄຟຟ້າ, ອ່າງເກັບນ້ຳຊົນລະປະທານ, ໜອງ ແລະ ບຶງທຳມະຊາດ, ໜອງປາຊຸມຊົນ ແລະ ດິນບໍລິ ເວນນ້ຳປະເພດຕ່າງໆ. ສຳລັບ ຢູ່ນະຄອນຫຼວງວຽງຈັນຈະຈັດ ຕັ້ງການປ່ອຍປາດັ່ງນີ້: ວັນທີ 13/7/2018 ກະຊວງກະສິກຳ ແລະ ປ່າໄມ້ ຮ່ວມກັບ ນະຄອນ ຫຼວງ ຈັດພິທີປ່ອຍປາທີ່ອ່າງນ້ຳ ຫຸມ ເມືອງນາຊາຍທອງ ນະ ຄອນຫຼວງວຽງຈັນ. ທ່ານ ລຽນ ທີແກ້ວ ໄດ້ ຮຽກຮ້ອງມາຍັງພາກສ່ວນ ຕ່າງໆ ທັງພາກລັດ - ເອກະຊົນ ໃນທົ່ວສັງຄົມ ຈົ່ງພ້ອມກັນຮ່ວມ ແຮງຮ່ວມໃຈ ຄຸ້ມຄອງ, ປົກປັກ ຮັກສາ, ພັດທະນາ ສັດນ້ຳ-ສັດ ປ່າໃຫ້ຫຼາຍຂຶ້ນ ແນໃສ່ເພີ່ມ ຄວາມອຸດົມສົມບູນທາງດ້ານຊີ ວະນາໆພັນ ແລະ ຈຳນວນປະ ຊາກອນຂອງສັດນ້ຳ-ສັດປ່າທີ່ ເປັນມໍລະດົກທາງທຳມະຊາດ ອັນລ້ຳຄ່າໃຫ້ໄດ້ຮັບການປົກ ປັກຮັກສາ, ຊົມໃຊ້ແບບຍືນ ນານ ແລະ ເປັນມໍລະດົກຕົກ ທອດຮອດເຊັ່ນລູກເຊັ່ນຫຼານ ຕະຫຼອດໄປ. (ຂ່າວ: ນ. ແສງຈັນ)