ສານສະແດງຄວາມເຫັນໃຈຈາກຜູ້ນຳເຮົາເຖິງຜູ້ນຳຫວຽດນາມ


26.07.2018 13:25     

   ສະຫາຍ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ແລະ ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງສານສະແດງຄວາມເຫັນໃຈເຖິງ ສະ ຫາຍ ເຈິ່ນ ດ໋າຍ ກວາງ ປະທານປະເທດ ແຫ່ງ ສສ ຫວຽດ ນາມ ແລະ ສະຫາຍ ຫງວຽນ ຊວັນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ເມື່ອວັນທີ 24 ກໍລະກົດນີ້ ທີ່ນະຄອນ ຫຼວງຮ່າໂນ້ຍ ຊຶ່ງມີເນື້ອໃນດັ່ງນີ້: ພວກຂ້າພະເຈົ້າ ໄດ້ຮັບຂ່າວດ້ວຍຄວາມເສົ້າສະຫຼົດໃຈ ແລະ ເປັນຫ່ວງເປັນໄຍ ຕໍ່ກັບເຫດການຜົນກະທົບຈາກພາຍຸເລກ 3 ທີ່ພັດເຂົ້າພາກກາງ ແລະ ພາກ ເໜືອຂອງຫວຽດນາມ ເຮັດໃຫ້ເກີດມີຝົນຕົກໜັກ, ນ້ຳຖ້ວມ ແລະ ດິນເຊາະເຈື່ອນ ຢູ່ບັນດາແຂວງເຫງະອານ, ຮວ່າບິງ, ກວາງນິ່ງ, ແທ່ງຮວາ, ເຊິນລາ, ຝູ້ເຖາະ, ອຽນບ່າຍ, ຫາຍ ຟອງ, ຮາຍເຢື່ອງ, ຮ່ານາມ, ນາມດິງ, ຖ້າຍບິງ, ຮ່າຕິ່ງ ຊຶ່ງ ໄດ້ສ້າງຄວາມເສຍຫາຍ ຢ່າງໜັກໜ່ວງເຖິງຊີວິດ ແລະ ຊັບສິນ ຂອງປະຊາຊົນຫວຽດນາມອ້າຍນ້ອງ ກໍຄືພື້ນຖານໂຄງລ່າງ ຂອງບັນດາແຂວງ ທີ່ໄດ້ຖືກຜົນກະທົບໃນຄັ້ງນີ້. ໃນນາມພັກ, ລັດຖະບານ ແລະ ປະຊາຊົນລາວ, ພວກ ຂ້າພະເຈົ້າ ຂໍສົ່ງຄວາມເຫັນອົກເຫັນໃຈ ແລະ ເສົ້າສະຫຼົດໃຈ ຢ່າງຈິງໃຈ ມາຍັງບັນດາສະຫາຍ ແລະ ໂດຍຜ່ານບັນດາສະ ຫາຍໄປຍັງພັກ, ລັດຖະບານ ແລະ ປະຊາຊົນຫວຽດນາມອ້າຍ ນ້ອງ ໂດຍສະເພາະແມ່ນອຳນາດການປົກຄອງ ແລະ ຄອບ ຄົວຜູ້ປະສົບເຄາະຮ້າຍໃນຄັ້ງນີ້ດ້ວຍ. ພວກຂ້າພະເຈົ້າ ເຊື່ອໝັ້ນວ່າພາຍໃຕ້ການນຳພາ ແລະ ດ້ວຍຄວາມເອົາໃຈໃສ່ ຢ່າງໃກ້ຊິດຂອງພັກ, ລັດຖະບານຫວຽດ ນາມ ທັງຂັ້ນສູນກາງ ແລະ ທ້ອງຖິ່ນ, ປະຊາຊົນຫວຽດນາມ ອ້າຍນ້ອງ ຈະຜ່ານຜ່າທຸກຄວາມຫຍຸ້ງຍາກນີ້ ແລະ ຟື້ນຟູຊີວິດ ການເປັນຢູ່ ຂອງປະຊາຊົນໃນເຂດທີ່ໄດ້ຮັບຜົນກະທົບຈາກ ໄພທຳມະຊາດຄັ້ງນີ້ ໃຫ້ກັບຄືນສູ່ສະພາບປົກກະຕິໂດຍໄວ.